ചേര്ത്തല: കടയില് നാരങ്ങാവെള്ളം കുടിക്കാനെത്തിയയാള് മാല കവര്ന്നു. തണ്ണീര്മുക്കം പഞ്ചായത്ത് 22-ാം വാര്ഡ് ചാത്തോത്ത് ചിറയില് രാജപ്പന്റെ ഭാര്യ ഭൈമി രാജപ്പന്റെ മൂന്നരപ്പവന്റെ മാലയാണ് കടയില് വന്നയാള് കവര്ന്നത്. ചേര്ത്തല -തണ്ണീര്മുക്കം റോഡില് കാളികുളം ജങ്ഷന് കിഴക്കുവശമുള്ള ഇവരുടെ കടയില് കഴിഞ്ഞ ദിവസം പകല് പന്ത്രണ്ടരയോടെയായിരുന്നു സംഭവം. ബൈക്കിലെത്തിയ ആള് കടയ്ക്ക് സമീപം ബൈക്ക് വെച്ചശേഷം കടയിലെത്തി നാരങ്ങാവെള്ളം ആവശ്യപ്പെട്ടു. നാരങ്ങാ ഇല്ലെന്ന് പറഞ്ഞപ്പോള് കുടിക്കാന് വെള്ളം ചോദിച്ചു. തുടര്ന്ന് ഇയാള് മിഠായി ആവശ്യപ്പെട്ടപ്പോള് ഭൈമി മിഠായി കടയുടെ തട്ടില് വെയ്ക്കുന്നതിനിടെ മാലയും പൊട്ടിച്ച് ഇയാള് കടക്കുകയായിരുന്നു.
ഭൈമി നിലവിളിച്ചുകൊണ്ട് പുറകെ ഓടിയെങ്കിലും ഇയാള് ബൈക്കില് കയറി ഓടിച്ചു പോയി. 35 വയസു പ്രായം തോന്നിക്കുന്ന ഇയാള് ഹെല്മറ്റ് ഊരി കയ്യില് പിടിച്ചാണ് കടയില് എത്തിയത്. കടയില് ഭൈമി മാത്രമാണുണ്ടായിരുന്നത്. റോഡും വിജനമായിരുന്നു. ചേര്ത്തല പോലീസ് കേസെടുത്തു. രണ്ട് ദിവസം മുന്പാണ് സിപിഎം ചേര്ത്തല ഏരിയാക്കമ്മിറ്റി ഓഫീസിന് തെക്കുവശത്തെ റോഡില് നിന്ന് അദ്ധ്യാപികയുടെ നാല് പവന്റെ താലിമാല കവര്ന്നത്. ബൈക്കില് ഹെല്മറ്റ് ധരിച്ചെത്തിയ ആളാണ് മാല പൊട്ടിച്ചത്.
