കൊച്ചി: ഏപ്രില് 23നു മുഖ്യമന്ത്രിയുടെ ജനസമ്പര്ക്ക പരിപാടിക്കായി കാക്കനാട് കളക്ടറേറ്റ് അങ്കണത്തില് പൊതുമരാമത്ത് വകുപ്പ് 25,000 ചതുരശ്രയടി വിസ്തീര്ണമുള്ള പന്തല് ഒരുക്കുന്നു.
എല്ലാവിധ സൗകര്യങ്ങളോടു കൂടിയതായിരിക്കും പന്തല്. പന്തലിന്റെ നിര്മാണപുരോഗതി ഇന്നലെ ജില്ലാ കളക്ടര് എം.ജി. രാജമാണിക്യം, ജനസമ്പര്ക്ക പരിപാടിയുടെ നോഡല് ഓഫീസര് കൂടിയായ എഡിഎം ബി. രാമചന്ദ്രന്, ഹുസൂര് ശിരസ്തദാര്, പി.ആര്. രാധിക എന്നിവരും മറ്റ് ഉദ്യോഗസ്ഥരും വിലയിരുത്തി.
പ്ലോട്ട് എ, ബി എന്നിങ്ങനെ രണ്ടായി തിരിച്ചിട്ടുള്ള എ പ്ലോട്ടില് മുഖ്യമന്ത്രിക്കും മന്ത്രിമാര്ക്കുമുള്ള പ്രധാന സ്റ്റേജ്. ക്യാമറ പ്ലാറ്റ്ഫോം, മീഡിയ റൂം, ജില്ലാതല ഉദ്യോഗസ്ഥര്, കംമ്പ്യൂട്ടര് ഏരിയ തുടങ്ങിയവ ഒരുക്കും. മുഖ്യമന്ത്രിക്കു നേരിട്ടു പരാതി നല്കുന്ന നൂറുപേര്ക്ക് പ്ലോട്ട് എയില് പ്രത്യേക ഇരിപ്പിടമൊരുക്കും.
പ്രധാന പന്തലിനു വെളിയില് വടക്കുഭാഗത്ത് അടിയന്തര വൈദ്യസഹായം ഉള്പ്പെടെയുള്ള ചികിത്സാ സൗകര്യങ്ങള് ഒരുക്കുമെന്നും കളക്ടര് വ്യക്തമാക്കി. പ്രധാന സ്റ്റേജിനോടു ചേര്ന്നു വിവിഐപികള്ക്കായി പ്രത്യേക റൂം ഉണ്ടായിരിക്കും. വിവിധ ഭാഗങ്ങളില് നിന്നു പൊതുജനങ്ങള്ക്കു പന്തലിനുള്ളില് പ്രവേശിക്കാന് സൗകര്യമുണ്ടായിരിക്കും.
പൊതുജനങ്ങള്ക്കു ഭക്ഷണം കഴിക്കാന് സമീപമുള്ള ജില്ലാ പഞ്ചായത്തിന്റെ ഹാള് പ്രയോജനപ്പെടുത്താമെന്നും അപേക്ഷകരെ സഹായിക്കാനായി അക്ഷയയുടെ നേതൃത്വത്തിലുള്ള സംഘവും പൊതുജനങ്ങള്ക്കു കുടിവെള്ളം, ലഘുഭക്ഷണം എന്നിവയും ഉറപ്പുവരുത്തുമെന്നും അദ്ദേഹം കൂട്ടിച്ചേര്ത്തു. ജില്ലാ വ്യവസായ കേന്ദ്രത്തിനാണ് കുടിവെള്ള വിതരണത്തിന്റെ ചുമതല.
ക്ലീനിംഗ് ചുമതല തൃക്കാക്കര മുനിസിപ്പാലിറ്റിക്കും. നെഹ്റു യുവകേന്ദ്ര, റെഡ്ക്രോസ്, കുടുംബശ്രീ എന്നിവയുടെ വോളണ്ടിയര്മാര് സഹായത്തിനുണ്ടാകും. പ്ലാസ്റ്റിക് രഹിത ജനസമ്പര്ക്ക പരിപാടിയായിരിക്കും ഇക്കുറിയെന്നും പ്ലാസ്റ്റിക് വസ്തുക്കള് അലകഷ്യമായി വലിച്ചെറിയാന് അനുവദിക്കില്ലെന്നും ജില്ലാ കളക്ടര് അറിയിച്ചു. പന്തലും പരിസരവും മുഴുവന് സിസിടിവി നിരീക്ഷണത്തിലായിരിക്കും.
പരിപാടിയില് പങ്കെടുക്കാനെത്തുന്ന അപേക്ഷകര് ആധാര് കാര്ഡ്, തിരിച്ചറിയല് കാര്ഡ് എന്നിവയില് ഏതെങ്കിലും ഒന്നിന്റെ പകര്പ്പ് കൈവശം സൂക്ഷിച്ചിരിക്കണമെന്നു നോഡല് ഓഫീസര് എഡിഎം നിര്ദേശിച്ചു. മുഖ്യമന്ത്രിക്കുള്ള എല്ലാ അപേക്ഷകളിലും ബാര്കോഡ് സീല് ചെയ്യും. ഇതിന്റെ ഒരു പകര്പ്പും അക്നോളജ്മെന്റ് കാര്ഡും അപേക്ഷകനു നല്കും. ഇതുമായി വേണം മുഖ്യമന്ത്രിയെ കാണേണ്ടത്.
സീപോര്ട്ട് എയര്പോര്ട്ട് റോഡില് നിന്നായിരിക്കും പ്രധാന പ്രവേശന കവാടം. പൊതുജനങ്ങള് ഈ കവാടത്തിലൂടെ എത്തി പന്തലിനുള്ളിലെ മെറ്റല് ഡിറ്റക്ടറിലൂടെ പ്രവേശിക്കാനാകും.
