കൊച്ചി: ജില്ലയിലെ മുഴുവന് ഹോട്ടലുകളിലും ശുചിത്വമുളള ടോയ്ലറ്റ് നിര്ബന്ധമാക്കുമെന്ന് ജില്ല പഞ്ചായത്ത് പ്രസിഡന്റ് അധ്യക്ഷതയില് ചേര്ന്ന യോഗത്തില് തീരുമാനം. ആരോഗ്യവകുപ്പ് പ്രവര്ത്തന അവലോകന യോഗത്തിലാണ് തീരുമാനമെടുത്തത്. ചെറിയ ചായകടകളെ ഇതില് നിന്നും ഒഴിവാക്കിട്ടുണ്ട്. ഈ വര്ഷം ഒക്ടോബര് മുതല് വൃത്തിയുളള ടോയ്ലറ്റ് സംവിധാനം ഒരുക്കാത്ത ഹോട്ടലുകള്ക്കെതിരെ നടപടി സ്വീകരിക്കും.
കഴിഞ്ഞ വര്ഷത്തെ അപേക്ഷിച്ച് ഈ വര്ഷം ജില്ലയില് എലിപ്പനി ഉള്പ്പെടെയുളള ജലജന്യരോഗങ്ങളില് ഗണ്യമായ കുറവുണ്ടായതായി അഡീഷണല് ജില്ല മെഡിക്കല് ഓഫീസര് ഡോ.സുഹിത അവതരിപ്പിച്ച റിപ്പോര്ട്ട് വ്യക്തമാക്കി. ആരോഗ്യവകുപ്പ് ആവിഷ്കരിച്ച് നടപ്പിലാക്കുന്ന വിവിധ പദ്ധതികള്ക്ക് ജനപ്രതിനിധികളുടെ ഭാഗത്തുനിന്നുള്ള സജീവ പിന്തുണ ലഭിക്കുന്നതായി ഡോ.സുഹിത അഭിപ്രായപ്പെട്ടു.
‘മഴമേഘങ്ങളില് പതറാതെ’ എന്നതാണ് ഈ വര്ഷം ആരോഗ്യവകുപ്പ് ആവിഷ്കരിച്ചിരിക്കുന്ന കര്മ്മപദ്ധതിയുടെ പേര്. പകര്ച്ച വ്യാധികള് തടയുന്നതിന്റെ ഭാഗമായി ഭക്ഷണം പാചകം ചെയ്ത് വിതരണം ചെയ്യുന്ന എല്ല കേന്ദ്രങ്ങളിലും പരിശോധന നടത്തും. എല്ലാ വെളളിയാഴ്ചയും മുഴുവന് പഞ്ചായത്തുകളിലും ഹെല്ത്ത് ഇന്സ്പെക്ടര്മാരുടെ കീഴില് പരിശോധന നടത്തണമെന്നും യോഗത്തില് നിര്ദേശമുണ്ട്.
മഞ്ഞപ്പിത്തത്തിനെതിരെ ജില്ലയില് നടപ്പിലാക്കിയ ഓപ്പറേഷന് ഹോട്ട് വാട്ടര് വിജയകരമായിരുന്നെന്ന് ജില്ല റൂറല് ഹെല്ത്ത് ഓഫീസര് പി.എന്.ശ്രീനിവാസന് പറഞ്ഞു. പരിശോധനയുടെ ഫലമായി കഴിഞ്ഞ വര്ഷം 34 ഹോട്ടലുകള് അടപ്പിച്ചു. 400 കുടിവെള്ള ലോറികള് പരിശോധിച്ചതില് ഏഴ് എണ്ണത്തിനെതിരെ നടപടി സ്വീകരിച്ചു. ഹെപ്പിറ്റെറ്റിസ് ബി തടയുന്നതിനായി ബാര്ബര് ഷോപ്പുകളില് ആരോഗ്യവകുപ്പ് നടത്തിയ പരിശോധനകളും വിജയപ്രദമായിരുന്നെന്ന് അദ്ദേഹം അഭിപ്രായപ്പെട്ടു. ജില്ലയില് ആരോഗ്യവകുപ്പ് മികച്ച പ്രവര്ത്തനമാണ് കാഴ്ചവെക്കുന്നതെന്ന് ജില്ലാ പഞ്ചായത്ത് പ്രസിഡന്റ് എല്ദോസ് കുന്നപ്പിളളി അഭിപ്രായപ്പെട്ടു.
