ശ്രീരാമന് വനവാസത്തിന് ഉടനെ പുറപ്പെടുന്നതാണ് എന്ന് നാരദന് വാക്കുകൊടുത്തശേഷമാണ് അയോദ്ധ്യയില് പുതിയ സംഭവവികാസങ്ങളുണ്ടാകുന്നത്. ഒരുദിവസം ദശരഥന് കുലാചാര്യനായ വസിഷ്ഠനെ വരുത്തിപ്പറഞ്ഞു.
”പൗരജനങ്ങളെല്ലാം ഒന്നുപോലെ ശ്രീരാമനെ പ്രശംസിക്കുന്നു. ഞാനാണെങ്കില് അനുദിനം വൃദ്ധനായിവരുന്നു. പുത്രരില് ജ്യേഷ്ഠനായ രാമനെ യുവരാജാവായി അഭിഷേകം ചെയ്യണം. ഭരതനും ശത്രുഘ്നനും എത്തിച്ചേരുന്നതുവരെ കാത്തിരിക്കേണ്ടതില്ല. അടുത്തദിവസം ഒരു നല്ല മുഹൂര്ത്തമുണ്ട്. നാളെ പൂയം നക്ഷത്രം അഭിഷേകത്തിന് നല്ലദിനമാണ്. വേണ്ട ഒരുക്കങ്ങള് ഉടനടി ചെയ്യുകയും രാമനെ വിവരം അറിയിക്കുകയും വേണം.” വസിഷ്ഠന് ആവശ്യപ്പെടുന്നതെല്ലാം ചെയ്യാന് മന്ത്രിമുഖ്യനായ സുമന്ത്രരോടും ദശരഥന് കല്പിച്ചു.
വാല്മീകിരാമായണത്തില് വ്യത്യസ്തമായ രീതിയിലാണ് ദശരഥന് നടപ്പിലാക്കുന്നത്.
ദശരഥന് ആദ്യം മന്ത്രിസഭ വിളിച്ചുകൂട്ടുന്നു. അവരോടു ചോദിക്കുന്നു. ”ഞാന് ജീവിച്ചിരിക്കുമ്പോള് രാമന് രാജാവായി വാഴുന്നതുകണ്ടു സന്തോഷിക്കാന് എനിക്കു സാധിക്കുമോ? ഈ ഭൂമി മുഴുവന് എന്റെ മകന് ഭരിക്കുന്നത് ഈ വൃദ്ധാവസ്ഥയില് കണ്ട് സ്വര്ഗ്ഗാരോഹണം ചെയ്യണമെന്ന് ഞാനാഗ്രഹിക്കുന്നു. നിങ്ങളെന്തു പറയുന്നു?” മന്ത്രിമാരെല്ലാം അതിനെ അനുകൂലിച്ചു. ഇത്ര പെട്ടെന്ന് രാജാവിനിങ്ങനെ തോന്നാന് കാരണമുണ്ട്.
ദിവ്യന്തരീക്ഷേ ഭൂമൗ ച ഘോരമുത്പാതജം ഭയം
സംചക്ഷേ ച മേധാവീ ശരീരേ ചാത്മനോം ജരാം
(ബുദ്ധിമാനായ ആ രാജാവ് ആകാശത്തിലും ഭൂമിയിലും അന്തരീക്ഷത്തിലും കാണപ്പെട്ടുകൊണ്ടിരിക്കുന്ന ദുഃശ്ശകുനങ്ങളെപ്പറ്റിയും അതുണ്ടാക്കുന്ന ഭയത്തെപ്പറ്റിയും തന്റെ വാര്ദ്ധക്യത്തെപ്പറ്റിയും മന്ത്രിമാരോടു പറഞ്ഞു.)
തുടര്ന്ന് പ്രജാസഭയും വിളിച്ചുകൂട്ടുന്നുണ്ട്. ദശരഥന് ഭൂമിയിലെ എല്ലാ നഗരങ്ങളിലും വസിക്കുന്ന പ്രധാനികളായ പൗരന്മാരെയും രാജാക്കന്മാരെയും ക്ഷണിച്ചുവരുത്തി. അവര്ക്ക് ആഭരണങ്ങളും വാസസ്ഥലങ്ങളും യഥായോഗ്യം നല്കി സന്തോഷിപ്പിച്ചു. ഇക്കൂട്ടത്തില് കേകയരാജാവിനെയും ജനകമഹാരാജാവിനെയും ക്ഷണിച്ചില്ല. അവര് വിവരം പിന്നെ അറിഞ്ഞോട്ടെയെന്നു കരുതി. ഇതിനൊരു പ്രതേ്യക കാരണമുണ്ട്. അതു പിന്നീടു പറയാം.
സര്വ്വരാജാക്കന്മാരും പൗരപ്രധാനികളും കൂടിയ സദസ്സില് വച്ച് തന്റെ ശരീരം വാര്ദ്ധക്യത്താല് ക്ഷീണിച്ചുവെന്നും ഇനി വിശ്രമം ആവശ്യമാണെന്നും ദശരഥന് പ്രഖ്യാപിച്ചു. താന് ഉടനെ ഈ ഭൂമിയെ ഭരിക്കുന്നതിന് സര്വ്വവിധത്തിലും യോഗ്യനായ രാമനെ ഏല്പ്പിക്കാന് പോകുന്നു. നാളെ രാവിലെത്തന്നെ അഭിഷേകം നടത്തും. എല്ലാവരും അഭിപ്രായം പറയണം.
ഇതുകേട്ട് സര്വ്വരും സന്തോഷത്തോടെ രാമന്റെ ഗുണഗണങ്ങള് വിവരിക്കുകയും യുവരാജാവാകുന്നതിനോടു യോജിക്കുകയും ചെയ്തു. പ്രജാഹിതനുസരിച്ച് നാടുവാണ ചക്രവര്ത്തിമാരുടെ പാരമ്പര്യമാണ് ദശരഥനുള്ളത്. രാമനെ യുവരാജാവാക്കണമെന്ന് സര്വ്വരും ഒരേ മനസ്സോടെ ആവശ്യപ്പെട്ടപ്പോള് അദ്ദേഹത്തിന് വലിയ ആശ്വാസമായി.
.. തുടരും
