കോട്ടയം: കാലവര്ഷത്തിനൊപ്പം വീശിയടിച്ച കാറ്റില് കനത്ത നാശം. മണര്കാട്, അയര്കുന്നം, അരീപ്പറമ്പ് മേഖലകളിലാണ് കാറ്റ് നാശം വിതച്ചത്. ഒരു വീട് പൂര്ണമായും മറ്റൊരു വീട് ഭാഗികമായും നശിച്ചു. മരം കടപുഴകിയാണ് വീടുകള്ക്ക് നാശം സംഭവിച്ചത്. കാര്ഷിക വിളകള്ക്കും നാശം സംഭവിച്ചു.
മണര്കാട് പഞ്ചായത്തില് അരീപ്പറമ്പ് ചിറകരോട്ട് സി. കെ ബാലചന്ദ്രന്റെ വീടാണ് പൂര്ണമായി നശിച്ചത്. ഇന്നലെ ഉച്ചയ്ക്ക് 2.30നാണ് അപകടം സംഭവിച്ചത്. വീടിനോടു ചേര്ന്നു നിന്ന തേക്ക് മരം കടപുഴകി വീഴുകയായിരുന്നു. വീടിന്റെ മേല്ക്കൂരയും ഒരു മുറിയും പൂര്ണമായി നശിച്ചിട്ടുണ്ട്. ആലപ്പുറത്ത് വിജയന്റെ വീടിനു നാശം സംഭവിച്ചു. വീടിനു സമീപത്തെ പ്ലാവിന്റെ ശിഖരം ഒടിഞ്ഞു വീണാണ് നാശം സംഭവിച്ചത്.
കൂടാതെ ഈ പ്രദേശത്തെ കാര്ഷിക വിളകള്ക്കും നാശം സംഭവിച്ചു. റബര്, തെങ്ങ്, വാഴ തുടങ്ങിയ വിളകളാണ് നശിച്ചത്. അയര്കുന്നം ചാമക്കാലായില് ജോസഫിന്റെ 25 റബര് മരങ്ങള് കടപുഴകി വീണു. തേക്ക് മരങ്ങള്ക്കും നാശം സംഭവിച്ചിട്ടുണ്ട്. കഴിഞ്ഞ നാല് ദിവസങ്ങളായി ഉച്ചയ്ക്ക് ശേഷമാണ് ശക്തിയേറിയ കാറ്റ് വീശുന്നത്.
