291. മഹാശക്തിഃ കുണ്ഡലിനീ- കുണ്ഡലിനി എന്ന മഹാശക്തി ഇതുമുതല് 389 വരെയുള്ള നാമങ്ങള് ദേവിയുടെ കുണ്ഡലിനിയുടെ രൂപത്തില് മൂകാംബികയെ സ്തുതിക്കുന്ന ഈ നാമങ്ങളുടെ അര്ത്ഥം ഉള്ക്കൊള്ളുന്നതിന് കുണ്ഡലിനീയോഗത്തെക്കുറിച്ച് സാമാന്യമായ അവബോധം ആവശ്യമാണ്. അത്യാവശ്യം അറിയേണ്ട ചില കാര്യങ്ങള് ഇവിടെ ചുരുക്കിപ്പറയുന്നു.
ബ്രഹ്മാണ്ഡത്തിന്റെ ശരിപ്പകര്പ്പാണ് മനുഷ്യശരീരം എന്നാണ് യോഗശാസ്ത്രജ്ഞരായ ഋഷിമാരുടെ അഭിപ്രായം. പഞ്ചഭൂതങ്ങളുടെ പിണ്ഡീഭവിച്ച രൂപമായതുകൊണ്ട് ‘പിണ്ഡാണ്ഡം’ എന്ന സാങ്കേതിക സംജ്ഞയാണ് തന്ത്രശാസ്ത്രം മനുഷ്യശരീരത്തെക്കുറിക്കാന് ഉപയോഗിക്കുന്നത്. ബ്രഹ്മാണ്ഡത്തിന്റെ പ്രവര്ത്തനശക്തിയായ പരാശക്തി പിണ്ഡത്തിന്റെ പ്രവര്ത്തനശക്തിയായി കുണ്ഡലിനീരൂപത്തില് വര്ത്തിക്കുന്നു. കുണ്ഡലിനി എന്ന പദത്തിന് വളഞ്ഞത് എന്നര്ത്ഥം.
മനുഷ്യശരീരത്തിനുള്ളില് ശരീരത്തെ നിവര്ത്തിനിറുത്തുന്ന ഒരു അസ്ഥിശൃംഖലയുണ്ട്. നട്ടെല്ല് എന്നു മലയാളത്തില് പറയും. നടുവില് ദ്വാരമുള്ള ഏതാനും അസ്ഥികള് ചേര്ന്നതാണ് അതിന്റെ രൂപം. ശരീരത്തിന്റെ പൃഷ്ഠഭാഗത്ത് അരക്കൂട്ടിലുള്ള എല്ലുകളില് തുടങ്ങി മുകളിലേയ്ക്കുയര്ന്ന് തലയോട്ടിന്റെ കീഴ്ഭാഗംവരെ എത്തുന്ന ഈ അസ്ഥി ഒട്ടൊക്കെ വളയത്തക്കവണ്ണമാണ് നിര്മ്മിച്ചിട്ടുള്ളത്. നട്ടെല്ലിനുള്ളില് സുഷുമ്ന, ഇഡ, പിംഗല എന്നു മൂന്നു നാഡികളുണ്ട്. ഇവയില് സുഷുമ്ന ശരീരപ്രവര്ത്തനത്തെ നിയന്ത്രിക്കുന്ന നാഡികളുടെ പ്രഭവസ്ഥാനമാണ്. ശരീരമാകെ വ്യാപിക്കുന്ന നാഡികള് സുഷുമ്നയിലെ ആറുബിന്ദുക്കളില് നിന്നു പുറപ്പെട്ട് ശാഖോപശാഖകളായി പിരിഞ്ഞ് ശരീരത്തിന്റെ എല്ലാഭാഗത്തും എത്തുന്നു.
ശരീരത്തിന്റെ എല്ലാഭാഗത്തുമുള്ള എല്ലാ അനുഭവങ്ങളും ഈ നാഡികള് തലച്ചോറിലേയ്ക്കു പകര്ന്നുകൊണ്ടിരിക്കും. ആ അനുഭവങ്ങളെ അപഗ്രഥിച്ച് ബുദ്ധി ആവശ്യം വേണ്ട നിര്ദ്ദേശങ്ങള് ബന്ധപ്പെട്ട അവയവങ്ങള്ക്കു നല്കികൊണ്ടിരിക്കും. ജാഗ്രത്തും സുഷുപ്തിയുമൊക്കെ ശരീരത്തിനുണ്ടെങ്കിലും നാഡീവ്യൂഹം എപ്പോഴും ഉണര്ന്നിരുന്ന് ശരീരത്തെ സംരക്ഷിക്കും. ശരീരമാകെ വ്യാപിക്കുന്ന നാഡികളെ ശരീരത്തില്നിന്നു പിരിഞ്ഞുപോകുന്നുവെന്നോ ശരീരത്തിന്റെ എല്ലാഭാഗത്തുമുള്ള നാഡികള് സുഷുമ്നയില് എത്തിച്ചേരുന്നുവെന്നോ പറയാം. നാഡികള് സുഷുമ്നയുമായി ചേരുന്ന ആറു കേന്ദ്രങ്ങളെ തന്ത്രശാസ്ത്രം ഷഢാധാരങ്ങള് എന്നുപറയും. നാഡികള് സുഷുമ്നയുമായി ചേരുന്ന ഭാഗങ്ങള് താമരപോലെയോ ചക്രംപോലെയോ ആണെന്ന സങ്കല്പത്തില് ഷഢാധാരങ്ങളെ ആധാരചക്രങ്ങളെന്നും ആധാരപദ്മങ്ങളെന്നും പറയും. ഇവയില് ഓരോന്നിനെക്കുറിച്ച് കൂടുതല് വിവരങ്ങള് തുടര്ന്നുള്ള നാമങ്ങളുടെ വ്യാഖ്യാനത്തില് പറയും.
തുടരും
