പാലാ: പാലാനഗരസഭയില് തെരുവുനായ്ക്കള്ക്കും ആലയം വരുന്നു. നഗരസഭാ ഡോഗ് പാര്ക്ക് എന്ന് പേരിട്ടിരിക്കുന്ന തെരുവുനായ് സംരക്ഷണ കേന്ദ്രത്തിലേത്ത് നഗരത്തിന്റെ വിവിധ ഭാഗങ്ങളില് നിന്നുമുള്ള അതിഥികള് എത്തിത്തുടങ്ങി. നൂറോളം തെരുവുനായ്ക്കളെ സംരക്ഷിക്കുന്നതിനുള്ള ഉറപ്പുള്ള കൂടുകളാണ് നഗരസഭ തയ്യാറാക്കിയിരിക്കുന്നത്. വെറ്റനറി പോളിക്ലിനിക്കിനോട് ചേര്ന്ന് നിര്മ്മിച്ചിരിക്കുന്ന കൂടിന് സമീപം പൂച്ചെട്ടികള് സ്ഥാപിച്ച് പരിസരം മനോഹരമാക്കിയിരിക്കുകയാണ്.
തെരുവുനായ്ക്കളെ പിടികൂടുന്നതിനു പാലക്കാട് സ്വദേശിയായ മണിയുടെ നേതൃത്വത്തിലുള്ള ടീമംഗങ്ങള് നഗരസഭാ വാഹനത്തില് പട്രോളിംഗ് ആരംഭിച്ചു. മാര്ക്കറ്റ്, മൂന്നാനി, തെക്കേക്കര, പുത്തന്പള്ളിക്കുന്ന്, ടൗണ്ഭാഗങ്ങളില് നിന്നുമായി മുപ്പത്തിയഞ്ചോളം തെരുവുനായ്ക്കളെയാണ് നഗരസഭാ പിടികൂടിയിരിക്കുന്നത്. പിടികൂടുന്ന തെരുവുനായ്ക്കളെ വന്ധ്യംകരണ ശസ്ത്രക്രിയയ്ക്ക് വിധേയമാക്കും. പേവിഷബാധ, പ്രതിരോധ കുത്തിവെയ്പ്പ് നടത്തിയ ശേഷം നായ്ക്കളെ ഭക്ഷണം നല്കി സംരക്ഷിക്കുന്നതിനായാണ് പദ്ധതിയിട്ടിരിക്കുന്നത്. നഗരസഭാ ആരോഗ്യ വിഭാഗത്തിനായിരിക്കും തെരുവുനായ്ക്കളുടെ സംരക്ഷണ ചുമതല.
സംരക്ഷണ കേന്ദ്രത്തിലുണ്ടാകുന്ന ജല വിസര്ജ്ജ്യ മാലിന്യങ്ങള് കുഴലിലൂടെ പ്രത്യേകമായി നിര്മ്മിച്ചിരിക്കുന്ന സെപ്റ്റിക് ടാങ്കിലേക്ക് എത്തിച്ചേരുന്ന വിധത്തിലാണ് കൂടിന്റെ രൂപകല്പ്പന നിര്വ്വഹിച്ചിരിക്കുന്നത്. കൂട് വൃത്തിയാക്കുന്നതിലേക്കായി മോട്ടോറും പൈപ്പുകളും ഘടിപ്പിച്ചു. നായ്ക്കളുടെ സംരക്ഷണത്തിനും കൂടുകള് വൃത്തിയാക്കുന്നതിനുമുള്ള ജോലികള്ക്കായി നഗരസഭയിലെ ഒരു സ്ഥിരം ജീവനക്കാരനെയും ചുമതലപ്പെടുത്തിയതായി ചെയര്മാന് കുര്യാക്കോസ് പടവന് പറഞ്ഞു.
