കുറിച്ചി: സാമൂഹികവിരുദ്ധരുടെ അഴിഞ്ഞാട്ടം മൂലം കുറിച്ചി പഞ്ചായത്തിലെ വഴിവിളക്കുകള് നശിപ്പിക്കുന്നതായി പരാതി. സന്ധ്യകഴിഞ്ഞാല് ഇടവഴികളിലെ മദ്യപാനം മൂലം വഴിയാത്രകാര്ക്ക് നടക്കുവാന് പറ്റാത്ത അവസ്ഥയായി മാറിയിരിക്കുന്നു. നേരത്തെ വൈകുന്നേരങ്ങളില് മാത്രം ഇടവഴികള് കൈക്കലാക്കിയിരുന്ന മദ്യപ സംഘങ്ങള് ഇപ്പോള് ഞായറാഴ്ചകളിലും മറ്റ് ആഘോഷദിവസങ്ങളിലും പകല്സമയങ്ങളില് കൂടി സജീവമാകുകയാണ്.
ഇരുളിന്റെ മറവില് നടക്കുന്ന ആഭാസ പ്രവര്ത്തനങ്ങള്ക്ക് വെളിച്ചം തടസ്സമായതിനാല് മന:പൂര്വ്വം വഴിവിളക്കുകള് നശിപ്പിക്കുകയാണെന്ന് പ്രദേശവാസികള് പറയുന്നു. നാളുകള്ക്ക് മുന്പ് പഞ്ചായത്തിലെ ഫണ്ടുകള് ഉപയോഗിച്ച് ഇത്തരത്തില് സ്ഥാപിച്ച വഴിവിളക്കുകള് ഏറെയും നശിപ്പിക്കപ്പെട്ട അവസ്ഥയിലാണ്. ഇടവഴികളോട് ചേര്ന്നുള്ള കവലകളിലെല്ലാം രാത്രി വൈകിയും ബഹളവും ശല്യവും ഉണ്ടാകാറുണ്ട്.
റെയില്വേ പാത ഇരട്ടിപ്പും എം.സി റോഡു നവീകരണവും പഞ്ചായത്തിന്റെ വിവിധ ഭാഗങ്ങളില് ഒരുപോലെ നടക്കുകയാണ് നിലവില്. ഇതിന്റെ ഭാഗമായി മറ്റു സ്ഥലങ്ങളില് നിന്ന് മണ്ണ് അധികമായി ഇവിടെ കൊണ്ടുവരുന്നുണ്ട്. ഇങ്ങനെവരുന്ന മണ്ണില്നിന്ന് നിരവധി ഇഴജന്തുക്കളാണ് പ്രദേശത്ത് വ്യാപിക്കുന്നത്. വഴിവിളക്കുകള് ഇല്ലാത്തതുമൂലം റോഡിലൂടെ വഴിയാത്രകാര്ക്ക് രാത്രി സഞ്ചാരം ഭീതിയാകുകയാണ്.
പൊതുജനങ്ങളുടെ സൈ്വര്യജീവിതത്തിനു തടസ്സം നില്ക്കുന്ന ഇത്തരക്കാര്ക്കെതിരെ നടപടിയുണ്ടാകണമെന്ന് പ്രദേശത്തെ വിവിധ റെസിഡന്റ്സ് അസോസിയേഷനുകളും പോലീസിന്റെ ഭാഗത്തുനിന്ന് വേണ്ട നടപടികള് അടിയന്തിരമായി ഉണ്ടാവണമെന്ന് നാട്ടുകാരും ആവശ്യപ്പെടുന്നു.
