കേരളം കിരീടത്തിലേക്ക്‌

ചെന്നൈ: 53-ാ‍മത്‌ അന്തര്‍ സംസ്ഥാന അത്ലറ്റിക്‌ മീറ്റിന്റെ മൂന്നാം ദിവസം ഒരു ദേശീയ റെക്കോര്‍ഡും ഒരു മീറ്റ്‌ റെക്കോര്‍ഡും പിറന്നു. വനിതകളുടെ 3000 മീറ്റര്‍ സ്റ്റീപ്പിള്‍ ചെയ്സില്‍ സുധാസിംഗാണ്‌ പുതിയ ദേശീയ റെക്കോര്‍ഡ്‌ സ്ഥാപിച്ചത്‌. പുരുഷന്മാരുടെ 4ഃ100 മീറ്റര്‍ റിലേയില്‍ കേരള പുരുഷന്മാര്‍ പുതിയ മീറ്റ്‌ റെക്കോര്‍ഡ്‌ സ്വന്തമാക്കി. ആദ്യ ദിവസം ലോംഗ്ജമ്പില്‍ സ്വര്‍ണ്ണം നേടിയ മലയാളി താരം മയൂഖ ജോണി ഇന്നലെ ട്രിപ്പിള്‍ ജമ്പിലും ഒന്നാമതെത്തി ഇരട്ട സ്വര്‍ണ്ണത്തിന്‌ അവകാശിയായി. പുരുഷവിഭാഗം ഹൈജമ്പില്‍ ജിതിന്‍ സി. തോമസ്‌ സ്വര്‍ണ്ണം കരസ്ഥമാക്കി. വനിതകളുടെ 4ഃ100 മീറ്റര്‍ റിലേയിലും കേരളതാരങ്ങള്‍ സ്വര്‍ണ്ണം നേടി.

മൂന്നാം ദിവസത്തെ മത്സരങ്ങള്‍ സമാപിക്കുമ്പോള്‍ കേരളം കിരീടത്തിലേക്ക്‌ കുതിക്കുകയാണ്‌. 130.5 പോയിന്റാണ്‌ കേരളത്തിനുള്ളത്‌. രണ്ടാം സ്ഥാനത്തുള്ള തമിഴ്‌നാടിന്‌ 100.5 പോയിന്റും മൂന്നാം സ്ഥാനത്തുള്ള ഹരിയാനക്ക്‌ 84.5 പോയിന്റുമാണുള്ളത്‌. പുരുഷവിഭാഗത്തില്‍ 57 പോയിന്റുള്ള ഹരിയാനയാണ്‌ ഒന്നാമത്‌. 47 പോയിന്റുള്ള കേരളം മൂന്നാം സ്ഥാനത്താണ്‌. വനിതാ വിഭാഗത്തില്‍ രണ്ടാം സ്ഥാനത്തുള്ള തമിഴ്‌നാടിനെ (43.5 പോയിന്റ്‌) ഏറെ പിന്നിലാക്കിയാണ്‌ കേരളം കുതിക്കുന്നത്‌. 83.5 പോയിന്റാണ്‌ കേരളം സ്വന്തമാക്കിയിട്ടുള്ളത്‌.

ഉത്തര്‍പ്രദേശ്‌ താരമായ സുധാസിംഗ്‌ 9 മിനിറ്റ്‌ 45.6 സെക്കന്റില്‍ ഫിനിഷ്‌ ചെയ്താണ്‌ വനിതകളുടെ 3000 മീറ്റര്‍ സ്റ്റീപ്പിള്‍ചെയ്സില്‍ പുതിയ ദേശീയ റെക്കോര്‍ഡോടെ സ്വര്‍ണ്ണം കരസ്ഥമാക്കിയത്‌. തന്റെ തന്നെ പേരിലുള്ള 9 മിനിറ്റ്‌ 47.7 സെക്കന്റിന്റെ റെക്കോര്‍ഡാണ്‌ സുധ പഴങ്കഥയാക്കിയത്‌.

പുരുഷന്മാരുടെ 4ഃ100 മീറ്റര്‍ റിലേയില്‍ 40.49 സെക്കന്റില്‍ ഫിനിഷ്‌ ചെയ്താണ്‌ കേരളം പുതിയ മീറ്റ്‌ റെക്കോര്‍ഡ്‌ സ്ഥാപിച്ചത്‌. അനുരൂപ്‌ ജോണ്‍, കെ.ജി. രഞ്ജിത്ത്‌, ഷമീര്‍ മോന്‍, രാഹുല്‍ ജി. പിള്ള എന്നിവരാണ്‌ കേരളത്തിന്‌ വേണ്ടി അണിനിരന്നത്‌. 2009-ല്‍ കേരളം തന്നെ സ്ഥാപിച്ച 40.5 സെക്കന്റിന്റെ റെക്കോര്‍ഡാണ്‌ തിരുത്തിയത്‌. തമിഴ്‌നാട്‌ വെള്ളിയുംണ്‍ പഞ്ചാബ്‌ വെങ്കലവും കരസ്ഥമാക്കി. വനിതാ വിഭാഗത്തില്‍ 46.77 സെക്കന്റില്‍ ഫിനിഷ്‌ ചെയ്താണ്‌ നീതു രാജന്‍, സിനി. എസ്‌., പി.കെ. പ്രിയ, മെര്‍ലിന്‍ കെ. ജോസഫ്‌ എന്നിവരടങ്ങിയ കേരളം സ്വര്‍ണ്ണം നേടിയത്‌. പശ്ചിമബംഗാള്‍ വെള്ളിയും തമിഴ്‌നാട്‌ വെങ്കലവും കരസ്ഥമാക്കി.

വനിതകളുടെ ട്രിപ്പിള്‍ജമ്പില്‍ 13.58 മീറ്റര്‍ ചാടിയാണ്‌ മയൂഖ ജോണി സ്വര്‍ണ്ണം കരസ്ഥമാക്കിയത്‌. വെള്ളിയും വെങ്കലവും മലയാളി താരങ്ങള്‍ക്കാണ്‌. കേരളത്തിന്‌ വേണ്ടി ഇറങ്ങിയ എന്‍.വി. ഷീന വെള്ളിയും ഛത്തീസ്ഗഡിന്റെ മലയാളി താരം അമിത ബേബി വെങ്കലവും നേടി. പുരുഷന്മാരുടെ ഹൈജമ്പില്‍ കേരളതാരങ്ങള്‍ സ്വര്‍ണ്ണവും വെങ്കലവും കരസ്ഥമാക്കി. 2.17 മീറ്റര്‍ ചാടി ജിതിന്‍ സി. തോമസ്‌ സ്വര്‍ണ്ണം കരസ്ഥമാക്കിയപ്പോള്‍ സ്കൂള്‍ ഗെയിംസ്‌ ഹീറോ ശ്രീനിത്‌ മോഹന്‍ 2.09 മീറ്റര്‍ ചാടി വെങ്കലം കരസ്ഥമാക്കി. മീറ്റിന്റെ അവസാനദിവസമായ ഇന്ന്‌ 13 ഫൈനലുകളാണ്‌ നടക്കുക.