ന്യൂദല്ഹി: വിപണി വിലയേക്കാള് 60 മുതല് 70 ശതമാനം വരെ വിലക്കുറവില് അവശ്യമരുന്നുകള് ലഭ്യമാക്കുന്ന കേന്ദ്രസര്ക്കാരിന്റെ ജന് ഔഷധി സ്റ്റോറുകള്ക്ക് തുടക്കമായി. രാജ്യത്ത് ആയിരത്തോളം സ്റ്റോറുകളാണ് ആദ്യഘട്ടത്തില് ആരംഭിക്കുന്നത്. ദല്ഹി ഐഎംഎ ഹൗസില് ആരംഭിച്ച ആദ്യ സ്റ്റോറിന്റെ ഉദ്ഘാടനം കേന്ദ്രമന്ത്രി ഹന്സ്രാജ് ഗംഗാറാം ആഹിര് നിര്വഹിച്ചു. ഗുണമേന്മയുള്ള മരുന്നുകള് പൊതുജനങ്ങള്ക്ക് ലഭ്യമാക്കുന്ന ജന്ഔഷധി സ്റ്റോറുകളുടെ എണ്ണം ആഗസ്തിന് മുമ്പായി ആയിരം എണ്ണമായി ഉയര്ത്തുമെന്ന് മന്ത്രി പറഞ്ഞു.
രാജ്യത്തെ മുഴുവന് ജനങ്ങള്ക്കും മിതമായ നിരക്കില് മരുന്നുകള് ലഭ്യമാക്കുകയാണ് സംരംഭത്തിന്റെ ലക്ഷ്യം. ഇന്ത്യന് മെഡിക്കല് അസോസിയേഷന്റെ കേന്ദ്രങ്ങളിലെല്ലാം ജന്ഔഷധി കേന്ദ്രങ്ങള് ആരംഭിക്കാന് ഐഎംഎ സഹകരിക്കണമെന്നും ഡോക്ടര്മാര് ഗുണമേന്മയുള്ള സാധാരണ മരുന്നുകള് നിര്ദ്ദേശിക്കണമെന്നും മന്ത്രി ചടങ്ങില് അഭ്യര്ത്ഥിച്ചു.
ജന്ഔഷധി സ്റ്റോറുകളുടെ പേരുകള് മാറ്റുമെന്നും ബിഫാം എംഫാം പൂര്ത്തിയാക്കിയവര്ക്ക് തൊഴില് ലഭ്യമാക്കുന്ന രീതിയില് പുതുതായി ആവിഷ്ക്കരിക്കുമെന്നും മന്ത്രി പറഞ്ഞു.
കേന്ദ്രസര്ക്കാര് ഉദ്യമത്തെ പിന്തുണയ്ക്കുന്നതായി ഐഎംഎ സെക്രട്ടറി ഡോ. കെ. കെ. അഗര്വാള് പറഞ്ഞു. കുറഞ്ഞവിലയുള്ള ഗുണമേന്മയുള്ള മരുന്നുകളെ പ്രോത്സാഹിപ്പിക്കുമെന്നും എല്ലാ മെഡിക്കല് സ്റ്റോറുകളിലും ഇത്തരം മരുന്നുകള് ലഭ്യമാക്കാന് ശ്രമിക്കുമെന്നും ഡോ.അഗര്വാള് പറഞ്ഞു. ക്യാന്സര്, ഹൃദയ ശസ്ത്രക്രിയ എന്നിവയ്ക്കാവശ്യമായ വിലകൂടിയ മരുന്നുകളെക്കൂടി ജന് ഔഷധി പദ്ധതിയില് പെടുത്തി കുറഞ്ഞവിലയ്ക്ക് ലഭ്യമാക്കണെമെന്നും ഐഎംഎ സെക്രട്ടറി പറഞ്ഞു.
