ആലപ്പുഴ: ആലപ്പുഴ ബൈപാസിന്റെ നിര്‍മാണോദ്ഘാടനത്തിനു മുന്നോടിയായി ഏപ്രില്‍ അഞ്ചു മുതല്‍ വിപുലമായ പ്രചാരണ-സാംസ്‌കാരികപരിപാടികള്‍ സംഘടിപ്പിക്കുമെന്ന് സ്വാഗതസംഘം ചെയര്‍മാനായ കെ.സി. വേണുഗോപാല്‍ എംപി പറഞ്ഞു. നിര്‍മ്മാണോദ്ഘാടനവുമായി ബന്ധപ്പെട്ട് രൂപീകരിച്ച സ്വാഗതസംഘയോഗത്തില്‍ അദ്ധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.
ഏപ്രില്‍ 10ന് രാവിലെ 11ന് കേന്ദ്ര ഉപരിതലഗതാഗതമന്ത്രി നിതിന്‍ ഗഡ്കരിയാണ് ഉദ്ഘാടനം നിര്‍വഹിക്കുക. ചടങ്ങില്‍ മുഖ്യമന്ത്രി ഉമ്മന്‍ ചാണ്ടിയും മന്ത്രിമാരായ രമേശ് ചെന്നിത്തല, വി.കെ. ഇബ്രാഹിം കുഞ്ഞ് എന്നിവരും പങ്കെടുക്കും. ഇതിനു മുന്നോടിയായി ഏഴിന് വൈകിട്ട് 5.30ന് കളര്‍കോടു നിന്ന് കൊമ്മാടി വരെ ബൈക്ക് റാലിയും എട്ടിന് വൈകിട്ട് 5.30ന് നഗരം ചുറ്റി കൂട്ടയോട്ടവും നടത്തും. ഏപ്രില്‍ ഒമ്പത് ഉള്‍പ്പെടെ വിവിധ ദിവസങ്ങളില്‍ കലാപരിപാടികളും ഏപ്രില്‍ 10ന് രാവിലെ കളപ്പുരയില്‍ നിന്ന് ഘോഷയാത്രയും സംഘടിപ്പിക്കും. പോലീസിന്റെ ബാന്‍ഡ് മേളം, എസ്പിസിയുടെ 100 കേഡറ്റുകള്‍ പങ്കെടുക്കുന്ന പരിപാടി എന്നിവയുമുണ്ടാകും.
പ്രതികരിക്കാൻ ഇവിടെ എഴുതുക: