കൊല്ലം: തൃക്കടവൂര് സാമൂഹികാരോഗ്യ കേന്ദ്രം ഉദ്യോഗസ്ഥരുടെ മിന്നല് പരിശോധനയില് ലൈസന്സില്ലാത്തതും വൃത്തിഹീനമായി പ്രവര്ത്തിച്ചതുമായ രണ്ടു ഹോട്ടലുകള് പൂട്ടി. പഴകിയ ആഹാരങ്ങള് നശിപ്പിക്കുകയും മൂന്ന് കടകള്ക്ക് നോട്ടീസ് നല്കുകയും ചെയ്തു.
വൃത്തിഹീനമായി പ്രവര്ത്തിച്ച കടകളാണ് നിശ്ചിത ദിവസത്തിനുള്ളില് അടച്ചിട്ട് വൃത്തിയാക്കാന് ഉദ്യോഗസ്ഥര് നിര്ദേശിച്ചത്. റെഫ്രിജറേറ്റിലും അല്ലാതെയും സൂക്ഷിച്ചിരുന്ന ഇറച്ചി െ്രെഫ, ഇറച്ചിക്കറികള്, ചോറ്, കറികള്, പഴകിയ എണ്ണ, വറുത്ത പലഹാരങ്ങള് എന്നിവ പിടിച്ചെടുത്തവയില്പ്പെടും. ഉരുക്കാനായി ഡാല്ഡ പൊട്ടിക്കാത്ത പ്ലാസ്റ്റിക് കവറോടുകൂടി കറിയില് കണ്ടെത്തി. വൃത്തിയില്ലാതെ പ്രവര്ത്തിച്ച അഞ്ചാലുംമൂട്, നീരാവില്, കുരീപ്പുഴ എന്നിവിടങ്ങളിലെ മൂന്ന് ഹോട്ടലുകള്ക്ക് നോട്ടീസ് നല്കി.
കിണര് വെള്ളം ക്ലോറിനേറ്റ് ചെയ്യുക, വെള്ളം പരിശോധിച്ച് കോളിഫോം ബാക്ടീരിയ ഇല്ലെന്ന് ഉറപ്പുവരുത്തുക, ജ്യൂസും ഐസും നല്ല വെള്ളത്തില് തയ്യാറാക്കുക, കുടിയ്ക്കാന് തിളപ്പിച്ചാറ്റിയ വെള്ളം നല്കുക, പൊട്ടിപൊളിഞ്ഞ പാത്രങ്ങളും പൊറോട്ട ഷീറ്റും മാറ്റുക, വ്യക്തിശുചിത്വം പാലിക്കുക, ഹെല്ത്ത് കാര്ഡ് എടുക്കുക, മലിനപ്പെടാത്ത വിധം ആഹാരം പാകം ചെയ്യുക, പഴകിയ എണ്ണ ഉപയോഗിക്കാതിരിക്കുക, പഞ്ചായത്ത് ലൈസന്സ് പ്രദര്ശിപ്പിക്കുക, പുകവലി നിരോധിത ബോര്ഡ് സ്ഥാപിക്കുക തുടങ്ങിയവ നടപ്പാക്കാന് ഉദ്യോഗസ്ഥര് കര്ശനനിര്ദേ ശം നല്കി. സോഡാ ഫാക്ടറി, ബേക്കറികള്, കാറ്ററിംഗ് യൂണിറ്റുകള് എന്നിവിടങ്ങളും പരിശോധിച്ചു. സെയിഫ് കേരളയുടെ ഭാഗമായി സാമൂഹികാരോഗ്യ കേന്ദ്രം ഹെല്ത്ത് സൂപ്പര്വൈസര് എം.പി.മുരളിധരന്, ഹെല്ത്ത് ഇന്സ്പെക്ടര് പി.ആര്.ബാലഗോപാല് എന്നിവരുടെ നേതൃത്വത്തില് നടത്തിയ പരിശോധനയില് ജൂനിയര് എച്ച്ഐ മാരായ എ.രാജേഷ്, വിജീഷ്, വി.കെ.അരുണ്, പ്രതിഭ, മഴ്സിലിന് തുടങ്ങിയവര് പങ്കെടുത്തു. കഴിഞ്ഞ ചൊവ്വാഴ്ച്ച നടത്തിയ പരിശോധനയുടെ തുടര്പരിശോധനയാണ് വീണ്ടും നടത്തിയതെന്നും വരും ദിവസങ്ങളില് പരിശോധന കര്ശനമാക്കുമെന്നും മെഡിക്കല് ഓഫീസര് ഡോ.സീമ ശിവാനന്ദ് അറിയിച്ചു.
