കരുവാരക്കുണ്ട്: ഗ്രാമപഞ്ചായത്ത് അംഗത്തിന്റെ വീടിന് നേരെ അക്രമം നടത്തുകയും മുറ്റത്ത് നിര്‍ത്തിയിട്ടിരുന്ന മൂന്ന് വാഹനങ്ങള്‍ കത്തിക്കുകയും ചെയ്തവര്‍ക്കെതിരെ മുഖം നോക്കാതെ നടപടിയെടുക്കണമെന്ന് ഹിന്ദുഐക്യവേദി സംസ്ഥാന സെക്രട്ടറി പി.വി.മുരളീധരന്‍.
കരുവാരക്കുണ്ട് ഹൈന്ദവ സേവാസമിതിയുടെ സജീവ പ്രവര്‍ത്തകനായ കെ.ഗോപാലകൃഷ്ണന്റെ വീട്ടിലാണ് ആക്രമണം നടന്നത്. പോലീസ് അന്വേഷണം നടത്തുന്നുണ്ടെങ്കിലും പ്രതികളെ പിടികൂടാന്‍ സാധിച്ചിട്ടില്ല. മാസങ്ങള്‍ക്ക് മുമ്പ് ഇതേ വീടിന് നേരെ അജ്ഞാതസംഘം കല്ലെറിഞ്ഞിരുന്നു. അന്ന് വലിയ നാശനഷ്ടങ്ങളൊന്നും ഉണ്ടായിരുന്നില്ല.
പാണ്ടിക്കാട് സിഐ എം.കെ.കൃഷ്ണനാണ് അന്വേഷണ ചുമതല. ഡോഗ് സ്‌ക്വാഡും വിരലടയാള വിദഗ്ധരും കഴിഞ്ഞ ദിവസം തെളിവുകള്‍ ശേഖരിച്ചിരുന്നു.
സമഗ്ര അന്വേഷണം നടത്തണമെന്ന് ജനശ്രീ മിഷന്‍ സംസ്ഥാന ചെയര്‍മാന്‍ എം.എം.ഹസ്സനും ആവശ്യപ്പെട്ടു. സംഭവം ആഭ്യന്തര മന്ത്രിയുടെ ശ്രദ്ധയില്‍പ്പെടുത്തുമെന്നും അദ്ദേഹം പറഞ്ഞു. വിവിധ ക്ഷേത്രസംഘടനാ പ്രതിനിധികളും ബിജെപി നേതാക്കളും വീട് സന്ദര്‍ശിച്ചു.
പ്രതികരിക്കാൻ ഇവിടെ എഴുതുക: