ന്യൂദല്ഹി: നാനാത്വത്തില് ഏകത്വം എന്നത് നമ്മുടെ രാഷ്ട്രത്തിന്റെ ശക്തിയാണെന്നും അത് നമുക്ക് പ്രചോദനമേകുന്നതായും പ്രധാനമന്ത്രി നരേന്ദ്രമോദി.
ന്യൂദല്ഹിയില് നടന്ന എന്സിസി റാലിയില് സംസാരിക്കുകയായിരുന്നു മോദി. ഇവിടെ വനിതാ കേഡറ്റുകള് തിങ്ങി നിറഞ്ഞ് നില്ക്കുന്നതില് മോദി സന്തോഷം പ്രകടിപ്പിച്ചു. ഈ പരേഡ് സ്ത്രീ ശക്തിയുടെ പ്രതീകമാണെന്നും പ്രധാനമന്ത്രി പറഞ്ഞു.
ശക്തിമത്തായ രാഷ്ട്രത്തിന് എന്സിസിയുടെ പങ്ക് വളരെ വലുതാണെന്നും മോദി പറഞ്ഞു. നാനാത്വങ്ങളാല് മനോഹരവും ശക്തവുമാണ് നമ്മുടെ രാഷ്ട്രം. പ്രതിരോധമന്ത്രി മനോഹര് പരീക്കര്, സഹമന്ത്രി റാവു ഇന്ദ്രജിത്ത് സിങ്, വിദേശകാര്യമന്ത്രി സുഷമ സ്വരാജ്, ബിജെപി ദല്ഹി മുഖ്യമന്ത്രി സ്ഥാനാര്ത്ഥി കിരണ് ബേദി, ജയ ബച്ചന് എംപി എന്നിവര് എന്സിസി കേഡറ്റുകളായിരുന്നുവെന്നും പ്രധാനമന്ത്രി അനുസ്മരിച്ചു. താനൊരു എന്സിസി കേഡറ്റായിരുന്നുവെന്നും എന്നാല് ദല്ഹിയിലെത്തുവാന് സെലക്ഷന് കിട്ടിയിരുന്നില്ലായെന്നും മോദി പറഞ്ഞു. നമ്മുടെത് യുവത്വം തുളുമ്പുന്ന രാഷ്ട്രമാണ്. നമ്മുടെ സ്വപ്നങ്ങളും ശക്തിയും യുവത്വം നിറഞ്ഞതാണ്. കൂടുതല് പെണ്കുട്ടികള് എന്സിസിയില് ചേരണമെന്നും പ്രധാനമന്ത്രി പറഞ്ഞു.
