ഇറ്റാവ: അനിഷേധ്യതയുടെ പുതിയ അധ്യായം രചിച്ച് കേരളത്തിന്റെ കായിക കൗമാരം ഇറ്റാവയോടു വിടപറഞ്ഞു. കൊടുങ്കാറ്റിലും ഉലയാത്ത അഗ്നി സ്ഫുലിംഗങ്ങളാണ് തങ്ങളെന്ന വാക്യം വരച്ചിട്ട്… ഉത്തര്പ്രദേശിന്റെ മണ്ണിലെ പുല്നാമ്പുകള്ക്ക് എന്നെന്നും ഓര്ത്തുവയ്ക്കാന് ഒരു വീരഗാഥ നല്കിയുള്ള മടക്കയാത്ര… ആ യാത്രയില് അഭിമാനത്തിന്റെ ഒരു കനകകിരീടം കൂടെ അവര് നമുക്കായി കൈയിലേന്തിയിട്ടുണ്ട്.
എതിരാളികളെ കാതങ്ങള് പിന്തള്ളി ദേശീയ സ്കൂള് അത്ലറ്റിക് മീറ്റില് തുടര്ച്ചയായ 16-ാം തവണയും കേരളം കിരീടം ചൂടി. 33 സ്വര്ണ്ണവും 26 വെള്ളിയും 17 വെങ്കലവുമടക്കം 293 പോയിന്റ്നേടിയാണ് മലയാളത്തിന്റെ പൊന്താരകങ്ങള് ചരിത്രം സൃഷ്ടിച്ചത്. അവസാന ദിവസമായ ഇന്നലെ 7 സ്വര്ണ്ണവും മൂന്ന് വെള്ളിയും ഒരു വെങ്കലവും കേരളത്തിന്റെ അക്കൗണ്ടിലെത്തി.
ഉജ്വലമായിരുന്ന മുലായത്തിന്റെ… അഖിലേഷിന്റെ…. അധികാര പ്രദേശത്തില് കൗമാര കായിക കേരളത്തിന്റെ ഏകാധിപത്യം.
മെഡല്വേട്ടയുടെ കാര്യത്തില് കഴിഞ്ഞവര്ഷത്തെ പ്രകടനത്തെ നമ്മുടെ കുട്ടികള് കടത്തിവെട്ടി. 2012-ല് ലുധിയാനയില് 29 സ്വര്ണ്ണവും 25 വെള്ളിയും 15 വെങ്കലവുമടക്കം 262 പോയിന്റായിരുന്നു കേരളത്തിന്റെ സമ്പാദ്യം.
ഇത്തവണ ആദ്യ രണ്ട് ദിനങ്ങളിലും ട്രാക്കിലും ഫീല്ഡിലും തിരിച്ചടി നേരിട്ട കേരളം മൂന്നാം ദിനം മുതല് പടയോട്ടം ആരംഭിക്കുകയായിരുന്നു. രണ്ടാം സ്ഥാനം സ്വന്തമാക്കിയ മഹാരാഷ്ട്രക്ക് 11 സ്വര്ണ്ണമടക്കം 111 പോയിന്റ് നേടാനേ കഴിഞ്ഞുള്ളൂ.
2010-ല് അമൃത്സറില് 28 സ്വര്ണമെഡലുകളോടെ ചാമ്പ്യന്പട്ടം നേടിയ കേരളം 2011-ല് പൂനെയില് സ്വ ര്ണ്ണനേട്ടം നാല്പ്പതായി ഉയര്ത്തിയിരുന്നു.
മുന് വര്ഷങ്ങളില് പഞ്ചാബ്, ഹരിയാന എന്നീ സംസ്ഥാനങ്ങളില് നിന്നുണ്ടായിരുന്ന ശക്തമായ മത്സരം ഇക്കുറി നേരിടേണ്ടി വന്നില്ല എന്നതും കേരളത്തിന്റെ കുതിപ്പിന് ഗുണകരമായി.
സുവര്ണ്ണ താരം പാലക്കാട് മുണ്ടൂര് എച്ച്എസ്എസിലെ പി.യു. ചിത്ര നാലാം സ്വര്ണ്ണം നേടിയതിലൂടെയാണ് അവസാന ദിനം കേരളം മെഡല് വേട്ട തുടങ്ങിയത്. സീനിയര് പെണ്കുട്ടികളുടെ ക്രോസ് കണ്ട്രിയിലായിരുന്നു ഇത്തവണ ചിത്രയുടെ സ്വര്ണവേട്ട.
ജൂനിയര് ആണ്കുട്ടികളുടെ 800 മീറ്ററില് പാലക്കാട് പറളി എച്ച്എസിലെ മുഹമ്മദ് അഫ്സല് ദേശീയ റെക്കോര്ഡോടെ രണ്ടാം സ്വര്ണ്ണം നേടിയതും കേരള ക്യാമ്പിലെ സ ന്തോഷം ഇരട്ടിപ്പിച്ചു.
1 മിനിറ്റ് 54 സെക്കന്റില് അഫ്സല് ഓടിയെത്തിയപ്പോള് 1990ല് മഹാരാഷ്ട്രയുടെ മോനിഷ് ശുകാല് നേടിയ റെക്കോര്ഡ് (1 മിനിറ്റ് 55 സെക്കന്റ)് പഴങ്കഥ.
ജൂനിയര് പെണ്കുട്ടികളുടെ 200 മീറ്ററില് കോഴിക്കോട് പൂവമ്പായി എഎംഎച്ച്എസിലെ ഷഹര്ബാന സിദ്ദിഖും സീനിയര് ആണ്കുട്ടികളുടെ 200 മീറ്ററില് പാലക്കാട് കുമരംപുത്തൂര് കെഎച്ച്എസിലെ മുഹമ്മദ് ഷെര്ഷാദും സ്വര്ണ്ണം നേടി.
സബ് ജൂനിയര് പെണ്കുട്ടികളുടെ 200 മീറ്ററില് പൂവമ്പായി എഎംഎച്ച്എസിലെ കെ. സ്നേഹ വെള്ളി ഉറപ്പിച്ചു.
സീനിയര് പെണ്കുട്ടികളുടെ 800 മീറ്ററില് പൂവമ്പായി എഎംഎച്ച്എസിലെ ജെസി ജോസഫിനാണ് സ്വര്ണ്ണം. സീനിയര് ആണ്കുട്ടികളുടെ 800 മീറ്ററില് പാലക്കാട് കുമരംപുത്തൂര് കെഎച്ച്എസിലെ ലിജോ മാണി വെള്ളിമെഡല് സ്വന്തമാക്കി.
ജൂനിയര് പെണ്കുട്ടികളുടെ 800 മീറ്ററില് കുമരംപുത്തൂര് കെഎച്ച്എസിലെ ബബിത വെള്ളിയും കോഴിക്കോട് പുല്ലൂരാംപാറ സെന്റ് ജോസഫ് എച്ച്എസിലെ തെരേസ് ജോസഫ് വെങ്കലവും നേടി. സീനിയര് വിഭാഗം 4ഃ400 മീറ്റര് റിലേയിലെ രണ്ട് സ്വര്ണ്ണവും കേരളം സ്വന്തമാക്കി.
സീനിയര് പെണ്കുട്ടികളില് പി.യു. ചിത്രയും ജൂനിയര് ആണ്കുട്ടികളുടെ വിഭാഗത്തില് മുഹമ്മദ് അഫ്സലും വ്യക്തിഗത ചാമ്പ്യന്മാരായി. ഇരുവര്ക്കും യുപി സര്ക്കാര് സമ്മാനിക്കുന്ന നാനോ കാര് ലഭിക്കും.
മത്സരിച്ച നാല് ഇനങ്ങളിലും സ്വര്ണ്ണം സ്വന്തമാക്കിയ ചിത്ര അക്ഷരാര്ഥത്തില് മേളയിലെ താരമായി. ക്രോസ് കണ്ട്രിക്കു പുറമെ 3000 മീറ്റര്, 5000 മീറ്റര്, 1500 മീറ്റര് എന്നിവയിലും ചിത്ര സ്വര്ണ്ണനേട്ടം കുറിച്ചിരുന്നു. ഇതില് 5000 മീറ്ററിലും 1500 മീറ്ററിലും പുതിയ റെക്കോര്ഡും എഴുതിച്ചേര്ത്തു.
m
മുഹമ്മദ് അഫ്സല് രണ്ട് സ്വര്ണ്ണവും ഒരു വെള്ളിയും നേടി. 800 മീറ്ററിനു പുറമെ 3000 മീറ്ററിലും കനകപ്പതക്കം അഫ്സല് കഴുത്തില് ചാര്ത്തിയപ്പോള് 1500 മീറ്ററിലെ വെള്ളിയും നേട്ടത്തിന്റെ തിളക്കമേറ്റി.
