ജമ്മു കശ്മീരില് സത്യപ്രതിജ്ഞാ ചടങ്ങിനെത്തിയ പ്രധാനമന്ത്രി നരേന്ദ്ര മോദിയെ മുഖ്യമന്ത്രി മുഫ്തി മുഹമ്മദ് സെയ്ത് സ്വീകരിക്കുന്നു. ഗവര്ണര് എന്.എന്. വോറ സമീപം
ജമ്മു കശ്മീര് സഖ്യസര്ക്കാരിന്റെ പൊതുമിനിമം പരിപാടിയില് 15 സുപ്രധാന തീരുമാനങ്ങളാണുള്ളത്. പാക്കിസ്ഥാനില്നിന്ന് യുദ്ധകാലത്തു പലായനം ചെയ്തുവന്ന അഭയാര്ത്ഥികള്ക്കു സംരക്ഷണവും 370-ാം വകുപ്പു സംബന്ധിച്ചും സൈനികാധികാര നിയമക്കാര്യത്തിലും ഉള്പ്പെടെ ഒട്ടേറെ നിര്ണ്ണായക വ്യവസ്ഥകളാണ് ഇതില് ഉള്ളത്.
1. രാഷ്ട്രീയ-സാമ്പത്തിക ലക്ഷ്യം നേടുന്നതിന് സമാധാനപൂര്ണമായ സ്ഥിരവും സുനിശ്ചിതവുമായ ഭരണസാഹചര്യങ്ങള് ഉണ്ടാകേണ്ടതുണ്ട്.
2. സര്ക്കാര് പ്രതിജ്ഞാബദ്ധവും സുതാര്യവും സക്രിയവുമായ ‘സ്മാര്ട്ട് സര്ക്കാര്’ ആയിരിക്കും.
3. ഏറ്റവും അഴിമതി നിറഞ്ഞ സംസ്ഥാനം എന്ന ഇന്നത്തെ പദവിയില്നിന്ന് ഏറ്റവും ധാര്മ്മികമായതെന്ന പദവി നേടാന് പ്രവര്ത്തിക്കും.
4. സ്വന്തം സ്രോതസുകളും നൈപുണ്യവും സമൂഹവും കൈമുതലാക്കിയുള്ള സംസ്ഥാനത്തിന്റെ സാമ്പത്തിക ഘടനയ്ക്കനുഗുണമായി നയം രൂപവല്ക്കരിക്കും.
5. സാധ്യമായ സര്ക്കാര് സ്ഥാപനങ്ങള്ക്കെല്ലാം യുക്തമായ സ്വയംഭരണം നല്കും. അക്കൗണ്ടബിലിറ്റി കമ്മീഷനെയും വിജിലന്സ് കമ്മീഷനെയും ട്രാന്സ്പേരന്സി കമ്മീഷനും റൈറ്റ് റ്റു ഇന്ഫര്മേഷന് കമ്മീഷനുമാക്കി മാറ്റും.
6. മുമ്പ് വാജ്പേയി സര്ക്കാരിന്റെ കാലത്ത് ആവിഷ്കരിച്ച എല്ലാവര്ക്കും മാനുഷിക നീതിയെന്ന നയം പിന്തുടര്ന്ന് രാഷ്ട്രീയ കക്ഷികള് ഉള്പ്പെടെ ഏതു കാഴ്ചപ്പാടു പുലര്ത്തുന്നവരുമായും അര്ത്ഥവത്തായ ചര്ച്ചകള് നടത്തും, വഴിയൊരുക്കും. സംസ്ഥാനത്തെ പ്രശ്നങ്ങള്ക്കു പരിഹാരം കാണുന്നതിനുള്ള വിശാലമായ സമവായം തേടുകയാണിതിന്റെ ലക്ഷ്യം.
7. കേന്ദ്ര സര്ക്കാരിന്റെ പ്രത്യേക സൈനികാധികാര നിയമം (എഎഫ്എസ്പിഎ)യുടെ കാര്യത്തില് തീരുമാനം കൈക്കൊള്ളാന് സംസ്ഥാനത്തെ അസ്വസ്ഥബാധിത പ്രദേശങ്ങള് പരിശോധിച്ച് പുനര് നിശ്ചയിക്കും.
8. 370-ാം വകുപ്പ് നിലവിലുള്ളതുപോലെ തുടരും.
9. ഹുറിയത്തുപോലെയുള്ള എല്ലാ സംഘടനകളുമായി ചര്ച്ചകള് നടത്തും.
10. സുരക്ഷാ സേനയുടെ അധീനതയിലുള്ള, പ്രത്യേക സുരക്ഷാ പ്രശ്നമില്ലാത്തതും പാട്ടത്തിനോ, ലൈസന്സ് വ്യവസ്ഥയിലോ, ഭൂമി ഏറ്റെടുക്കല് നിയമപ്രകാരം ഏറ്റെടുത്തതുമായ ഭൂമിയോ കെട്ടിടങ്ങളോ അവകാശികള്ക്കു വിട്ടുകൊടുക്കും.
11. പാക്കധീന കശ്മീരില്നിന്ന് 1947, 1965, 1971 വര്ഷങ്ങളില് അഭയാര്ത്ഥികളായി വന്നവര്ക്ക് ഒറ്റത്തവണത്തേക്ക് ആനുകൂല്യം നല്കുന്ന സംവിധാനം നടപ്പാക്കും.
12. വെസ്റ്റ് പാക്കിസ്ഥാനില് നിന്നു വന്ന അഭയാര്ത്ഥികള്ക്ക് നിത്യജീവിതത്തിനുതകുന്ന മാര്ഗ്ഗങ്ങള് സര്ക്കാര് ലഭ്യമാക്കും.
13. അന്താരാഷ്ട്ര അതിര്ത്തിയില് താമസിക്കുന്നവര്ക്കുള്ള എല്ലാ ആനുകൂല്യങ്ങളും നിയന്ത്രണ രേഖയില് താമസിക്കുന്നവര്ക്കും ലഭ്യമാക്കും.
14. എന്എച്ച്പിസി വൈദ്യുത പദ്ധതികളില്നിന്നുള്ള ലാഭവിഹിതം സംസ്ഥാനത്തിനു പങ്കുവെക്കും.
15. എന്എച്ച്പിസിയുമായുള്ള എല്ലാ പ്രതിഫലക്കരാറുകളും പുനഃപരിശോധിക്കും.
