273 – സുഖസന്ദായകഃ കൃഷ്ണഃ – സുഖം തരുന്നവനായ കൃഷ്ണന്. കൃഷ്ണന് കരുണാകരനാണ്. ലോകത്തിന് സുഖം ദാനം ചെയ്യുകയാണ് കൃഷ്ണാവതാരത്തിന്റെ ലക്ഷ്യം. 266-ാം നാമത്തിന്റെ 5 ഉം 6 ഉം അര്ഥങ്ങള് നോക്കുക.
274 ഗോപാലബാലവശംവദഃ – ഇടയകുട്ടികള്ക്ക് വിധേയനായവന്. ഗോപാലബാലന്മാരെ അനുസരിക്കുന്നവന്. അമ്പാടിയിലുള്ള ഇടയക്കുട്ടികളുടെ തോഴനായാണ് കൃഷ്ണന് വളര്ന്നത്. മത്സരങ്ങളില് കൂട്ടുകാര്ക്ക് തോറ്റുകൊടുത്തും അവരെ അനുസരിച്ചും കളിച്ച കണ്ണന് അവരുടെ നേതാവുമായിരുന്നു. അവരെ വശംവദരാക്കിയും അവര്ക്ക് വശംവദനായും ആയിരുന്നു ഗുരുവായൂരപ്പന്റെ ബാലലീല.
275 – ഗോപസ്ത്രീഭാഗ്യരൂപകഃ – ഗോപസ്ത്രീകളുടെ ഭാഗ്യമായിത്തീര്ന്നവന്. പിറന്നനാള് മുതല് ഗോപസ്ത്രീകള് കൃഷ്ണനെ അവരുടെ ഭാഗ്യമായി കരുതിയിരുന്നു. ശിശുവായ കണ്ണനെ എടുക്കാനും ഓമനിക്കാനും അവര് തമ്മില് മത്സരിച്ചിരുന്നു. കുട്ടി വളരുന്നതിനനുസരിച്ച് അവരുടെ സ്നേഹവും വാത്സല്യവും വര്ധമാനമായി. ബാല്യം കഴിഞ്ഞ് കൈശോരത്തിലും താരുണ്യത്തിലും എത്തിയപ്പോള് മുതിര്ന്ന ഗോപസ്ത്രീകള് മകനായും ചെറുപ്പക്കാരികള് കാമുകനായും ഭാവിച്ചാരാധിച്ചു. എല്ലാ പ്രായത്തിലുമുള്ള ഗോപസ്ത്രീകളും കണ്ണനെ തങ്ങളുടെ ഭാഗ്യമായി കരുതി. കൃഷ്ണന് അമ്പാടിവിട്ട് മഥുരയിലേക്ക് പോയപ്പോഴും ഗോപസ്ത്രീകള് അദ്ദേഹത്തെ പ്രിയപ്പെട്ട മകനാ യും സഹോദരനായും കാമുകനായും നാഥനായും മനസ്സില് പ്രതിഷ്ഠിച്ചാരാധിക്കുന്നത് ഭാഗ്യമായി കരുതി.
(തുടരും)
ഡോ. ബി.സി.ബാലകൃഷ്ണന്
പ്രതികരിക്കാൻ ഇവിടെ എഴുതുക: