ജക്കാര്‍ത്ത: ജാവ കടലിടുക്കില്‍ തകര്‍ന്നുവീണ എയര്‍ ഏഷ്യാ വിമാനത്തിന്റെ വാല്‍ഭാഗം കണ്ടെത്തിയതായി ഇന്തോനേഷ്യന്‍ അധികൃതര്‍ സ്ഥിരീകരിച്ചു. അപകടത്തെക്കുറിച്ചുള്ള നിര്‍ണായക വിവരങ്ങള്‍ അടങ്ങുന്ന ബ്ലാക്ക് ബോക്‌സ്, ഡാറ്റാ റെക്കോര്‍ഡര്‍ തുടങ്ങിയവ പിന്‍ഭാഗത്താണുള്ളത്.
ഡിസംബര്‍ 28നാണ് ക്യൂഇസഡ് 8501 എയര്‍ ഏഷ്യാ വിമാനം ജാവ കടലിടുക്ക് മേഖലയില്‍ വച്ച് റഡാറില്‍ നിന്നും അപ്രത്യക്ഷമായത്. സുരബായയില്‍ നിന്നും സിംഗപ്പൂരിലേക്ക് പോവുകയായിരുന്നു വിമാനം. അപകടത്തില്‍പ്പെട്ട് കടലില്‍ വീണ വിമാനത്തില്‍ 162 പേരാണ് ഉണ്ടായിരുന്നത്. കടലില്‍ തുടര്‍ന്നുവരുന്ന തെരച്ചിലില്‍ 40 മൃതദേഹങ്ങളാണ് ഇതുവരെ കണ്ടെത്തിയിട്ടുള്ളത്. കൂടുതല്‍ മൃതദേഹങ്ങള്‍ വിമാനത്തിന്റെ മധ്യഭാഗത്തായിരിക്കാമെന്നാണ് രക്ഷാപ്രവര്‍ത്തകരുടെ പ്രതീക്ഷ.
അതേസമയം വാലറ്റം കണ്ടെത്തിയതിനാല്‍ അപകടകാരണം കണ്ടെത്താന്‍ അന്വേഷണ ഏജന്‍സിക്ക് ഏറെ സഹായകമാകും. എന്നാല്‍ വിമാനത്തിന്റെ ബ്ലാക്ക് ബോക്‌സ് ഇതുവരെ കണ്ടെത്താനായില്ല. തെരച്ചില്‍ ആരംഭിച്ച് പത്ത് ദിവസം കഴിഞ്ഞിട്ടും ബ്ലാക്ക് ബോക്‌സ് കണ്ടെത്താനാകാത്തത് ദുരൂഹത വര്‍ദ്ധിപ്പിക്കുകയാണ്. മോശം കാലാവസ്ഥയെ തുടര്‍ന്ന് കടല്‍ പ്രക്ഷുബ്ധമാകുന്നതും തെരച്ചിലിന് തടസ്സം സൃഷ്ട്ടിക്കുന്നുണ്ട്. വിവിധ രാജ്യങ്ങളില്‍ നിന്നുള്ള 89 മുങ്ങല്‍ വിദഗ്ധരാണ് തെരച്ചില്‍ സംഘത്തിലുള്ളത്.
കടലിന്റെ അടിത്തട്ടില്‍ വിമാനത്തിന്റെ വാല്‍ഭാഗം കണ്ടെത്തിയെങ്കിലും ഇതുവരെ അത് വീണ്ടെടുക്കാന്‍ കഴിഞ്ഞിട്ടില്ലെന്ന് ഇന്തോനേഷ്യന്‍ സുരക്ഷാ ഏജന്‍സി തലവന്‍ ബാംബാങ് സോലിസ്‌റ്റ്യോ അറിയിച്ചു. തെരച്ചില്‍ കൂടുതല്‍ സ്ഥലങ്ങളിലേയ്‌ക്ക് വ്യാപിപ്പിച്ചതായും അദ്ദേഹം അറിയിച്ചു. 12 വസ്തുക്കളാണ് ഇതുവരെ കണ്ടെത്തിയത്. എന്നാല്‍ എല്ലാം വിമാനത്തിന്റെ ഭാഗമാണെന്ന് പറയാനാവില്ലെന്നും അദ്ദേഹം പറഞ്ഞു. അതേസമയം, അമേരിക്ക, ചൈന എന്നിവിടങ്ങളില്‍ നിന്നും കൂടുതല്‍ കപ്പലുകള്‍ തെരച്ചിലില്‍ പങ്കുചേര്‍ന്നിട്ടുണ്ട്. ദുരന്തത്തില്‍ മരിച്ചവരുടെ ബന്ധുക്കള്‍ക്ക് വിമാനം തകര്‍ന്ന സ്ഥലത്തേയ്‌ക്ക് പോകാനും, പൂക്കള്‍ അര്‍പ്പിക്കാനുമുള്ള സൗകര്യം പിന്നീട് ഒരുക്കുമെന്നും സോലിസ്‌റ്റ്യോ പറഞ്ഞു.
അപകടം നടന്ന് പത്ത് ദിവസം കഴിഞ്ഞിട്ടും വിമാനം കണ്ടെത്താന്‍ കഴിയാതിരുന്നതിനെക്കുറിച്ച് വിമര്‍ശനം ഉയര്‍ന്നിരുന്നു. അതിനിടെ ഇന്തോനേഷ്യന്‍ ഗതാഗത മന്ത്രാലയം എയര്‍ ഏഷ്യയുടെ സുരബായ സിംഗപ്പൂര്‍ ലൈസന്‍സ് സസ്‌പെന്‍ഡ് ചെയ്തു. അതേസമയം അന്വേഷണവുമായി പൂര്‍ണ്ണമായും സഹകരിക്കുന്നുണ്ടെന്ന് എയര്‍ ഏഷ്യാ അധികൃതര്‍ വ്യക്തമാക്കി. അപകടത്തെതുടര്‍ന്ന് ഇന്തോനേഷ്യ വിമാന സര്‍വ്വീസ് റൂളുകള്‍ കര്‍ക്കശമാക്കിയിട്ടുണ്ട്.
