മുംബൈ: നരേന്ദ്ര മോദി അധികാരമേറ്റതോടെ ഭാരതം വീണ്ടും ശ്രദ്ധാകേന്ദ്രമായെന്ന് പ്രശസ്ത മാനെജ്മെന്റ് കണ്സള്ട്ടിങ് സ്ഥാപനം മകിന്സേയുടെ സിഇഒ ഡൊമിനിക് ബാര്ട്ടണ്. കഴിഞ്ഞ അഞ്ചു വര്ഷം ലോകം ഭാരതത്തെ ഉപേക്ഷിച്ചു. ഭാരതത്തെ ആശ്രയിക്കുന്നത് ആപത്കരവും വിഷമമേറിയതുമാണെന്ന് അവര് ചിന്തിച്ചു. ഇവിടെ നിന്ന് ഒരു സഹായവും ലഭിക്കില്ലെന്നും അവര് കരുതി. ഇപ്പോള് കാര്യങ്ങള് മാറിമാറിഞ്ഞു. മോദിയുടെ മാന്ത്രികതയാണ് ഇതിനു കാരണമെന്നു ലോകം വിശ്വസിക്കുന്നു. സിഡ്നിയിലെ അല്ഫോണ്സ് അരീനയിലും, ന്യൂയോര്ക്കിലെ മാഡിസണ് ചതുരത്തിലും അദ്ദേഹം നടത്തിയ പ്രസംഗങ്ങള് ഇതിനു കാരണമായി. നിശ്ചയദാര്ഢ്യമുള്ള, ഉറച്ച തീരുമാനങ്ങളെടുക്കാന് കഴിയുന്ന നേതാവാണ് മോദിയെന്ന് ലോകം കരുതുന്നുവെന്നും ബാര്ട്ടണ് പറഞ്ഞു.
രണ്ട് വര്ഷം മുന്പ് ഭാരതത്തിലേക്കു വരാന് ആരെയും ഞാന് ഉപദേശിക്കുമായിരുന്നില്ല. ഇവിടത്തെ ഉദ്യോഗസ്ഥരുടെ മനോഭാവത്തില് ഉപഭോക്താക്കള് അസന്തുഷ്ടരായിരുന്നു. ഒരു തീരുമാനവും അവരില്നിന്നുണ്ടായില്ല. ആഫ്രിക്കയിലേക്കോ, നൈജീരിയയിലേക്കോ, ഇന്തോനേഷ്യയിലേക്കോ പോകാമെന്നാണ് ഉപഭോക്താക്കളോട് പറഞ്ഞത്. എന്നാല്, സ്ഥിതി മാറി. ഭാരതമാണ് യഥാര്ത്ഥ കേന്ദ്രമെന്ന് ഇപ്പോള് അവരോട് പറയാം, പറയുന്നു- ബാര്ട്ടണ് പറഞ്ഞു. ഇവിടം നിക്ഷേപത്തിന് അനുകൂലം. ഫാര്മസ്യൂട്ടിക്കല്, സാങ്കേതിക വ്യവസായം, പെന്ഷന് ഫണ്ട് പോലുള്ള മേഖലകള് നിക്ഷേപത്തിന് അനുയോജ്യം. പെന്ഷന് ഫണ്ടില് നിക്ഷേപത്തിന് തങ്ങള്ക്ക് താത്പര്യമെന്നും ബാര്ട്ടണ്.
കൃഷി, ഭക്ഷ്യ മേഖലയിലാണ് വരും കാലങ്ങളില് കൂടുതല് നിക്ഷേപമെത്തുക. കഴിഞ്ഞ വര്ഷം ലോക സമ്പദ് വ്യവസ്ഥയില് 40 ശതമാനം വളര്ച്ച രേഖപ്പെടുത്തി മുന്പന്തിയിലെത്തിയത് ചൈന. ഒരു രാജ്യം മാത്രം കേന്ദ്രീകരിച്ചുള്ള വളര്ച്ച സന്തുലിതാവസ്ഥ തകിടംമറിക്കും. വരും വര്ഷങ്ങളില് ഭാരതമടക്കമുള്ള രാജ്യങ്ങള് കടന്നുവരുമ്പോള് ഇതിനു മാറ്റമുണ്ടാകുമെന്നും ബാര്ട്ടണ്.
