പാലാ: പാലായില് സിപിഎം, ഡിവൈഎഫ്ഐ ഗുണ്ടകള് പരക്കെ ആക്രമണം അഴിച്ചുവിട്ടു. ചൊവ്വാഴ്ച പകലും രാത്രിയിലുമായ നടന്ന ആക്രമണങ്ങളില് ബിഎംഎസ്, ബിജെപി, യുവമോര്ച്ച പ്രവര്ത്തകര്ക്ക് പരിക്കേറ്റു. സിപിഎം, ഡിവൈഎഫ്ഐ, സിഐറ്റിയു സംഘടനകളില്നിന്നും നിരവധി പ്രവര്ത്തകര് ബിജെപി, യുവമോര്ച്ച, ബിഎംഎസ് പ്രസ്ഥാനങ്ങളിലേക്ക് മാറുന്നത് തടയുന്നതിനുള്ള ആസൂത്രിത ശ്രമമാണ് വ്യാപകമായി ആക്രമത്തിന് പിന്നിലെന്ന് കരുതുന്നു.
ചൊവ്വാഴ്ച രാത്രി രണ്ടുമണിയോടെ വീട്ടുകയറി നടത്തിയ ആക്രമണത്തില് യുവമോര്ച്ച പാലാ നിയോജകമണ്ഡലം പ്രസിഡന്റ് മഹേഷ് ചന്ദ്രന്റെ വീട് തകര്ന്നു. വീടിനു മുന്വശത്തും വശങ്ങളിലുമുള്ള ജനല് പാളികള് പൂര്ണ്ണമായും തകര്ന്നു. മുന്വശത്തെ വാതില്, വൈദ്യുതി മീറ്റര് എന്നിവയും തകര്ത്ത് അക്രമികള് മുറ്റത്തെ ചെടികളും വെട്ടിനശിപ്പിച്ചു. രണ്ടു വണ്ടികളിലായി പത്തോളം പേരാണ് ആക്രമത്തിന് നേതൃത്വം വഹിച്ചത്. മഹേഷിന്റെ വീടിന്റെ സമീപത്തെ മുണ്ടുവേലിപ്പറമ്പില് ശ്രീകുമാറിന്റെ വീടിനുനേരെയും ആക്രമണമുണ്ടായി. ഈ വിടിന്റെയും ജനല് പാളികള് തകര്ത്തു.
കട്ടപ്പനയില് എയ്ഡഡ് സ്കൂള് ജീവനക്കാരനായ മഹേഷ് സംഭവം നടക്കുമ്പോള് വീട്ടിലില്ലായിരുന്നു. അച്ചന് രാമചന്ദ്രന്നായര്, അമ്മ മായ, ഇളയ സഹോദരന് മനേഷ് (കണ്ണന്) എന്നിവരായിരുന്നു വീട്ടിലുണ്ടായിരുന്നത്. വീടിനു മുന്നില് വണ്ടികള് വന്നു നില്ക്കുന്ന ശബ്ദം കേട്ട് ഇറങ്ങിചെന്ന് വിവരമന്വേഷിച്ച രാമചന്ദ്രന് നായരോട് വാഹനത്തിന്റെ പെട്രോള്തീര്ന്നുപോയതിനാല് നിര്ത്തിയതാണെന്നാണ് ആദ്യം പറഞ്ഞത്. പെട്രോളെടുക്കാന് കുപ്പിതരാമെന്നു പറഞ്ഞു വീട്ടിലേക്ക് തിരിഞ്ഞു നടപ്പോള് ഇത് മഹേഷിന്റെ വീടല്ലേ എന്നന്വേഷിക്കുകയും അതെയെന്ന് പറഞ്ഞപ്പോള് രണ്ട് പേര് ചേര്ന്ന് പിടിച്ചു നിര്ത്തി മര്ദ്ദിച്ചു. പിടിവിടുവിപ്പിച്ച് വീട്ടിലേക്കോടിക്കയറി വാതിലടച്ചു രക്ഷപ്പെടുകയായിരുന്നു എന്ന് രാമചന്ദ്രന് നായര് പറഞ്ഞു. തുടര്ന്നാണ് വീടും വീട്ടുപകരണങ്ങളും തകര്ത്തത്. അരണണിക്കൂറോളം ഭീകരാന്തരീക്ഷം സൃഷ്ടിച്ചശേഷമാണ് അക്രമികള് സ്ഥലം വിട്ടത്. വിവരമറിഞ്ഞ് സംഘപരിവാര് പ്രസ്ഥാനങ്ങളുടെ നേതാക്കളും പോലിസും രാത്രിതന്നെ സ്ഥലത്തെത്തി. രാമചന്ദ്രന്നായരുടെയും ശ്രീകുമാറിന്റെയും മൊഴികള് രേഖപ്പെടുത്തിയിട്ടുണ്ടെന്നും മൊഴികളുടെ അടിസ്ഥാനത്തില് കേസ്സെടുത്തിട്ടുണ്ടെന്നും പാലാ എസ്ഐ തോംസണ് പറഞ്ഞു. യഥാര്ത്ഥ പ്രതികളെതന്നെ കണ്ടെത്താന് ശാസ്ത്രീയമായ അന്വേഷണമാണ് നടത്തുന്നതെന്നു ഒരാളെയും രക്ഷപ്പെടാനും അക്രമം വളര്ത്താനും അനുവദിക്കില്ലെന്നും അദ്ദേഹം പറഞ്ഞു.
സംഭവത്തില് സംഘപരിവാര് പ്രസ്ഥാനങ്ങളുടെ നേതാക്കള് പ്രതിഷേധിച്ചു. പ്രതികളെ ഉടന് കണ്ടെത്തി നിയമത്തിനു മുന്നില്കൊണ്ടുവന്നില്ലെങ്കില് ശക്തമായ പ്രക്ഷോഭം ഉണ്ടാകുമെന്ന് നേതാക്കള് മുന്നറിയിപ്പു നല്കി. ബിജെപി സംസ്ഥാന സെക്രട്ടറി അഡ്വ: എന്.കെ. നാരായണ് നമ്പൂതിരി, നിയോജകമണ്ഡലം പ്രസിഡന്റ് കെ.എന്. മോഹനന്, ജനറല് സെക്രട്ടറി ജി. രഞ്ജിത്, ബിഎംഎസ് കോട്ടയം ജില്ലാ സെക്രട്ടറി നളിനാക്ഷന്, ജില്ലാ വൈസ് പ്രസിഡന്ഡന്റ് വി. കുട്ടികൃഷ്ണന്, യുവമോര്ച്ച സംസ്ഥാന സെക്രട്ടറി ലിജിന് ലാല്, ജില്ലാ സെക്രട്ടറി ജയകൃഷ്ണന് എന്നിവര് ആക്രമണത്തിനിരയായ വീട് സന്ദര്ശിച്ചു.
സംഭവത്തില് പ്രതിഷേധിച്ച് ഇന്നലെ വൈകിട്ട് പാലായില് നടന്ന പ്രതിഷേധ പ്രകടനത്തില് ബിജെപി നേതാക്കളായ കെ.എം. സന്തോഷ് കുമാര്, റ്റി.ആര്. നരേന്ദ്രന്, എന്.കെ. ശശികുമാര്, കെ.എന്. മോഹനന്, ജി രഞ്ജിത്, കെ.ജി. ഗിരീഷ് കുമാര്, എസ്. സോമശേഖരന്നായര്, സെബാസ്റ്റ്യന് ജോസഫ്, സി.ബി. ബിജു, ആര്എസ്എസ് നേതാക്കളായ ആര്. കണ്ണന്, സി.കെ. അശോകന്, പി. ശ്രീകുമാര്, ബിഎംഎസ് നേതാക്കളായ എം.എസ്. ഹരികുമാര്, വി.സി. ചന്ദ്രന്, യുവമോര്ച്ച നേതാക്കളായ ജയകൃഷ്ണന്, കെ.എ. ശ്രീരാജ്, രാഹുല്, സുജിത് എന്നിവര് പങ്കെടുത്തു.
