പാരീസ്: പാരീസില്‍ മാധ്യമ സ്ഥാപനത്തില്‍ ഭീകരാക്രമണം നടത്തിയ മൂന്നംഗ സംഘത്തില്‍ ഒരാള്‍ കീഴടങ്ങി. ഹമീദ് മൊറാദാണ്(18) കീഴടങ്ങിയത്. ഫ്രഞ്ച് പോലീസിന് മുന്നിലാണ് ഇയാള്‍ കീഴടങ്ങിയത്. പാരീസില്‍ ജനിച്ചു വളര്‍ന്ന സഹോദരന്മാരായ സയിദും ഷെറീഫ് കൗവാച്ചിയും ഹമീദ് മൊറാദുമാണ് ആക്രമണം നടത്തിയതെന്ന് മാധ്യമസ്ഥാപനത്തിലുള്ളവര്‍ തിരിച്ചറിഞ്ഞിരുന്നു. ഇവരെക്കൂടാതെ ഒരാള്‍ കൂടി സംഘത്തില്‍ ഉണ്ടായിരുന്നു.
ഹമീദിന്റെ പേര് സോഷ്യല്‍ മീഡിയയില്‍ ചര്‍ച്ചയാകുന്നതായി ശ്രദ്ധയില്‍പ്പെട്ടതോടെ ബുധനാഴ്ച രാത്രി പതിനൊന്ന് മണിയോടെ ഇയാള്‍ സ്വയം പോലീസിന് മുന്നില്‍ കീഴടങ്ങുകയായയിരുന്നെന്ന് വാര്‍ത്താ ഏജന്‍സി ഹമീദിനെ അറസ്റ്റ് ചെയ്തതായും സ്ഥിരീകരിച്ചു. പ്രതികള്‍ക്ക് യെമനിലെ തീവ്രവാദ സംഘടനയുമായി ബന്ധമുണ്ടെന്ന് സംശയിക്കുന്നു. ചാര്‍ലി ഹെബ്‌ദോ എന്ന കാര്‍ട്ടൂണ്‍ മാസികയുടെ ഓഫീസില്‍ നടന്ന ആക്രമണത്തില്‍ 12 പേര് കൊല്ലപ്പെട്ടിരുന്നു.
ബുധനാഴ്ച വൈകിട്ട് നാല് മണിയോടെയാണ് ചാര്‍ലീ ഹെബ്‌ദോയുടെ ഓഫീസില്‍ സൈനിക വേഷവും മുഖം മൂടിയും ധരിച്ച് കയറിയ ഭീകരര്‍ എഡിറ്റോറിയല്‍ മീറ്റിഗ് നടക്കുന്ന മുറിയില്‍ കയറി തുരുതുരാ വെടി വയ്‌ക്കുകയായിരുന്നു. കഴിഞ്ഞ നാലുവര്‍ഷത്തിനിടെ ഫ്രാന്‍സില്‍ നടക്കുന്ന ഏറ്റവും വലിയ ഭീകരാക്രമണമാണിത്. ആക്രമണത്തെത്തുടര്‍ന്ന് ഫ്രാന്‍സ് സുപ്രധാന സ്ഥലങ്ങളിലെല്ലാം സുരക്ഷ ശക്തമാക്കി. ജാഗ്രതാ നിര്‍ദേശം നല്‍കി. സ്ഥിതിഗതികള്‍ വിലയിരുത്താന്‍ ഉന്നത ഉദ്യോഗസ്ഥരുടെ യോഗം ചേര്‍ന്നു.
ആക്രമണത്തിന്റെ പശ്ചാത്തലത്തില്‍ ജാഗ്രത പുലര്‍ത്തണമെന്ന് ഫ്രാന്‍സിലെ മാധ്യമസ്ഥാപനങ്ങള്‍ക്ക് പോലീസ് നിര്‍ദ്ദേശം നല്‍കിയിട്ടുണ്ട്.
