പൊന്‍കുന്നം: പുതുമകളില്ലാതെ എല്‍ഡിഎഫ് പ്രകടന പത്രിക. പുതിയ പദ്ധതികള്‍ക്കൊന്നുമുള്ള ഇച്ഛാശക്തി പ്രകടിപ്പിക്കാതെ പരമ്പരാഗതമായി പഞ്ചായത്തുകള്‍ നിര്‍ബന്ധമായും നടപ്പാക്കേണ്ട പദ്ധതികള്‍ പ്രകടനപത്രികയായി അവതരിപ്പിച്ച് വോട്ടര്‍മാരുടെ കണ്ണില്‍ പൊടിയിടുകയാണ് എല്‍ഡിഎഫ്. പ്രകടനപത്രികയില്‍ പറയുന്ന കാര്യങ്ങളൊന്നുംതന്നെ നടപ്പാക്കുമെന്ന് ഉറപ്പ് ഒരിടത്തും ഇല്ല.
20 വര്‍ഷം തുടര്‍ച്ചയായി ഭരണത്തില്‍ ഇരുന്നപ്പോള്‍ നടപ്പാക്കാമായിരുന്ന കാര്യങ്ങള്‍തന്നെയാണ് മുന്നണി ഇപ്പോഴും പറഞ്ഞുകൊണ്ടിരിക്കുന്നത്. പല പദ്ധതികള്‍ക്കുവേണ്ടിയും ശ്രമിക്കും എന്ന അവകാശവാദം മാത്രമാണ് ഇപ്പോഴും നല്‍കുന്നത്. എന്നാല്‍ എന്തുകൊണ്ട് ഇവയൊന്നും ഇത്രയും കാലം അധികാരത്തില്‍ ഇരുന്നിട്ടും നടപ്പാക്കിയില്ലായെന്ന ജനങ്ങളുടെ ചോദ്യത്തിന് മുമ്പില്‍ മറുപടിയാവില്ല ഈ പ്രകടന പത്രിക.
ഭൂരിഭാഗം റോഡുകളും തകര്‍ന്ന് കിടക്കുമ്പോഴും ഇവയ്‌ക്കായി ഒന്നും ചെയ്യാത്തവര്‍ നവീകരണ വാഗ്ദാനം വീണ്ടും നല്‍കുന്നു. അര്‍ഹരായ പലര്‍ക്കും ക്ഷേമ പെന്‍ഷന്‍ നല്‍കാന്‍ വിമുഖത കാട്ടിയവര്‍ പുതിയ പ്രകടന പത്രികയില്‍ ക്ഷേമ പെന്‍ഷന്‍ അനുവദിക്കാനുള്ള നടപടി സ്വീകരിക്കുമെന്ന പൊള്ളയായ വാഗ്ദാനമാണ് നല്‍കുന്നത്. ആധുനിക ശ്മശാനം നിര്‍മ്മിക്കുന്നതിന് നടപടി സ്വീകരിക്കുമെന്ന് അഞ്ച് വര്‍ഷം ഇതിനായി ഒന്നും ചെയ്യാത്തവര്‍ വീണ്ടും പഴയ വാഗ്ദാനം ആവര്‍ത്തിക്കുകയാണ്. കുടുംബശ്രീയുടെ താലം പൊടിമില്‍ യൂണിറ്റ് സ്വകാര്യ വ്യക്തികള്‍ക്ക് മറിച്ച് വിറ്റവര്‍ കുടുംബശ്രീയുടെ വിവിധ പദ്ധതികള്‍ നടപ്പാക്കുമെന്ന് വാഗ്ദാനം നല്‍കുന്നത് വിരോധാഭാസമാണ്.
ദേശീയപാതയിലെ പ്രധാന ബസ്സ്റ്റാന്റായ പൊന്‍കുന്നം ബസ് സ്റ്റാന്‍ഡ് തകര്‍ന്ന് കിടക്കുമ്പോഴും ഈ വിഷയം പ്രകടന പത്രികയില്‍ ഉള്‍ക്കൊള്ളിക്കാന്‍ പോലും ആര്‍ജ്ജവം കാട്ടിയിട്ടില്ല. കൃഷി, മൃഗസംരക്ഷണം, കുടിവെള്ള പദ്ധതികള്‍ വിദ്യാഭ്യാസം എന്നീ മേഖലകളില്‍ പുതിയ യാതൊരു പദ്ധതിയും പ്രകടനപത്രികയില്‍ ഇല്ല. ജനങ്ങളുടെ അടിസ്ഥാന ആവശ്യങ്ങളെ ഒന്നും പരാമര്‍ശിക്കാതെ നിരുത്തരവാദപരമായ പ്രകടന പത്രികയുമായി മുന്‍ ഭരണകര്‍ത്താക്കള്‍ ജനങ്ങളെ കബളിപ്പിക്കുയാണെന്ന ആരോപണം നിക്ഷ്പക്ഷരുടെ ഭാഗത്തുനിന്നുതന്നെ ഉയര്‍ന്നിട്ടുണ്ട്.
