ന്യൂദല്ഹി: രാഷ്ട്രപതി പ്രണബ് കുമാര് മുഖര്ജിയുടെ പത്നി സുവ്ര മുഖര്ജി അന്തരിച്ചു. 74 വയസായിരുന്നു. രാവിലെ 11 മണിയോടെ ദല്ഹിയിലെ സൈനിക ആശുപത്രിയിലായിരുന്നു അന്ത്യം. ശ്വാസതടസത്തെത്തുടര്ന്ന് സുവ്രയെ വെള്ളിയാഴ്ചയാണ് ആശുപത്രിയില് പ്രവേശിപ്പിച്ചത്. ബഹുമുഖ പ്രതിഭയായ അവര് നല്ലൊരു ഗായികയും ചിത്രകാരിയും ആയിരുന്നു.
1940 സപ്തംബര് 17ന് ജെസോറില്( ഇപ്പോള് ബംഗ്ലാദേശില്) ജനിച്ച സുവ്ര ബിരുദധാരിയാണ്. 1957 ജൂലൈ പതിമൂന്നിനാണ് സുവ്ര പ്രണബിന്റെ ജീവിത പങ്കാളിയായത്.
രവീന്ദ്രനാഥ ടാഗോറിന്റെ ആരാധികയായിരുന്ന അവര് രവീന്ദ്ര സംഗീതത്തിന്റെ ഉപാസകയുമായിരുന്നു. അവര് ഭാരതത്തിലും യൂറോപ്പിലും ആഫ്രിക്കയിലും മറ്റ് ഏഷ്യന് രാജ്യങ്ങളിലും ടാഗോറിന്റെ നൃത്ത നാടകങ്ങളില് പാടി അഭിനയിച്ചിട്ടുമുണ്ട്. സുവ്രയാണ് ഗീതാഞ്ജലി ട്രൂപ്പ് സ്ഥാപിച്ചത്. ടാഗോറിന്റെ തത്വചിന്തയും സംഗീതവും രചനകളും ലോകത്തിന് പരിചയപ്പെടുത്തുകയായിരുന്നു ട്രൂപ്പിന്റെ ലക്ഷ്യം.
ചിത്രകാരി കൂടിയായ അവര് വരച്ച ചിത്രങ്ങളുടെ നിരവധി പ്രദര്ശനങ്ങള് നടത്തിയിട്ടുണ്ട്. പ്രണബിനും സുവ്രയ്ക്കും മൂന്നു മക്കളാണ് ഉള്ളത്, അഭിജിത്ത് മുഖര്ജി, ഇന്ദ്രജിത്ത് മുഖര്ജി, ശര്മ്മിഷ്ഠ മുഖ ര്ജി.
സുവ്രതയുടെ നിര്യാണത്തില് പ്രധാനമന്ത്രി, ഉപരാഷ്ട്രപതി, കേന്ദ്ര മന്ത്രിമാര്, വിവിധ രാഷ്ട്രീയ പാര്ട്ടി നേതാക്കള് അനുശോചിച്ചു. ആര്എസ്എസ് അനുശോചനം രേഖപ്പെടുത്തി.
