കൊല്ലം: ദേശീയതയുടെ കവചമണിഞ്ഞ തൊഴിലാളിശക്തി കൊല്ലത്തെ കീഴടക്കി. ബിഎംഎസിന്റെ ജില്ലാസമ്മേളനഭാഗമായി നടന്ന തൊഴിലാളികളുടെ ശക്തിപ്രകടനം ഒരിക്കല്കൂടി ബിഎംഎസിന്റെ ഐക്യശക്തി ബോധ്യപ്പെടുത്തി.
ഇന്നലെ വൈകിട്ട് നാലിന് ആശ്രാമം മൈതാനിയില് എത്തിച്ചേര്ന്ന ആയിരങ്ങള് മേഖലാ അടിസ്ഥാനത്തിലുള്ള ബാനറിനുകീഴില് അണിനിരന്നു. പ്രകടനത്തിന് തുടക്കം കുറിച്ചുകൊണ്ട് മൈതാനിയില് 60 കതിന മുഴങ്ങി. കേരളീയ വേഷമണിഞ്ഞ 60 വനിതകള് വര്ണ്ണക്കുടകളുമേന്തി അണിനിരന്നു. തൊട്ടുപിന്നിലായി പഞ്ചവാദ്യങ്ങളും മറ്റ് വാദ്യഘോഷങ്ങളും തൊട്ടുപിന്നിലായി ജില്ലാ ബാനറിന്റെ പിറകില് ജില്ലാ‘ഭാരവാഹികള് അണിനിരന്നു. തുടര്ന്ന് മേഖലാടിസ്ഥാനത്തില് വിവിധ താലൂക്കില് നിന്നും വന്നിട്ടുള്ള പ്രവര്ത്തകര് അണിനിരന്നു.
പ്രകടനത്തില് വിവിധ നിശ്ചലദൃശ്യങ്ങളും നാടന് കലാരൂപങ്ങളും മേഖലാടിസ്ഥാനത്തില് എത്തിച്ചേര്ന്നു. പ്രകടനത്തിന് ജില്ലാഭാരവാഹികള് നേതൃത്വം നല്കി. തുടര്ന്ന് നടന്ന പൊതുസമ്മേളനം ബിഎംഎസ് സംസ്ഥാന ഡെപ്യൂട്ടി ജനറല് സെക്രട്ടറി എം.പി.രാജീവന് ഉദ്ഘാടനം ചെയ്തു. വിലക്കയറ്റം നിയന്ത്രിക്കാന് സംസ്ഥാന സര്ക്കാര് യാതൊരു ഇടപെടലും നടത്തുന്നില്ലെന്ന് അദ്ദേഹം പറഞ്ഞു.
അഴിമതിയില് മുങ്ങിക്കുളിച്ച ഒരു സര്ക്കാരാണ് കേരളം ഭരിച്ചുകൊണ്ടിരിക്കുന്നത്. തൊഴിലാളികളുടെ ക്ഷേമിനിധിയില് നിന്നും കോടികള് കൈയിട്ടു വാരിക്കൊണ്ടിരിക്കുന്ന ഈ സര്ക്കാര് തികച്ചും തൊഴിലാളി വിരുദ്ധ നടപടികളാണ് സ്വീകരിക്കുന്നത്. കൊല്ലം ജില്ലയിലെ പരമ്പരാഗത വ്യവസായമായ കശുവണ്ടി മേഖലയെ സംരക്ഷിക്കുന്നതിന് സംസ്ഥാന സര്ക്കാര് യാതൊരു നടപടിയും സ്വീകരിക്കുന്നില്ലെന്നും അദ്ദേഹം പറഞ്ഞു. ജില്ലാ പ്രസിഡന്റ് ബി.ശിവജി സുദര്ശന് അദ്ധ്യക്ഷത വഹിച്ചു. ജില്ലാ സെക്രട്ടറി റ്റി.രാജേന്ദ്രന് പിള്ള സ്വാഗതവും കെ.ശിവരാജന് നന്ദിയും പറഞ്ഞു.
ജില്ലാ സഹകരണ ബാങ്ക് ഓഡിറ്റോറിയത്തില് ഇന്നു രാവിലെ 9ന് നടക്കുന്ന പ്രതിനിധി സമ്മേളനം സംസ്ഥാന ജനറല് സെക്രട്ടറി എം.പി.ചന്ദ്രശേഖരന് ഉദ്ഘാടനം ചെയ്യും. ആര്എസ്എസ് സഹപ്രാന്തപ്രചാരക് കെ.വേണു പ്രഭാഷണം നടത്തും. സംസ്ഥാന സെക്രട്ടറി ജി.കെ.അജിത് സംഘടനാചര്ച്ച നയിക്കും. സംസ്ഥാന സെക്രട്ടറി സി.വി.രാജേഷ് സമാരോപ് പ്രഭാഷണം നടത്തും.
