ന്യൂദല്ഹി: യൂണിയന് പബ്ലിക് സര്വ്വീസ് കമ്മീഷന്റെ നേതൃത്വത്തില് നടന്നിട്ടുള്ള പരീക്ഷകളുടെയൊന്നും ചോദ്യപേപ്പറുകള് ചോര്ന്നിട്ടില്ലെന്ന് കേന്ദ്രമന്ത്രി ജിതേന്ദ്ര സിങ്. കേന്ദ്ര സര്വ്വീസുകളിലേക്കുള്ള പൊതു പ്രവേശനപ്പരീക്ഷകളില് നിയമന തട്ടിപ്പുകാര് ചോദ്യപേപ്പര് ചോര്ത്തുന്നതുസംബന്ധിച്ച് പാര്ലമെന്റില് ഉന്നയിക്കപ്പെട്ട ചോദ്യത്തിന് നല്കിയ മറുപടിയിലാണ് കേന്ദ്രമന്ത്രി ഇക്കാര്യം വ്യക്തമാക്കിയത്.
അതേസമയം സ്റ്റാഫ് സെലക്ഷന് കമ്മീഷന് നടത്തിയ പരിക്ഷകളില് കോപ്പിയടിച്ചതിനും മൊബൈല് ഫോണ് ഉപയോഗം തുടങ്ങിയ കുറ്റങ്ങളില് 1200 ഉദ്യോഗാര്ത്ഥികള് അറസ്റ്റിലായിട്ടുണ്ടെങ്കിലും എസ്എസ്സിയുടെ ചോദ്യപേപ്പര് ചോര്ന്നിട്ടില്ല. കഴിഞ്ഞമൂന്നു വര്ഷമായി കേന്ദ്ര സര്വ്വീസിലേക്കുള്ള പരീക്ഷകള് കമ്മീഷന് നേരിട്ടാണ് നടത്തുന്നത്.
2012ല് 246 പേരേയും, 2013ല് 400, 2014ല് 528 പേരും കോപ്പിയടിച്ചെന്ന കുറ്റത്തില് അറസ്റ്റിലായിട്ടുണ്ട്. ഇതില് വലിയ കുറ്റകൃത്യങ്ങളില് ഏര്പ്പെട്ടവര്ക്കെതിരെ ക്രിമിനല് കേസ് രജിസ്റ്റര് ചെയ്യുകയും പൊതു പ്രവേശനപരീക്ഷ എഴുതുന്നതിന് വിലക്കും ഏര്പ്പെടുത്തിയിട്ടുണ്ട്. മൂന്നു മുതല് അഞ്ചു വര്ഷത്തേയ്ക്കാണ് വിലക്കേര്പ്പെടുത്തുന്നത്.
എന്നാല് മുന് വര്ഷങ്ങളെ അപേക്ഷിച്ച് പൊതുപരീക്ഷകളില് ഇലക്ട്രോണിക് ഉപകരണങ്ങള് ഉപയോഗിച്ചുള്ള കോപ്പിയടി വര്ധിച്ചു വരുന്നതായി പ്രത്യേക അന്വേഷണ സംഘം കണ്ടെത്തിയിട്ടുണ്ട്. ഇത് തടയുന്നതിനും കേന്ദ്ര സര്വ്വീസുകളിലേക്കുള്ള പ്രവേശന പരീക്ഷകള് കൂടുതല് സുതാര്യമാക്കുന്നതിനുമായി റെക്കോര്ഡ് മൊബൈല് സിഗ്നലുകള്, ബ്ലൂടൂത്ത് ടെക്നോളജി തുടങ്ങിയവ അനങ്ങാതാക്കുന്ന സംവിധാനങ്ങളും പരീക്ഷാ കേന്ദ്രങ്ങളില് സ്ഥാപിച്ചു തുടങ്ങിയെന്നും കേന്ദ്രമന്ത്രി അറിയിച്ചു.
