നോട്ടിങ്ഹാം: ഒരുപിടി ചാരം പേറുന്ന കുഞ്ഞു ഡപ്പി വീണ്ടും ഇംഗ്ലണ്ടിന്റെ കൈകളില്. 5-0ന് നാണംകെട്ട് കഴിഞ്ഞ തവണ ഓസ്ട്രേലിയയില് ഉപേക്ഷിച്ചു പോരേണ്ടിവന്ന ക്രിക്കറ്റിലെ ഈ ആഭിജാത്യ കിരീടം സ്വന്തം നാട്ടില് ആധികാരികമായി ഇംഗ്ലണ്ട് തിരിച്ചുപിടിച്ചു. അഞ്ചു മത്സര പരമ്പരയില് നോട്ടിങ്ഹാംഷെയറിലെ നാലാം മത്സരം ഇന്നിങ്സിനും 78 റണ്സിനും സ്വന്തമാക്കിയാണ് അലിസ്റ്റര് കുക്കിന്റെ സംഘം 3-1ന് പരമ്പര ഉറപ്പിച്ചത്. മൂന്നു ദിവസം കൊണ്ട് ഓസീസിന്റെ പോരാട്ടം അവസാനിച്ചു.
ഇതോടെ, 20 മുതല് ഓവലില് തുടങ്ങുന്ന അവസാന ടെസ്റ്റ് വെറും ചടങ്ങ്. ഓസീസ് നായകന് മൈക്കിള് ക്ലാര്ക്ക് പരമ്പരയോടെ വിരമിക്കുമെന്ന് സൂചനകള് പുറത്തുവിട്ടത് മാത്രം ഒരുപക്ഷേ ടെസ്റ്റിനെ ശ്രദ്ധേയമാക്കും. 15 റണ്സിന് എട്ടു വിക്കറ്റ് പിഴുത് ആദ്യ ഇന്നിങ്സില് ഓസീസിനെ നാണക്കേടിലേക്കു തള്ളിയിട്ട സ്റ്റുവര്ട്ട് ബ്രോഡാണ് ഇംഗ്ലണ്ടിനെ ജയത്തിലേക്കു നയിച്ചത്. കളിയിലെ താരവും ബ്രോഡ്.
ലോകത്തെ ഏറ്റവും വലിയ കായിക വിനോദത്തിലെ ഏറ്റവും വലിയ ലീഗിന്, ഇംഗ്ലീഷ് പ്രീമിയര് ലീഗ് ഫുട്ബോളിന്, തുടക്കമാകുന്ന ദിവസം തന്നെ ക്രിക്കറ്റ് ടീം ആഷസ് തിരിച്ചുപിടിച്ചത് ഇംഗ്ലീഷ് ആരാധകരെ ഒട്ടൊന്നുമല്ല ആനന്ദിപ്പിച്ചത്. ആരാധകരുടെ ആവേശം നെഞ്ചേറ്റു വാങ്ങിയാലെന്നതു പോലെ പ്രീമിയര് ലീഗ് ഉദ്ഘാടനത്തിനു മുന്പു തന്നെ ശേഷിച്ച ചടങ്ങുകളും തീര്ത്തു ഇംഗ്ലീഷ് ബൗളര്മാര്.
ഏഴു വിക്കറ്റ് നഷ്ടത്തില് 241 എന്ന നിലയില് തുടങ്ങിയ ഓസീസിനെ 12 റണ്സ് കൂടി ചേര്ക്കാനെ ആതിഥേയര് അനുവദിച്ചുള്ളു. തലേന്ന് അഞ്ചു വിക്കറ്റുമായി കളംനിറഞ്ഞ ബെന് സ്റ്റോക്സ് ഇന്നലെ മിച്ചല് സ്റ്റാര്ക്കിനെ മടക്കി ആറാം ഇരയെ സ്വന്തമാക്കി എതിരാളികളെ വേഗത്തില് തോല്വിയിലേക്കു തള്ളിയിട്ടു. അവസാന രണ്ടു വിക്കറ്റുകളും മാര്ക് വുഡ് സ്വന്തമാക്കി. അതിനിടെ ആദം വോഗ്സ് അര്ധശതകം തികച്ചു. 51 റണ്ണുമായി വോഗ്സ് പുറത്താകാതെ നിന്നു. 21 ഓവറില് 36 റണ്സ് വഴങ്ങിയാണ് സ്റ്റോക്സ് ആറു വിക്കറ്റെടുത്തത്. മാര്ക് വുഡിന് മൂന്ന്, ബ്രോഡിന് ഒരു വിക്കറ്റ്.
