പാലാ: യുവമോര്ച്ചാ പാലാ നിയോജകമണ്ഡലം പ്രസിഡന്റ് മഹേഷ്ചന്ദ്രന്റെ വീട് അക്രമിച്ച സംഭവത്തില് പോലീസ് അന്വേഷണം എങ്ങുമെത്തിയില്ല. പ്രതികളെ കണ്ടെത്താന് ശാസ്ത്രീയമായ അന്വേഷണമാര്ഗ്ഗമാണ് സ്വീകരിച്ചിരിക്കുന്നതെന്ന് കേസന്വേഷിക്കുന്ന പാലാ എസ്.ഐ തോംസണ് ആവര്ത്തിച്ചു. എന്നാല് ഇത് സംബന്ധിച്ച സൂചനകളൊന്നും ലഭിച്ചിട്ടില്ലെന്നും അദ്ദേഹം പറഞ്ഞു.
ചൊവ്വാഴ്ച രാത്രി രണ്ടുമണിയോടെയാണ് രണ്ട് വാഹനങ്ങളിലായി എത്തിയ പത്തോളം പേര് ചേര്ന്ന് മഹേഷിന്റെ അച്ഛന് രാമചന്ദ്രന് നായരെ മര്ദ്ദിക്കുകയും വീട് അക്രമിക്കുകയും ചെയ്തത്. വീട്ടുപകരണങ്ങള് തകര്ക്കുകയും വീടിന് സാരമായ കേസ് വരുത്തുകയും ചെയ്തശേഷം ഭീഷണി മുഴക്കിയാണ് സംഘം സ്ഥലം വിട്ടത്. സംഭവം നടക്കുമ്പോള് മഹേഷിന്റെ അച്ഛനും അമ്മയും സഹോദരനും മാത്രമേ വീട്ടിലുണ്ടായിരുന്നുള്ളു. അക്രമികള് അയലത്തെ വീടിനുനേരെയും അക്രമം നടത്തി.
മുത്തോലി പഞ്ചായത്തിന്റെ വിവിധ ഭാഗങ്ങളില് നിന്നായി നിരവധി പേര് സിപിഎമ്മും പോഷകസംഘടനകളും വിട്ട് ബിജെപി, യുവമോര്ച്ച, ബിഎംഎസ് സംഘടനകളില് ചേര്ന്നിരുന്നു. പഞ്ചായത്തില് സിപിഎമ്മിന്റെ അടിത്തറയിളക്കുന്നതരത്തില് നടന്നുകൊണ്ടിരിക്കുന്ന കൊഴിഞ്ഞുപോക്ക് തടയുന്നതിനായി നടത്തിയ ആസൂത്രണമാണ് വീട് കയറി നടത്തിയ അക്രമത്തിന് പിന്നിലെന്നാണ് സൂചന. വീടാക്രമിച്ച സംഭവത്തില് രാഷ്ട്രീയ ഇടപെടലുണ്ടോയെന്ന വിവരവും അന്വേഷിക്കുമെന്ന് പോലീസ് പറഞ്ഞു.
