കാമാശ്രമത്തില്നിന്നും കുമാരന്മാര് സിദ്ധാശ്രമത്തിലേക്കു യാത്രയായി. നിബിഡവനങ്ങള് നിറഞ്ഞ ആ സ്ഥലത്താണ് വാമനമൂര്ത്തി തപസ്സു ചെയ്തിരുന്നത്. വാമനമൂര്ത്തിക്ക് സിദ്ധി ലഭിച്ച സ്ഥലം പിന്നീട് സിദ്ധാശ്രമം എന്നറിയപ്പെടാന് തുടങ്ങി. പിന്നീട് ആ സ്ഥലത്ത് വിശ്വാമിത്രന് യാഗം ചെയ്യുന്നതിനായി വന്ന് വാസമുറപ്പിച്ചു. ഇവിടെയാണ് രാക്ഷസന്മാര് എത്തി യാഗം മുടക്കുന്നത്. രാക്ഷസ്സന്മാര്ക്ക് മുനിമാരുടെ യാഗം മുടക്കിയിട്ട് എന്തുകിട്ടാനാണ്? രാക്ഷസന്മാര് ദേവന്മാരുടെ ജന്മശത്രുക്കളാണ്.
യാഗങ്ങള് ലോകക്ഷേമത്തിനു മാത്രമല്ല നടത്തുന്നത്. യാഗാംശം സ്വീകരിക്കുന്നതുവഴി ദേവന്മാര്ക്ക് ശക്തി വര്ദ്ധിക്കും. അതുകൊണ്ടാണ് മുനിമാരെ ഉപദ്രവിക്കുകയും യാഗങ്ങള് മുടക്കുകയും ചെയ്യുന്നത്. സിദ്ധാശ്രമത്തിലെത്തിയയുടന് രാമലക്ഷ്മണന്മാര് വിശ്വാമിത്രനോട് ഉടനെ യാഗദീക്ഷ തുടങ്ങാന് അഭ്യര്ത്ഥിച്ചു. അവര് വില്ലും അമ്പുമായി കാവല് നിന്നു. ആറുദിവസത്തെ യാഗമാണ് നടത്തേണ്ടത്. വിശ്വാമിത്രന് മൗനവ്രതം സ്വീകരിച്ച് വിധിയനുസരിച്ച് യാഗം തുടങ്ങിയപ്പോള് മായാവികളായ രാക്ഷസ്സന്മാര് ആകാശത്തു വന്നു നിറഞ്ഞു.
താടകാപുത്രന്മാരായ മാരീചന്റെയും സുബാഹുവിന്റെയും നേതൃത്വത്തില് യാഗവേദിയിലേക്ക് രക്തമാംസാദികള് വര്ഷിക്കാന് തുടങ്ങി. ശ്രീരാമന് ഉടനെതന്നെ കോപത്തോടെ വേഗതയേറിയ മാനവാസ്ത്രം മാരീചന്റെ നേര പ്രയോഗിച്ചു. അസ്ത്രമേറ്റ മാരീചന് നൂറുയോജന അകലെ സമുദ്രത്തില് ചെന്നുവീണു. മാനവാസ്ത്രപ്രയോഗത്താല് മാരീചന് ബോധഹീനനായി ബോധം തെളിഞ്ഞപ്പോള് അവന് ശ്രീരാമപാദങ്ങളില് അഭയം പ്രാപിച്ചതിനാല് അവനെ കൊല്ലാതെ വിട്ടയച്ചു.
അന്നുമുതല് മാരീചന് രാമഭക്തനായിത്തീര്ന്നുവെന്നാണ് അദ്ധ്യാത്മരാമായണത്തില് പറയുന്നത്. തുടര്ന്ന് ദിവ്യമായ ആഗ്നേയാസ്ത്രം സുബാഹുവിന്റെ നേരെ പ്രയോഗിച്ചു. അസ്ത്രറ്റമേറ്റ് മാറു പിളര്ന്ന് സുബാഹു ചത്തുവീണു. മറ്റുള്ള അസുരന്മാരെ വായവ്യാസ്ത്രം പ്രയോഗിച്ച് കൊന്നുവീഴ്ത്തി. അതോടെ വിശ്വാമിത്ര മഹര്ഷി ശത്രുബാധയകന് യാഗം പൂര്ത്തിയാക്കി. ദേവകള് പുഷ്പവൃഷ്ടി നടത്തിയും പെരുമ്പറ മുഴക്കിയും രാമനെ അഭിനന്ദിച്ചു. വിശ്വാമിത്രന് ശ്രീരാമനെ ആലിംഗനം ചെയ്തു. പിന്നീടവര് മൂന്നുനാള് അവിടെ വസിച്ചതായും ധാരാളം കഥകള് മഹര്ഷി പറഞ്ഞു കേള്പ്പിച്ചതായും അദ്ധ്യാത്മരാമായണത്തില് കാണാം. നാലാംദിവസം വിശ്വാമിത്രന് രാമനോടിങ്ങനെ പറഞ്ഞു.
അരുതു വൃഥാ കാലം കളകെന്നുള്ളതേതും
ജനകമഹീപതീതന്നുടെ മഹായജ്ഞ-
മിനിവൈകാതെ കാണ്മാന് പോകനാം വത്സന്മാരെ
ചൊല്ലെഴും ത്രൈയംബകമാകിയ മഹേശ്വര-
വില്ലുണ്ടു വിദേഹരാജ്യത്തിങ്കലിരിക്കുന്നു.
ശ്രീമഹാദേവന് തന്നെ വച്ചിരിക്കുന്നു പുരാ
ഭൂമി പാലേന്ദ്രന്മാരാലര്ച്ചിതമനുദിനം
ക്ഷോണി പാലേന്ദ്രകുല ജാതനാകിയ ഭവാന്
കാണണം മഹാസത്യമാകിയ ധനുരത്നം
…. തുടരും
