”ഗൗണീഭക്തിയുടെ ഒന്പതാമത്തെ അംഗം ആത്മനിവേദനമാകുന്നു ആത്മാവിന്റെ നിവേദനം, ആത്മാവിനെ നിവേദിക്കുക എന്നാണ് ഇതിന്റെ സാമാന്യമായ അര്ത്ഥം സ്ഥൂലം, സൂക്ഷ്മം, കാരണം ഈ മൂന്നു ശരീരങ്ങളോടുകൂടിയ ചൈതന്യമാണ് ആത്മാവ്. അത് ഗൗണമെന്നും മുഖ്യമെന്നും രണ്ടുവിധത്തില് വ്യവഹരിക്കപ്പെടാറുണ്ട്. മമതയ്ക്ക് വിഷയമായ വസ്തു ഗൗണാത്മാവും അഹന്തയ്ക്കു വിഷയമായ വസ്തു മുഖ്യാത്മാവും ആണ്.
‘നിവേദിക്കുക’ എന്നതിന് സമര്പ്പിക്കുക എന്നാണ് ഇവിടുത്തെ അര്ത്ഥം. അതിനാല് മമതയ്ക്കു വിഷയമായ ഭാര്യാപുത്ര ധനാദികളേയും അഹന്തയ്ക്കു വിഷയമായ ദേഹേന്ദ്രിയാദികളേയും പരമപ്രേമാശ്രയമായ ഈശ്വരന്റെ സമാരാധനത്തിനുവേണ്ടി ഭക്തന് തനിയേതന്നെ സമര്പ്പിക്കുന്നതിന് ആത്മനിവേദനമെന്നു പറയാവുന്നതാണ്.
ഭക്തിസാധനകളില് ആത്മനിവേദനത്തിന് ഏറ്റവും മുഖ്യമായ ഒരു സ്ഥാനമുണ്ട്. സഗുണപരമേശ്വരന്റെ പാദാരവിന്ദങ്ങളില് താനും തനിക്കുള്ളതൊക്കെയും സമര്പ്പിക്കപ്പെടുമ്പോഴാണ് ഒരു മനുഷ്യന് യഥാര്ത്ഥ ഭക്തനായിത്തീരുന്നത്. ആ സമര്പ്പണത്തിനുള്ള പ്രേരക ശക്തി പരിശുദ്ധമായ പ്രേമമാകുന്നു. നിര്മ്മല പ്രേമം ശുദ്ധഹൃദയത്തില് മാത്രമേ സ്ഫുരിക്കാറുള്ളൂ.
ശ്രവണം, കീര്ത്തനം, സ്മരണം, പാദസേവനം അര്ച്ചനം, വന്ദനം ഈ സാധനകള് ശ്രദ്ധാപുരസ്സരം അനുഷ്ഠിച്ചാല് ഹൃദയമാലിന്യം നിശ്ശേഷം നീങ്ങി ഈശ്വരപ്രേമം ഉദ്ദീപിക്കുവാന് തുടങ്ങും. ആ പ്രേമോദ്ദീപനം പൂര്വ്വവാസനയനുസരിച്ച് ഭക്തനെ ഈശ്വരന്റെ ദാസ്യത്തിലോ സഖ്യത്തിലോ എത്തിക്കുന്നു. ദാസ്യഭക്തിയിലും സഖ്യഭക്തിയിലും ഈശ്വരസമര്പ്പണംകൂടിയുണ്ട്. പക്ഷേ മമതയ്ക്കു വിഷയമായ വസ്തുക്കളാണ് അവിടെ സമര്പ്പിക്കപ്പെടുന്നത്. അപ്പോഴും താന് ഈശ്വരന്റെ ദാസനാണെന്നും സഖാവാണെന്നും മറ്റുമുള്ള അഭിമാനം അവശേഷിക്കുന്നുണ്ട്. എന്നാല് ആത്മനിവേദനത്തില് ആ അഭിമാനംകൂടി ഈശ്വരനില് സമര്പ്പിച്ച് കൃതാര്ത്ഥനായിത്തീരുവാനാണ് ഭക്തന്റെ പരിശ്രമം.
അതിനാല് അഹന്തയ്ക്കു വിഷയമായ വസ്തുക്കളാണ് ആത്മനിവേദനത്തില് മുഖ്യമായും സമര്പ്പിക്കപ്പെടുന്നത് എന്നു സിദ്ധിക്കുന്നു.
തന്റേതല്ലാത്ത ദേഹാദിദൃശ്യവിഷയങ്ങളെ തന്റേതാണെന്നും താന് അവയുടെ ഉടമയാണെന്നും ഉള്ള അഭിമാനമാണ് ജീവനെ സംസാരചക്രത്തില് കറക്കിക്കൊണ്ടിരിക്കുന്ന മായികശക്തി. അത് ഉപേക്ഷിക്കുമ്പോള് മാത്രമേ ജീവന് ഈശ്വരനോട് ഐക്യപ്പെട്ടു സകലവിധ ബന്ധങ്ങളില്നിന്നും മുക്തനായിത്തീരുകയുള്ളൂ. അതിനുള്ള പ്രധാനമായ ഉപായമാണ് ആത്മനിവേദനം. അതില് പരമപ്രേമവും പൂര്ണത്യാഗവുമാണ് പ്രകാശിക്കുന്നത്. ആത്മനിവേദനത്തിന്റെ ഉത്തമമാതൃക മഹാബലിചക്രവര്ത്തിയുടെ ജീവിതത്തില് നമുക്ക് കാണാന് കഴിയും.
…. തുടരും
