കോട്ടയം: കുറിച്ചിയുടെ കൂറ് നേടിയെടുക്കുകയെന്ന ലക്ഷ്യത്തോടെയാണ് രാധാമണി രമേഷിന്റെ പടയോട്ടം. മുഖ്യമന്ത്രി ഉമ്മന്‍ചാണ്ടിയുടെ ജില്ലാ പഞ്ചായത്ത് ഡിവിഷനായ ഇവിടെ ബിജെപിക്കായി പടനയിക്കുന്ന രാധാമണി ഉറപ്പിച്ചുപറയുന്നു കുറിച്ചിയുടെ കൂറ് തനിക്കൊപ്പമായിരിക്കുമെന്ന്. മുഖ്യമന്ത്രിയുടെ ഡിവിഷനായിട്ടുപോലും റോഡുകളുടെ ശോച്യാവസ്ഥയും കുടിവെള്ള പ്രശ്‌നവും പരിഹരിക്കുന്നതിന് ഒരു നടപടിയുമില്ലെന്ന് ജനങ്ങള്‍ പരാതിപ്പെടുന്നു. ജീവല്‍ പ്രശ്‌നങ്ങളോട് പുറം തിരിഞ്ഞ് നില്‍ക്കുന്ന മുന്നണികള്‍ക്ക് ഇനി വോട്ടില്ലെന്നാണ് അവര്‍ പറയുന്നത്. ഇവിടേക്കാണ് മാറ്റത്തിന്റെ സന്ദേശവുമായി രാധാമണിയുടെ കടന്നുവരവ്. പനച്ചിക്കാട് പഞ്ചായത്തിലെ സിഡിഎസ് അംഗവും എഡിഎസ് ചെയര്‍പേഴ്‌സണുമായ രാധാമണി മന്നം സോഷ്യല്‍ സര്‍വ്വീസ് സൊസൈറ്റി നാട്ടകം, പനച്ചിക്കാട് മേഖലാ കോ-ഓര്‍ഡിനേറ്റര്‍ കൂടിയാണ്. ട്യൂഷന്‍ ടീച്ചര്‍ എന്ന നിലയില്‍ ധാരാളം ശിഷ്യ സമ്പത്തുമുണ്ട് ബിജെപി സ്ഥാനാര്‍ത്ഥിക്ക്. പൊതുപ്രവര്‍ത്തനരംഗത്ത് രാധാമണിക്കുള്ള സ്വീകാര്യത ബിജെപി പ്രവര്‍ത്തകര്‍ക്ക് മാത്രമല്ല സാധാരണക്കാര്‍ക്കിടയിലും വലിയ അവേശമാണ് സൃഷ്ടിച്ചിരിക്കുന്നത്. എസ്എന്‍ഡിപി യോഗം നേതൃത്വം നല്‍കുന്ന സമത്വ മുന്നണിയുടെ ശക്തമായ പിന്തുണയും രാധാമണിയുടെ വിജയമുറപ്പിക്കാന്‍ പോന്നതാണ്. കുറിച്ചി പഞ്ചായത്തില്‍ സിപിഎമ്മിലെ ആഭ്യന്തര കലഹവും ബിജെപിക്ക് ഗുണം ചെയ്യുമെന്ന് രാഷ്‌ട്രീയ നിരീക്ഷകര്‍ വിലയിരുത്തുന്നു. കുറിച്ചി പഞ്ചായത്ത് പൂര്‍ണ്ണമായും , പനച്ചിക്കാട് പഞ്ചായത്തിലെ 19 വാര്‍ഡുകളും പുതുപ്പള്ളിയിലെ അങ്ങാടിവാര്‍ഡും ചേര്‍ന്നതാണ് ജില്ലാ പഞ്ചായത്തിലെ കുറിച്ചി ഡിവിഷന്‍. കുറിച്ചി പഞ്ചായത്ത് മുന്‍ പ്രസിഡന്റ് സുജാതാ സുശീലനാണ് എല്‍ഡിഎഫ് സ്ഥാനാര്‍ത്ഥി. മഹിളാ കോണ്‍ഗ്രസ് ജില്ലാ പ്രസിഡന്റും കുറിച്ചി പഞ്ചായത്ത് മെമ്പറുമായ ഡോ.ശോഭ സലിമോനെയാണ് യുഡിഫ് രംഗത്തിറക്കിയിരിക്കുന്നത്.
കുറിച്ചിയുടെ കൂറ് നേടാന്‍ രാധാമണിയുടെ പടയോട്ടം
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.