കൊച്ചി: മനസ്സിനെ ശുദ്ധീകരിക്കുകയും ഈശ്വരോന്മുഖമാക്കുകയും ചെയ്യുന്ന മഹനീയ കാവ്യമാണ് രാമായണം. കാവ്യമാധുര്യവും തത്ത്വോപദേശവും ആഹ്ലാദകരമായി സമ്മേളിക്കുന്ന അദ്ധ്യാത്മരാമായണം പാരായണം ചെയ്യുന്നത് മാനവഹൃദയങ്ങളില് ഉല്കൃഷ്ടത ഉയര്ത്തുമെന്ന് പ്രൊഫ. എം.കെ. സാനു അഭിപ്രായപ്പെട്ടു.
കലൂര് പാവക്കുളം മഹാദേവ ക്ഷേത്രത്തില് വിശ്വഹിന്ദുപരിഷത്തിന്റെ ആഭിമുഖ്യത്തില് നടന്ന രാമായണമാസാചരണത്തില് സംസാരിക്കുകയായിരുന്നു. ജസ്റ്റിസ് എം. രാമചന്ദ്രന് ഉദ്ഘാടനം നിര്വഹിച്ചു. രാമന് ഭാരതത്തിലെ ഏറ്റവും ആദരണീയനായ ഭരണകര്ത്താവും മാതൃകാപുരുഷനുമാണ്. ഒരു വ്യക്തിക്ക് വിശാലമായ സമൂഹത്തോടുള്ള കടമയും കര്ത്തവ്യവും രാമകഥ നമുക്ക് കാട്ടിത്തരുന്നു. രാമായണപാരായണം കൂടുതല് വ്യാപകമാക്കുകയും യുവതലമുറയില് രാമകഥാസന്ദേശം എത്തിക്കുകയും ചെയ്യണമെന്ന് അദ്ദേഹം ആഹ്വാനം ചെയ്തു. ചടങ്ങില് വിശിഷ്ടാതിഥിയായി പങ്കെടുത്ത ഇന്കംടാക്സ് കമ്മീഷണര് (അപ്പീല്സ്), കേരളം, വാത്മീകിയും വേദവ്യാസനുമാണ് ഭാരതം ജന്മം നല്കിയ ഏറ്റവും മഹത്വ്യക്തികളെന്ന് അഭിപ്രായപ്പെട്ടു. ഭാരതം ലോകത്തിന് നല്കിയ ഏറ്റവും മഹത്ഗ്രന്ഥങ്ങളില് ഒന്നാണ് രാമായണം.
വിഎച്ച്പി ജില്ലാ പ്രസിഡന്റ്എസ്.ജെ.ആര്. കുമാര് അധ്യക്ഷത വഹിച്ച ചടങ്ങില് ജില്ലാ സെക്രട്ടറി എസ്. സജി, പാവക്കുളം മഹാദേവക്ഷേത്രം പ്രസിഡന്റ് കെ.എ.എസ്. പണിക്കര്, വിഎച്ച്പി വിഭാഗ് സെക്രട്ടറി എന്.ആര്. സുധാകരന്, എ.ടി. സന്തോഷ്, പത്മ രാജശേഖരന് എന്നിവര് സംസാരിച്ചു.
രാവിലെ നടന്ന രാമായണപാരായണ മത്സരത്തില് വിജയികളായ നാരായണന് നമ്പൂതിരി, ശിഖാ സുരേന്ദ്രന്, ഗിരിജ ഗംഗാധരന്, ഇന്ദിര എന്നിവര്ക്ക് പ്രസന്ന ബാഹുലേയന്, കെ.പി. മാധവന്കുട്ടി, ശൈലേന്ദ്രന്, എസ്. രാജേന്ദ്രന്, അജിത് കുമാര് എന്നിവര് സമ്മാനദാനം നിര്വഹിച്ചു. തൃപ്പൂണിത്തുറ ശ്രീകുമാര്, എം. ശ്രീകുമാര് കലൂര് എന്നീ ആചാര്യന്മാരെ കിഷോര്ബാബു, ഉണ്ണികൃഷ്ണന് എന്നിവര് ആദരിച്ചു. അയ്മനം രവീന്ദ്രന് രാമായണഗീതം ആലപിച്ചു.
