അബ്രവില്ലക്ഷ്മണം പ്രീതഃ
സമുദ്രാത്ജലമാനയ
തേനചേമം മഹാപ്രാജ്ഞമഭിഷിഞ്ച
വിഭീഷണ
ലക്ഷ്മണ സമുദ്രജലം കൊണ്ടുവരൂ. ആ ജലം കൊണ്ട് ഈ മഹാപ്രാജ്ഞനെ രാക്ഷസരാജ്യത്തിന്റെ സിംഹാസനത്തില് അഭിഷേകം ചെയ്യൂ. രാമാജ്ഞയനുസരിച്ച് താന് അപ്പോള്തന്നെ വിഭീഷണനെ ലങ്കാധിപതിയായി അഭിഷേകം ചെയ്തു.
ശ്രീരാമചന്ദ്രന് ഒറ്റക്കിരിക്കുന്ന അവസരം നോക്കി സുഗ്രീവന് രാമനോട് ചോദിച്ചു. പ്രഭോ ഇനി രാവണനും അഭയം ചോദിച്ച് വരികയാണെങ്കില് അങ്ങ് എന്തുചെയ്യും? ലങ്ക തിരിച്ച് രാവണന് കൊടുക്കുമോ? ആ ചോദ്യത്തിന് ശ്രദ്ധേയമായ ഉത്തരമാണ് രാമന് നല്കിയത്.
പറഞ്ഞ വാക്ക് പറഞ്ഞതുതന്നെ വാക്കില് യാതൊരു മാറ്റവുമില്ല. ഇനി രാവണന് വന്ന് അഭയംതേടിയാലും വിഭീഷണന് ലങ്കാധിപതിയായിരിക്കും. രാവണന് നല്കാനായി എന്റെ കൈവശം അയോദ്ധ്യയുണ്ടല്ലോ?
സുഗ്രീവന് വിഭീഷണനെ ആശ്ലേഷിച്ചശേഷം പറഞ്ഞു. ഇനിമുതല് അങ്ങ് പരമപുരുഷനായ ശ്രീരാമന്റെ സേവകന്മാരില് മുഖ്യനാകുന്നു. രാവണനിഗ്രഹത്തിനായി ഭവാന് ഇനി കഴിയാവുന്ന സഹായങ്ങള് ചെയ്തുതരണം. അതുമൂലം അങ്ങേക്ക് ശ്രേയസ്സ് ലഭിക്കുന്നതാണ്.
സുഗ്രീവന് പറഞ്ഞതുകേട്ട് വിഭീഷണന് ചിരിച്ചുകൊണ്ട് പറഞ്ഞു. അഖിലേശ്വരനായ ശ്രീരാമന് ആരുടേയും സഹായം ആവശ്യമുള്ളതായി എനിക്കുതോന്നുന്നില്ല. അദ്ദേഹത്തെ സഹായിക്കുന്നതായി നമുക്ക് തോന്നുന്നതുതന്നെ വിഡ്ഢിത്തമാണ്. മായയുടെ പ്രഭാവത്താല്, സത്വ, രജ, തമോഗുണ ഭാവങ്ങളിലൂടെ നാം അങ്ങിനെ വിചാരിച്ചുപോകുന്നു. നാമെല്ലാവരും ശ്രീരാമ ഭൃത്യന്മാരാണെന്ന് മനസ്സിലാക്കിക്കൊണ്ട് അദ്വയഭാവത്തോടുകൂടി അദ്ദേഹത്തെ സേവിക്കുകയാണ് വേണ്ടത്.
രണ്ടുപേരുടേയും സംഭാഷണം ശ്രദ്ധിച്ചുകൊണ്ടിരുന്ന ശ്രീരാമചന്ദ്രന് വിഭീഷണനോടായി പറഞ്ഞു. ഞങ്ങള് ലങ്ക എന്ന് കേട്ടിട്ടേ ഉള്ളൂ. അതിന്റ ഉത്ഭവം, വലിപ്പം, സമ്പത്ത്, സജ്ജീകരണം ഇവയെക്കുറിച്ച് ഒന്നും അറിഞ്ഞിട്ടില്ല. അതറിയുന്നത് നമ്മുടെ ഭാവിപ്രവര്ത്തനങ്ങള്ക്ക് സഹായകരമായിരിക്കും. അതുകൊണ്ട് അതിനെപ്പറ്റി വിശദമാക്കിയാല് നന്നായിരിക്കും.
വിഭീഷണന് പറഞ്ഞു. ലങ്കയെപ്പറ്റി സമ്പൂര്ണ്ണമായ ഒരു വിവരണം അത്ര എളുപ്പമല്ല. അത്രയ്ക്ക് സര്വ്വതോന്മുഖമായ വ്യാപ്തിയും സമാനതകളില്ലാത്ത പ്രത്യേകതകളും നിറഞ്ഞതാണ് ലങ്ക. നാം അത്യാവശ്യമായി അറിഞ്ഞിരിക്കേണ്ട ചില വസ്തുതകളെ എന്നാല് കഴിയുംവിധത്തില് ഞാന് വിവരിക്കാം.
പണ്ടൊരിക്കല് നാഗശ്രേഷ്ഠനായ വാസുകിയും ജഗല്പ്രാണനായ വായുദേവനും തമ്മില് ആരാണ് കൂടുതല് ശക്തിശാലിയെന്ന വിഷയത്തില് മത്സരബുദ്ധിയോടുകൂടി വാശിയേറിയ വാഗ്വാദം നടന്നു. സകല പ്രാണികളേയും ജീവനോടെ നിലനിര്ത്തുന്നത് ഞാനാണെന്നും ഞാനില്ലെങ്കില്ലോകംനിര്ജീവമായിരിക്കുമെന്ന് വായുദേവനും. എപ്പോഴും ചഞ്ചലസ്വഭാവമുള്ളവനും ഒരു രൂപംപോലുമില്ലാത്തവനാണെന്നും, നിസ്സാരനായ നീ എന്നേക്കാളെന്നല്ല ആരെക്കാളും മോശപ്പെട്ടവനാണെന്ന് വാസുകിയും വാദിച്ചു. ഇവര് തമ്മില് പോര് മൂത്തപ്പോള് ഇന്ദ്രന് ഇടപെടുകയും ബലപരീക്ഷക്ക് ഒരു മാര്ഗ്ഗം നിര്ദ്ദേശിക്കുകയും ചെയ്തു.
ആയിരം കൊടുമുടികളുള്ള മഹാമേരുവിനെ വാസുകി തന്റെ ആയിരം ഫണങ്ങളെക്കൊണ്ട് അമര്ത്തിപ്പിടിക്കട്ടെയെന്നും; ആ സമയത്ത് അവയില് ഒന്നിനെയെങ്കിലും വായു അടിച്ചിളക്കിപ്പറപ്പിക്കട്ടെയെന്നും പറപ്പിച്ചാല് വായുശക്തന് ഇല്ലെങ്കില് വാസുകി ബലശാലിയെന്നും ഇന്ദ്രന് നിബന്ധനവെച്ചു.
ഇന്ദ്രന്റെ പരീക്ഷണനിര്ദ്ദേശം സ്വീകരിച്ച് വാസുകി തന്റെ ഫണങ്ങളെക്കൊണ്ട് മേരുവിന്റെ ആയിരം ശൃംഗങ്ങളേയും ബലമായി അമര്ത്തിപ്പിടിച്ചു. വായുദേവന് ഒരു കൊടുമുടിയെങ്കിലും അടര്ത്തിയെടുക്കാനായി ശൃംഗങ്ങളില് മാറിമാറി ആഞ്ഞുവീശി. ഒരു പഴുതും കിട്ടാതായപ്പോള് വായു ഒരു സൂത്രം പ്രയോഗിച്ചു. അല്പവും അനങ്ങാതെ ഒരിടത്ത് നിലയായി. വായുവിന്റെ യാതൊരനക്കവും ഇല്ലാതായപ്പോള് വാസുകി വായു തോറ്റോടിപ്പോയിരിക്കുമെന്ന് വിചാരിച്ച് എവിടെയാണെന്ന് കണ്ടുപിടിക്കാനായി തന്റെ ഫണമൊന്നുയര്ത്തി. ചുറ്റും നോക്കാന് തുടങ്ങി. ഈ തക്കം നോക്കി വായു വാസുകി ഫണമുയര്ത്തിയ ശൃംഗത്തെ അടര്ത്തിയെടുത്ത് പറപ്പിച്ച് ദക്ഷിണസമുദ്രത്തില് നിക്ഷേപിച്ചു. സമുദ്രജലത്തില് മുങ്ങിക്കിടന്നിരുന്ന ത്രികൂടപര്വതത്തിന്റെ മുകളില് ആ ശൃംഗം ഉറച്ചിരുന്നുപോയി. അങ്ങിനെ സമുദ്രനിരപ്പിനു മുകളില് കാണുന്ന രത്നാചല ശൃംഗമാണ് ലങ്ക. ഈ ലങ്കാദ്വീപ് സര്വത്ര രത്നമയവുമാണ്.
