കൊച്ചി: സീപ്പോര്ട്ട് എയര്പ്പോര്ട്ട് റോഡ് മരണക്കെണിയായി മാറുന്നു. ഒടുവിലായി ഇന്നലെ കാക്കനാട് ഇന്ഫോപാര്ക്ക് ഗേറ്റില് ബസ്സ് കാത്തു നിന്നവര്ക്കിടയിലേക്ക് ലോറി പാഞ്ഞുകയറി രണ്ടുപേരുടെ മരണത്തിനിടയാക്കിയ സംഭവമാണ്. കഴിഞ്ഞ ആഴ്ച്ച കോട്ടയം സ്വദേശി ഇവിടെ അപകടത്തില്പെട്ട് മരിച്ചിരുന്നു. ഇതിന്മുമ്പ് സീപ്പോര്ട്ട്- എയര്പ്പോര്ട്ട് റോഡില് അപകടത്തില്പ്പെട്ട് രണ്ട് പേര് മരണപ്പെട്ടപ്പോള് റോഡ് അപകടങ്ങളെക്കുറിച്ച് പഠിക്കാന് ജസ്റ്റിസ് ചന്ദ്രശേഖര് ദാസ് കമ്മീഷന് രൂപീകരിച്ചിരുന്നു. സീപ്പോര്ട്ട്-എയര്പ്പോര്ട്ട് റോഡിലെ വിവിധ ഭാഗങ്ങള് സന്ദര്ശിച്ച കമ്മീഷന് അപകടങ്ങള് ഒഴിവാക്കാനുള്ള നിര്ദ്ദേശ്ശങ്ങളും മുന്നോട്ട് വച്ചിരുന്നു
സീപ്പോര്ട്ട് എയര്പ്പോര്ട്ട് റോഡ് ആരംഭിക്കുന്ന കരിങ്ങാച്ചിറ മുതല് എച്ച്എംടി ജംഗ്ഷന് വരെയുള്ള മേഖലകളില് പരിശോധന നടത്തിയ കമ്മീഷന്. ഇരുമ്പനം വിളക്ക് ജംഗ്ഷന്, രാജഗിരി ഇന്ഫോപാര്ക്ക് എക്സ്പ്രസ് വേ എന്നിവിടങ്ങളിലെ ജംഗ്ഷനുകള് കൊച്ചി റിഫൈനറി, ഇന്ഫോപാര്ക്ക് എന്നീ സ്ഥാപനങ്ങളുടെ സഹായത്തോടെ വികസിപ്പിക്കണമെന്ന് കമ്മീഷന് നിര്ദ്ദേശം വച്ചിരുന്നു. ഇതേ ഇന്ഫോപാര്ക്ക് എക്സ്പ്രസ് വേയിലാണ് ഇപ്പോള് അപകടം നടന്നത്. വിളക്ക് ജംഗ്ഷനില് അശാസ്ത്രീയമായാണ് വാഹനങ്ങള് സഞ്ചരിക്കുന്നത് എന്നും കമ്മീഷന് കണ്ടെത്തിയിരുന്നു.
ഇരുമ്പനത്തെ ഓയില് കമ്പനികളിലേക്കുള്ള ടാങ്കര് ലോറികള് സീപ്പോര്ട്ട്-എയര്പ്പോര്ട്ട് റോഡിനരുകില് പാര്ക്ക് ചെയ്യുന്നത് തടയണമെന്നും കമ്മീഷന് നിര്ദ്ദേശിച്ചു. ടാങ്കര് ലോറികള്ക്ക് സ്ഥിരം പാര്ക്കിംഗ് സംവിധാനം ഒരുക്കാന് കമ്പനികള് തയ്യാറാകണം. പൂജാരി വളവിലെ ബീവറേജസ് ഔട്ട്ലെറ്റിലെത്തുന്നവര് സീപ്പോര്ട്ട് റോഡില് അനധികൃതമായി വാഹനങ്ങള് പാര്ക്ക് ചെയ്യുന്നത് അവസാനിപ്പിക്കണമെന്നും കമ്മീഷന് ആവശ്യപ്പെട്ടിരുന്നു.
എന്നാല് അപകടങ്ങള് കുറയ്ക്കാന് കമ്മീഷന് രൂപീകരിച്ചത് മാത്രം ബാക്കിയായി. കമ്മീഷന് നിര്ദ്ദേശിച്ച ഒരു നിര്ദ്ദേശം പോലും പ്രാവര്ത്തികമാക്കാന് അധികൃതര് തയ്യാറായിട്ടില്ല. നിരന്തമുണ്ടാകുന്ന അപകടങ്ങള് കണക്കിലെടുത്ത് പ്രദേശത്ത് ക്യാമറകള് സ്ഥാപിക്കണമെന്നാണ് നാട്ടുകാരുടെയും ആവശ്യം.
