ന്യൂദല്ഹി: ഇന്ത്യന് ഗുസ്തിയിലെ സുവര്ണ കാലമാണിത്. ഒളിംപിക് മെഡല്നേട്ടങ്ങളിലൂടെ രാജ്യത്തിന്റെ യശസേറ്റിയ മല്ലന്മാര് ഇത്തവണ ഇതാ ലോകകപ്പ് യോഗ്യതയും ഉറപ്പിച്ചിരിക്കുന്നു. ഹംഗേറിയന് തലസ്ഥാനമായ ബുധാപെസ്റ്റ് ആതിഥ്യം വഹിക്കുന്ന ലോക ചാമ്പ്യന്ഷിപ്പിലെ ഫ്രീ സ്റ്റെയില് വിഭാഗത്തില് ആറാം സ്ഥാനവുമായാണ് ഇന്ത്യന് പുരുഷ ടീം ചരിത്രത്തിലാദ്യമായി ലോകകപ്പ് ഗുസ്തിക്ക് അര്ഹത നേടിയത്. ലോക ചാമ്പ്യന്ഷിപ്പില് ആദ്യ എട്ടു സ്ഥാനങ്ങളില് എത്തുന്നവര് ലോകകപ്പിന് നേരിട്ട് യോഗ്യനേടുമെന്നതാണ് നിയമം.
ഉശിരന് ഫലങ്ങളുമായി ഇന്ത്യ ലോകകപ്പ് ടിക്കറ്റ് സ്വന്തമാക്കുകയായിരുന്നു. 55 കിലോഗ്രാം വിഭാഗത്തില് അമിത് കുമാര് ദാഹിയ വെള്ളിയും 60 കിലോഗ്രാമില് ബജ്രംഗ് കുമാര് വെങ്കലവും നേടി. ഇതോടെ 23 പോയിന്റുമായി ഇറാന്, റഷ്യ, ജോര്ജിയ, ഉക്രൈന്, അമേരിക്ക എന്നിവര്ക്കു പിന്നില് നിലയുറപ്പിക്കാന് ഇന്ത്യയ്ക്കായി.
ഒളിംപിക്സില് ഗുസ്തിയുടെ പ്രാതിനിധ്യം ഉറിപ്പിക്കാന് നടത്തിയ ശ്രമങ്ങള് വിജയംകണ്ടതിനു പിന്നാലെയുള്ള ലോകകപ്പ് പ്രവേശം രാജ്യത്തിന് അഭിമാനകരമായി. ‘മറ്റൊരു സന്തോഷ വാര്ത്ത. ലോക നിലവാരം കാത്തുസൂക്ഷിക്കാന് താരങ്ങള്ക്കു കഴിഞ്ഞു. ഗ്രീക്കോ- റോമന്, വനിതാ വിഭാഗങ്ങളിലെ ലോകകപ്പ് പ്രതീക്ഷകള്ക്ക് വരുംദിവസങ്ങളില് ഉത്തരം ലഭിക്കും, മുഖ്യ പരിശീലകന് വിനോദ് കുമാര് പറഞ്ഞു. പുരുഷ വിഭാഗത്തില് ഇതാദ്യമായാണ് ഇന്ത്യ ഇത്രയും ഉയര്ന്ന സ്ഥാനം നേടുന്നത്. 2009ല് പത്താമതും 2010ല് 13-ാമതേക്കും പിന്തള്ളപ്പെട്ടു. 2011ലാകട്ടെ 31-ാം സ്ഥാനത്തേക്കു മൂക്കുകുത്തുകയും ചെയ്തിരുന്നു.
