പറവൂര്‍: യുവമോര്‍ച്ച നേതാവിനെയും സഹപ്രവര്‍ത്തകരെയും ഗുണ്ടാസംഘം ആക്രമിച്ചു. യുവമോര്‍ച്ച പറവൂര്‍ നിയോജകമണ്ഡലം സെക്രട്ടറി രതീഷിനേയും പ്രവര്‍ത്തകരായ വടക്കേക്കര പട്ടണം സ്വദേശികള്‍ ഷിജോ, ജോബി, ദേവന്‍, ജിത്ത്‌ എന്നിവര്‍ക്കാണ്‌ ചൊവ്വാഴ്ച രാത്രി ഏഴരമണിയോടെ മര്‍ദ്ദനമേറ്റത്‌.
ക്രൂരമായി മര്‍ദ്ദനമേറ്റ രതീഷും സഹപ്രവര്‍ത്തകരും അണ്ടിപ്പിള്ളിക്കാവിലെ സ്വകാര്യ ആശുപത്രിയില്‍ ചികിത്സയിലാണ്‌. നാല്‌ ദിവസങ്ങള്‍ മുന്‍പും രതീഷിനെതിരെ അക്രമം നടന്നിരുന്നു. വടക്കേക്കര പട്ടണം പ്രദേശത്ത്‌ ഗുണ്ടാസംഘങ്ങള്‍ തേര്‍വാഴ്ച നടത്തിയിട്ടും വടക്കേക്കര പോലീസ്‌ തിരിഞ്ഞ്‌ നോക്കാത്തതില്‍ പ്രദേശത്ത്‌ വ്യാപക പ്രതിഷേധം ഉയര്‍ന്നു കഴിഞ്ഞു.
യുവമോര്‍ച്ച നേതാവിനെ ആക്രമിക്കാന്‍ ശ്രമിച്ച ഗുണ്ടാസംഘത്തലവന്‍ നികേഷിനെതിരെ വധശ്രമത്തിന്‌ കേസെടുത്ത്‌ ജയിലില്‍ അടക്കണമെന്ന്‌ ബിജെപി നിയോജകമണ്ഡലം പ്രസിഡന്റ്‌ അജി പോട്ടാശ്ശേരി, ജില്ലാ സമിതി അംഗം എം.എന്‍.ബാലചന്ദ്രന്‍, യുവമോര്‍ച്ച മണ്ഡലം പ്രസിഡന്റ്‌ നിര്‍മല്‍ എന്നിവര്‍ സംയുക്ത പ്രസ്താവനയില്‍ ആവശ്യപ്പെട്ടു. യുവമോര്‍ച്ച പ്രവര്‍ത്തകര്‍ക്ക്‌ നീതി നിഷേധിക്കപ്പെട്ടാല്‍ ശക്തമായ സമരവുമായി രംഗത്ത്‌ വരുമെന്നും നേതാക്കള്‍ മുന്നറിയിപ്പ്‌ നല്‍കി.
പ്രതികരിക്കാൻ ഇവിടെ എഴുതുക: