ശ്രീസൂത ഉവാച
ഇതി ശ്രുത്വാ പ്രസന്നാത്മാഃകാളിന്ദീമഭിവന്ദ്യതത്
കഥയാമാസുരാഗത്യവജ്രം പ്രതി പരീക്ഷിതം
വിഷ്ണുരാതസ്തുതച്ഛ്രുത്വാ പ്രസന്നസ്തദ്യുതസ്തദാ
തത്രൈവാഗത്യതത്സര്വംകാരയാമാസസത്വരം
ഗോവര്ദ്ധനാദദൂരേണവൃന്ദാരണ്യേസഖീസ്ഥലേ
പ്രവൃത്തഃകുസുമാംഭോധൗ കൃഷ്ണസങ്കീര്ത്തനോത്സവഃ
വൃഷഭാനുസുതാകാന്തവിഹാരേകീര്തനശ്രിയാ
സാക്ഷാദിവസമാവൃത്തേ സര്വേനന്യദൃശോഭവന്
തതഃ പശ്യത്സുസര്വേഷുതൃണഗുല്മലതാചയാത്
ആജഗാമോദ്ധവഃ സ്രഗ്വീശ്യാമഃ പീതാംബരാവൃതഃ
ഗുംഞ്ജമാലാധരോ ഗായന് വല്ലവീവല്ലഭംമുഹുഃ
തദാഗനമതോരേജേ ഭൃശംസങ്കീര്ത്തനോത്സവഃ
ചന്ദ്രികാമഗതോയദ്വത്സ്ഫാടികാട്ടാലഭൂമണിഃ
അഥസര്വേസുഖാംഭോധൗമഗ്നാഃസര്വംവിസസ്മരുഃ
ക്ഷണേനാഗതവിജ്ഞാനാദ്ദൃഷ്ട്വാ ശ്രീകൃഷ്ണരൂപിണം
ഉദ്ധവം പൂജയാഞ്ചക്രുഃ പ്രതിലബ്ധമനോരഥാഃ
സൂതന് പറഞ്ഞു: യമുനാദേവിയുടെ വാക്കുകള്കേട്ട് ശ്രീകൃഷ്ണപത്നിമാര് അതീവസന്തുഷ്ടരായി. അവര് യമുനാദേവിയെ വന്ദിച്ചശേഷം വേഗത്തില് പരീക്ഷിത്തിന്റേയും വജ്രനാഭന്റേയും സമീപത്തു ചെന്നുചേര്ന്നു. യമുനാദേവി പറഞ്ഞതെല്ലാം അവര് വജ്രനാഭനേയും പരീക്ഷിത്തിനേയും അറിയിച്ചു. മാതാക്കളുടെ വാക്കുകള്കേട്ട് സന്തുഷ്ടനായ പരീക്ഷിത് അവരോടും വജ്രനാഭനോടും ഒരുമിച്ച് യമുനാദേവി നിര്ദ്ദേശിച്ച സ്ഥലത്തെത്തി. സഖിമാരോടുകൂടി കൃഷ്ണരാധമാര് വിഹരിച്ചിരുന്ന ഗോവര്ദ്ധനപര്വതത്തിനുസമീപമുള്ള കുസുമസരോവരത്തില് എത്തിയ അവര് മഹത്തായ ഉത്സവം ആരംഭിച്ചു. വൃഷഭാനുപുത്രിയായ രധയുടെയും നന്ദാത്മജനായ കൃഷ്ണന്റേയും ആ ലീലാഭൂമി നാമസങ്കീര്ത്തനത്താല് മുഖരിതമായി. അവിടെയുള്ള സമസ്ത ഭക്തരും ഏകാഗ്രചിത്തരായിത്തീര്ന്നു. അവരുടെ മനസ്സും ദൃഷ്ടിയും എല്ലാം ഒരേ ലക്ഷ്യത്തിലെക്കായിരുന്നു. ഇതേസമയം അവിടെയുള്ള ലതകളില് നിന്നും പുഷ്പനികുഞ്ജങ്ങളില് നിന്നും ഉദ്ധവര് പ്രത്യക്ഷനായി അവരുടെ സമീപത്ത് എത്തിച്ചേര്ന്നു. ശ്യാമവര്ണ്ണമാര്ന്നവനും പീതാംബരം അണിഞ്ഞവനുമായ ഉദ്ധവരുടെ കഴുത്തില് വനമാല ശോഭിച്ചു. അദ്ദേഹത്തിന്റെ കണ്ഠത്തില് നിന്നും ശ്രീകൃഷ്ണഭഗവാന്റെ മധുരലീലകള് വര്ണ്ണിക്കുന്ന ഗാനങ്ങള് അവിടെ മുഴങ്ങി. ഉദ്ധവരുടെ ആഗമനത്തോടെ സങ്കീര്ത്തനോത്സവത്തിന്റെ ശോഭ പലമടങ്ങായി. എല്ലാവരും ആനന്ദസമുദ്രത്തില് നിമഗ്നരായി സ്വയംമറന്നു നിലകൊണ്ടു. കുറച്ചുസമയത്തിനുശേഷം ചേതന വീണ്ടെടുത്ത അവര് ഭഗവാന് ശ്രീകൃഷ്ണന്റെ സ്വരൂപത്തോടുകൂടിയവനായ ഉദ്ധവരെ കണ്ട് തങ്ങളുടെ മനോരഥം സാധിക്കുവാന് പോകുന്നുവല്ലോ എന്നുകരുതി സന്തുഷ്ടരായി. അവര് ആദരപൂര്വം ഉദ്ധവരെ പൂജിച്ചു.
ശ്രീസ്കന്ദമഹാപുരാണംവൈഷ്ണവഖണ്ഡം ശ്രീമദ് ഭാഗവതമാഹാത്മ്യത്തിലെ ഗോവര്ദ്ധനപര്വതസമീപത്തുവെച്ച് പരീക്ഷിദാദികള്ക്കുണ്ടായ ഉദ്ധവദര്ശനം എന്ന
രണ്ടാം അദ്ധ്യായം സമാപിച്ചു.
(തുടരും)
