അറുതിയില്ലാതെ മയക്കുമരുന്ന് കടത്ത് ഒരു വര്‍ഷത്തിനിടെ കേസുകളുടെ എണ്ണം ഇരട്ടിയായി

ഇടുക്കി: സംസ്ഥാനത്ത് മയക്കുമരുന്ന് കേസുകള്‍ വര്‍ദ്ധിക്കുന്നതായി ക്രൈം റിക്കാര്‍ഡ്‌സ് ബ്യൂറോയുടെ പുതിയ റിപ്പോര്‍ട്ട്്. പിടിക്കപ്പെടുന്ന മയക്കുമരുന്ന് കേസുകളില്‍ തൊണ്ണൂറ് ശതമാനം കേസുകളിലെയും പ്രതികള്‍ക്ക് ശിക്ഷ ലഭി ക്കുന്നുണ്ടെങ്കിലും ലഹരി കടത്തിന് അറുതിയില്ല.

എക്‌സൈസും പോലീസും 2014-ല്‍ സംസ്ഥാനത്ത് പിടികൂടിയത് 1968 കേസുകളാണ്. കഞ്ചാവ്, ബ്രൗണ്‍ഷുഗര്‍, ബ്യൂപ്രിനോര്‍ഫിന്‍, ഹാഷിഷ് ഓയില്‍ എന്നിവയുമായി പിടികൂടിയ കേസുകളാണ് ഇവയെല്ലാം. അഞ്ച് വര്‍ഷം കൊണ്ട് മൂന്നിരട്ടിയോളമായി കേസ് വര്‍ദ്ധിച്ചിരിക്കുന്നു. 2010-ല്‍ 769 കേസുകളായിരുന്നു. പിന്നീട് ഓരോ വര്‍ഷവും കേസുകളുടെ എണ്ണം കുത്തനെ ഉയരുന്ന സഹചര്യമാണ്.

2011, 2012 കാലഘട്ടത്തില്‍ മാത്രമാണ് കേസുകള്‍ നാമമാത്രമായി കുറഞ്ഞത്. 2011-ല്‍ 693, 2012-ല്‍ 696, എന്നിങ്ങനെയായിരുന്നു കേസുകള്‍. 2013 ആയപ്പോഴേയ്‌ക്കും കേസുകള്‍ 974ലെത്തി. 2014-ല്‍ ഞെട്ടിപ്പിക്കുന്ന രീതിയിലായിരുന്നു കേസിന്റെ പോക്ക്.

1968 എന്ന നിലയില്‍ കേസുകളുടെ എണ്ണം മുന്‍ വര്‍ഷങ്ങളെക്കാള്‍ ഇരട്ടിയായി. സ്‌കൂള്‍, കോളേജ് തലങ്ങളില്‍ ലഹരിയുടെ ഉപയോഗം വര്‍ദ്ധിച്ചതാണ് കേസുകളുടെ എണ്ണം ഭയാനകമായ രീതിയില്‍ വര്‍ദ്ധിക്കാന്‍ കാരണമെന്നാണ് എക്‌സൈസ് വകുപ്പിലെയും പോലീസ് വകുപ്പിലെയും ഉന്നതര്‍ പറയുന്നത്.