ചങ്ങനാശ്ശേരി: മലയില്കുന്നില് പുതിയതായി നിര്മ്മിച്ച വാട്ടര് ടാങ്കിന്റെ മറവില് വന് അഴിമതി നടക്കുന്നതായി പരാതി.
പുതിയ പൈപ്പ് കണക്ഷന് എടുത്താല് മാത്രമേ വെള്ളം കിട്ടുകയുള്ളൂ എന്ന് തെറ്റിധരിപ്പിച്ചാണ് അഴിമതിയ്ക്ക് കളമൊരുക്കിയത്. നിരവധി കണക്ഷനുകള് അനധികൃതമായി നല്കിയിട്ടുള്ളതായാണ് പരാതി. വാട്ടര് അതോറിറ്റി അസി.എക്സിക്യൂട്ടീവ് എന്ജിനീയറോട് നാട്ടുകാര് പരാതിപ്പെട്ടപ്പോള് ഇത് വാട്ടര് അതോറിറ്റിയുടെ അനുമതിയോടെയല്ലെന്ന് പറഞ്ഞു. സ്ഥലം എംഎല്എ സിഎഫ് തോമസിനേയും വിവരം അറിയിച്ചപ്പോള് അദ്ദേഹം എ.എ്ക്സ് ഇയെ ബന്ധപ്പെട്ടു വിവരം ആരാഞ്ഞു നടപടിയെടുക്കുന്നതിന് വേണ്ട കാര്യങ്ങള് ചെയ്യണമെന്ന് ആവശ്യപ്പെട്ടു. കേന്ദ്രസര്ക്കാരിന്റെ പദ്ധതിയില് നിര്മ്മിച്ചതാണ് വാട്ടര് ടാങ്ക്.
അത് അട്ടിമറിക്കാന്വരെ ചില രാഷ്ട്രീയ നേതാക്കളും ശ്രമിച്ചിരുന്നു. 2000 രൂപാവരെ നിരവധി വീട്ടുകാരില് നിന്നും വാട്ടര് അതോറിറ്റിയിലെ ചില ജീവനക്കാരും മറ്റും വാങ്ങിയതായാണ് പറയുന്നത്.
പുതിയ ടാങ്ക് ഇതുവരെ കമ്മീഷന് ചെയ്തിട്ടില്ല. പുതിയ പൈപ്പിട്ട് ഈ കണക്ഷനുകളില് വെള്ളം ലഭ്യമാക്കിയതായും പറയുന്നു. നിലവിലുള്ള ജലവിതരണകുഴലില് നിന്നും ബന്ധം വേര്പ്പെടുത്തി പുതിയ വാട്ടര് ടാങ്കിന്റെ കുഴലില് കൂട്ടിച്ചേര്ത്താണ് പണികള് ചെയ്തിരിക്കുന്നത്. മലയില് കുന്നിലുള്ള വാട്ടര് അതോറിറ്റി ഉപയോക്താക്കള്ക്ക് പുതിയ ടാങ്കില് നിന്നും ജലവിതരണം തുടങ്ങിയിട്ടില്ലാത്ത സാഹചര്യത്തിലാണ് നിയമത്തെ വെല്ലുവിളിച്ച് ചില ഉദ്യോഗസ്ഥരുടേയും ഭരണസ്വാധീനത്തിന്റെ ബലത്തില് പ്രാദേശിക നേതാവും ചേര്ന്ന് അഴിമതിക്ക് കളമൊരുക്കുന്നത്.
ഈ അഴിമതിയെ സംബന്ധിച്ച് സമഗ്ര അന്വേഷണം നടത്തണമെന്ന് നാട്ടുകാര് ആവശ്യപ്പെടുന്നു.
