ഇന്ദ്രിയ വിഷയങ്ങളുടെ പിന്നാലെപോകാനുള്ള പ്രവണത മനസ്സിന്റേതാണ്. ഈ പ്രവണത കാരണം സൃഷ്ടാവായ ജീവന് ദൃശ്യങ്ങളായ പ്രതിഭാസങ്ങളില് കുടുങ്ങിപ്പോകുന്നു. വിഷയസുഖങ്ങളില് ആസക്തമാകുന്നത് വിനാശത്തിനു കാരണമാണ്. അതിനാല് ജാഗ്രതയോടെ വര്ത്തിക്കുവിന്. നിങ്ങളുടെ മാനസിക പ്രവണതകളെ പ്രതേ്യകം ശ്രദ്ധിക്കുക. ബുദ്ധിചാപല്യങ്ങളെ പൗരുഷത്തോടെ തടയുക. പ്രലോഭനങ്ങളെ ചെറുക്കുക. നിസ്സംഗരായി വര്ത്തിക്കുക.
നിങ്ങള് എത്രകണ്ട് കൂടുതല് പ്രശാന്തചിത്തരും നിസ്സംഗരും പ്രയത്നശാലികളും പ്രത്യാഹാരപരരും അന്തര്ദശികളും ആകുന്നുവോ അത്രകണ്ട് കൂടുതല് ഈശ്വരചിന്താനിമഗ്നരാകും. സ്വധര്മ്മാനുഷ്ഠാനത്തില് കൂടുതല് പ്രാഗല്ഭ്യം നേടും. നിങ്ങളനുഭവിക്കുന്ന ശാന്തി അത്യധികം പ്രബുദ്ധമാകും.
പൂര്വജന്മങ്ങളിലെ പുണ്യങ്ങളുടെയും പാപകര്മ്മങ്ങളുടെയും പ്രതിഫലമെന്ന നിലയില് വൃത്തികള്ക്കുപരി വ്യത്തികള് മനസ്സിലുദിക്കും. ഈ വൃത്തികളാണ് നിങ്ങളുടെ ഈശ്വരാനേ്വഷണത്തിനു വിഘാതങ്ങള് സൃഷ്ടിക്കുന്നത്. താന് തന്നെയാണ് തനിക്ക് ശത്രു. സ്വധര്മ്മങ്ങളാകട്ടെ സമൂഹമാകട്ടെ വിഘാതമോ ശല്യമോ അല്ല. അതിനാല് മാനസികവൃത്തികളെ നിയന്ത്രിച്ച് സമ്പൂര്ണ ശ്രദ്ധയും ആസക്തിയും ഈശ്വരനില് കേന്ദ്രീകരിക്കുന്ന പ്രക്രിയയാണ് അഭ്യാസം.
കളകള് അകറ്റുമ്പോള് എങ്ങനെ ഇളം തൈകള്
ശക്തി പ്രാപിച്ച് സമൃദ്ധമായി വളരുന്നുവോ അതുപോലെ രോഗങ്ങളും വികാരങ്ങളുമാകുന്ന കളകളെ അഭ്യാസംകൊണ്ട് അകറ്റുമ്പോള് സ്മരണയാകുന്ന ഇളംചെടി കൂടുതല് ശക്തിയാര്ജ്ജിക്കുന്നു. ഭക്തിയായി വികസിക്കുന്നു. ജ്ഞാന കനികള് ഉല്പാദിപ്പിക്കുന്നു. നിങ്ങള്ക്കുവേണ്ടി ഉഴിഞ്ഞുവച്ചിട്ടുള്ള ധര്മ്മങ്ങളിലും ഈശ്വരചിന്തയിലുമല്ലാതെ നിങ്ങളുടെ ശ്രദ്ധ ചുറ്റുമുള്ള യാതൊന്നിലും യാതൊന്നുകൊണ്ടും വ്യതിചലിച്ച് സാധനാനുഷ്ഠാനത്തില് നിന്ന് പിന്തിരിയാന് ഇടവരരുത്. എപ്പോഴും സന്തോഷത്തോടും ദൃഢവിശ്വാസത്തോടുംകൂടി അഭ്യാസം ശീലിക്കണം. ഈശ്വരകാരുണ്യം ആര്ജ്ജിക്കുക.
നിഷ്ഠയില്നിന്നു വ്യതിചലിക്കാതെ ആചരിക്കുന്ന ജപവും ധ്യാനവും വ്രതാനുഷ്ഠാനങ്ങളും തീവ്രമായ സുഖഭോഗവിരക്തിയുമാണ് അനുഷ്ഠാനമെന്നുപറയുന്നത്. മനോനിയന്ത്രണത്തിനും ഏകാഗ്രതയുടെ വികാസത്തിനും ഭക്തിയുടെ വളര്ച്ചയ്ക്കും ബുദ്ധിപരമായ പക്വതയ്ക്കും അനുഷ്ഠാനം എത്രയും അനിവാര്യമാണ്.
ശ്രീ രമാദേവി
