കൊച്ചി: സംസ്ഥാന സ്കൂള് അത്ലറ്റിക് മീറ്റിന്റെ മൂന്നാംദിവസം ദേശീയ റെക്കോര്ഡ് മറികടന്നിട്ടും ഉഷ സ്കൂളിന്റെ ജെസ്സി ജോസഫിന് സ്വര്ണ മെഡല് നേട്ടത്തിന്റെ മധുരം നുണയാനായിരുന്നില്ല. 1500 മീറ്ററിലെ വാശിയേറിയ പോരാട്ടത്തിനൊടുവില് പാലക്കാടിന്റെ പി.യു. ചിത്രയ്ക്ക് പിന്നില് വെള്ളി കൊണ്ട് തൃപ്തിപ്പെടാനായിരുന്നു ജെസിയുടെ വിധി. അതില് താരത്തിന് ഒത്തിരി നൊമ്പരവുമുണ്ടായിരുന്നു. എന്നാല് അവസാന ദിനം ജെസി കണക്കുതീര്ത്തു, ഉജ്ജ്വല പ്രകടനത്തോടെ 800 മീറ്ററില് സ്വര്ണ്ണം സ്വന്തമാക്കി വിജയച്ചിരിയുമായി മടങ്ങി. അങ്ങനെ കോഴിക്കോട് പൂവമ്പായി എഎംഎച്ച്എസ്എസിലെ പ്ലസ്ടു വിദ്യാര്ത്ഥിനി കൂടിയായ ജെസി സംസ്ഥാന സ്കൂള് മീറ്റ് കരിയറിനു അഭിമാനാര്ഹമായ വിടവാങ്ങല് കുറിപ്പെഴുതി.
2 മിനിറ്റ് 07.01 സെക്കന്റില് ജെസി ഫിനിഷ് ചെയ്തപ്പോള് 2009ല് കേരളത്തിന്റെ ചിഞ്ചു ജോസ് സ്ഥാപിച്ച ദേശീയറെക്കോര്ഡ് തുടച്ചു നീക്കപ്പെട്ടു.
കഴിഞ്ഞവര്ഷത്തെ തിരുവനന്തപുരം മീറ്റില് താന് തന്നെ സ്ഥാപിച്ച 2 മിനിറ്റ് 09.39 സെക്കന്റിന്റെ മീറ്റ് റെക്കോര്ഡ് തിരശീലയ്ക്കു പിന്നിലാക്കാനും ജെസിക്കായി. വെള്ളി മെഡല് നേടിയ കോഴിക്കോട് പുല്ലൂരാംപാറ സെന്റ് ജോസഫ് എച്ച്എസിലെ തെരേസ ജോസഫില് നിന്ന് കനത്ത വെല്ലുവിളിയാണ് നേരിട്ടതെന്ന് ജെസി പറഞ്ഞു.കടുത്ത മത്സരമായതിനാലാണ് മികച്ച പ്രകടനം നടത്താനാന് കഴിഞ്ഞതെന്നും ജെസി പറഞ്ഞു. തെരേസയും നിലവിലെ ദേശീയ-മീറ്റ് റെക്കോര്ഡുകള് ഭേദിച്ചു. ജെസി മികച്ച പ്രകടനമാണ് നടത്തിയതെന്ന് കോച്ച് പി.ടി. ഉഷ പറഞ്ഞു.
കഴിഞ്ഞ ലോക ജൂനിയര് മീറ്റിനും ഏഷ്യന് ജൂനിയര് മീറ്റിനും യോഗ്യത നേടിയ ഏക മലയാളിതാരം കൂടിയാണ് ജെസി. സാഫ് ജൂനിയര് മീറ്റിലെ റെക്കോര്ഡ് സ്വര്ണമാണ് ജെസിക്ക് അപൂര്വമായ ആ നേട്ടങ്ങള് സമ്മാനിച്ചത്. ആറുവര്ഷം സംസ്ഥാന മീറ്റില് മത്സരിച്ച ജെസി ഇതുവരെ അഞ്ച് തവണ സ്വര്ണം സ്വന്തമാക്കിയിട്ടുണ്ട്. മലപ്പുറം ജില്ലയിലെ നിലമ്പൂര് പോത്തുകല്ല് പുത്തന്പുരയ്ക്കല് ജോസഫിന്റെയും സുജയുടെയും മകളാണ്.
ജനുവരിയില് റാഞ്ചിയില് നടക്കുന്ന ദേശീയ മീറ്റിലും റെക്കോര്ഡ് സ്വര്ണ്ണം നേടി സ്കൂള് കരിയര് അവസാനിപ്പിക്കാനാണ് ജെസി ലക്ഷ്യമിടുന്നത്. തുടര്ന്നും ഉഷ സ്കൂള് ഓഫ് അത്ലറ്റിക്സില് പരിശീലിക്കും. ഇതിനടുത്ത കോളേജില് പ്രവേശനം നേടി പി.ടി. ഉഷയ്ക്കൊപ്പം തുടരുമെന്ന് ജെസി കൂട്ടിച്ചേര്ത്തു.
