സിഡ്നി: പ്രാദേശിക മത്സരത്തിനിടെ പന്ത് തലയില് കൊണ്ട് ആസ്ട്രേലിയന് ബാറ്റ്സ്മാന് ഫിലിപ്പ് ഹ്യുഗ്സിന്റെ നില അതീവ ഗുരുതരമെന്ന് റിപ്പോര്ട്ടുകള്.
ന്യൂ സൗത്ത് വെയ്ല്സും സൗത്ത് ഓസ്ട്രേലിയയും തമ്മിലുള്ള ഷീല്ഡ് മത്സരത്തിനിടെയാണ് സംഭവം.
പേസ് ബൗളര് സീന് അബോട്ട് എറിഞ്ഞ ബൗണ്സറില് നിന്ന് ഒഴിഞ്ഞു മാറുന്നതിനിടെ പന്ത് കഴുത്തിനു മുകളില് ശക്തിയായി വന്നിടിക്കുകയായിരുന്നു. പന്ത് ഇടിച്ചതിന്റെ ആഘാതത്തില് പിച്ചില് തളര്ന്നിരുന്ന ഹ്യൂഗ്സ് ഒരു നിമിഷത്തിനുള്ളില് തന്നെ വീണുപോയി. ഹെല്മറ്റ് ധരിച്ചിരുന്നെങ്കിലും പന്ത് കഴുത്തെല്ലില് കൊള്ളുകയായിരുന്നു.
പന്ത് തലയില് കൊണ്ടതിന് പിന്നാലെ മെഡിക്കല് സംഘം ഹ്യൂഗ്സിന് പ്രാഥമിക ശുശ്രൂഷ നല്കുകയും പിന്നീട് ഹ്യൂഗ്സിനെ ഹെലികോപട്റില് സെന്റ് വിന്സന്റ് ആശുപത്രിയില് പ്രവേശിപ്പിക്കുകയും ചെയ്തു.
സംഭവത്തെ തുടര്ന്ന് മത്സരം നിര്ത്തിവെച്ചു. അടിയന്തര ശസ്ത്രക്രിയയ്ക്ക് വിധേയനാക്കിയെങ്കിലും ഹ്യൂഗ്സിന്റെ ആരോഗ്യനില അതീവ ഗുരുതരമായി തുടരുകയാണെന്ന് മാദ്ധ്യമങ്ങള് റിപ്പോര്ട്ട് ചെയ്തു. 48 മണിക്കൂറിന് ശേഷം മാത്രമെ എന്തെങ്കിലും പറയാനാവു എന്നാണ് ഡോക്ടര്മാര് അറിയിച്ചത്. അപകടം നടന്ന മത്സരത്തില് 63 റണ്സ് എടുത്ത് നില്ക്കുകയായിരുന്നു ഹ്യൂഗ്സ്.
ഇന്ത്യയ്ക്കെതിരായ ആദ്യ ടെസ്റ്റിനുള്ള ആസ്ട്രേലിയന് ടീമിലേയ്ക്ക് വിളി പ്രതീക്ഷിച്ചിരിക്കുമ്പോഴാണ് ഹ്യൂഗ്സിന് പരിക്കേറ്റത്. ക്യാപ്റ്റന് മൈക്കിള് ക്ലാര്ക്കിന്റെ പരിക്കാണ് ഹ്യൂസിന് സാധ്യത കല്പ്പിച്ചിരുന്നത്.
2009-ല് ആസ്ട്രേലിയന് ടീമിലെത്തിയ 25-കാരനായ ഹ്യുഗ്സ 26 ടെസ്റ്റുകളില് നിന്ന് 1,535 റണ്സ് നേടിയിട്ടുണ്ട്
