തൃപ്പൂണിത്തുറ: ഉദയംപേരൂര് കവലയില് മരത്തിന്റെ ഇടയില് സ്ഥാപിച്ച ഹൈമാസ്റ്റ് ലൈറ്റ് മാറ്റി സ്ഥാപിക്കണമെന്ന ആവശ്യം ശക്തമാവുന്നു. എറണാകുളം-ഏറ്റുമാനൂര് സംസ്ഥാന പാതയില് തൃപ്പൂണിത്തുറ-പൂത്തോട്ട റോഡില് ഉദയംപേരൂര് നാലുംകൂടി കവലയിലാണ് ഈ തലതിരിഞ്ഞ തമാശ. കെ.വി. തോമസിന്റെ എംപി ഫണ്ടില്നിന്നും അനുവദിച്ചതാണ് ഈ ഹൈമാസ്റ്റ് ലൈറ്റ്.
ജംഗ്ഷനില് റോഡിന്റെ കിഴക്കുഭാഗത്തായി സ്ഥാപിച്ചിരിക്കുന്ന ലൈറ്റിന്റെ ബള്ബുകള് തണല്മരത്തിന്റെ ചില്ലകള്ക്ക് ഇടയിലാണ്. ലൈറ്റിന്റെ വെളിച്ചം ജംഗ്ഷനില് കിട്ടില്ല. റോഡിന്റെ പടിഞ്ഞാറു ഭാഗത്ത് ബസ്ബേയുടെ സമീപം ലൈറ്റ് സ്ഥാപിക്കാന് സ്ഥലവുമുണ്ട്. ഇവിടെ ലൈറ്റ് സ്ഥാപിക്കണമെന്നതാണ് നാട്ടുകാരുടെയും പ്രകൃതിസ്നേഹികളുടെയും ആവശ്യം. എന്നാല് ഈ സ്ഥലം പരിഗണിക്കാതെ പ്രദേശത്തെ ചിലരുടെ സ്വാര്ത്ഥതാല്പ്പര്യം കാരണമാണ് ലൈറ്റ് മരങ്ങള്ക്കിടയില് ബോധപൂര്വം സ്ഥാപിച്ചതെന്ന് ആരോപണമുണ്ട്.
ലൈറ്റ് സ്ഥാപിക്കുന്ന സന്ദര്ഭത്തില് തണല് മരത്തിന്റെ ചില്ലകള് ചിലത് മുറിച്ചിരുന്നു. ലോക പരിസ്ഥിതിദിനമായ ജൂണ് അഞ്ചിന് കേരളത്തില് ഓരോ ജില്ലയിലും ജില്ലാ കളക്ടര്മാരുടെ നേതൃത്വത്തില് ലക്ഷക്കണക്കിന് വൃക്ഷത്തൈകള് നടുമ്പോഴാണ് ഇവിടെ തണല്മരം മുറിച്ചുനീക്കുന്നതിനുവേണ്ടി ഹൈമാസ്റ്റ്ലൈറ്റ് തണല്മരത്തിന് ഇടയില് സ്ഥാപിച്ചതെന്നും ആക്ഷേപമുണ്ട്. തണല്മരം മുറിച്ചുനീക്കാനുള്ള നീക്കത്തിന് പിന്നില് പ്രദേശത്തെ ചില സ്ഥാപിത താല്പ്പര്യക്കാരാണെന്ന് പ്രകൃതിസ്നേഹികളും ജനങ്ങളും പറയുന്നു.
