കൊച്ചി: സൗരോര്‍ജ്ജത്തില്‍ നിന്നും നരേന്ദ്രമോദി കറന്റ്‌ ഉണ്ടാക്കിയപ്പോള്‍ സൗരോര്‍ജ്ജത്തില്‍ നിന്നും ഉമ്മന്‍ചാണ്ടി ഉണ്ടാക്കിയത്‌ കറന്‍സി ആണെന്ന്‌ ബിജെപി ദേശീയ സെക്രട്ടറി പി.കെ കൃഷ്ണദാസ്‌ പറഞ്ഞു. സോളാര്‍ തട്ടിപ്പ്‌ കേസില്‍ സരിത നായരുടെ മൊഴി 21 പേജില്‍ നിന്നും 4 പേജായി ചുരുക്കിയതും എല്‍ഡിഎഫിന്റെ അനിശ്ചിതകാല ഉപരോധ സമരം 29 മണിക്കൂറായി ചുരുക്കിയതും എല്‍ഡിഎഫ്‌-യുഡിഎഫ്‌ അവിശുദ്ധ കൂട്ടുകെട്ടാണ്‌ മറനീക്കി പുറത്തുവന്നിരിക്കുന്നത്‌. ബിജെപി എളമക്കര ഏരിയാകമ്മറ്റി ഓഫീസ്‌ ഉദ്ഘാടനത്തോടനുബന്ധിച്ച്‌ പുന്നയ്‌ക്കല്‍ എന്‍.എസ്.എസ് ഹാളില്‍ നടന്ന പൊതുസമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കേന്ദ്രത്തില്‍ ഭരണത്തിന്റെ സമസ്ത മേഖലയിലും പരാജയപ്പെട്ട കോണ്‍ഗ്രസിന്റെ വിനാശകാലം ആരംഭിച്ചു. എല്ലാ സര്‍വ്വെഫലങ്ങളും സൂചിപ്പിക്കുന്നത്‌ കോണ്‍ഗ്രസിന്‌ വരുന്ന ലോകസഭാ തെരഞ്ഞെടുപ്പില്‍ വലിയ പരാജയം സംഭവിക്കുമെന്നാണ്‌. നരേന്ദ്രമോദിക്ക്‌ പകരം വയ്‌ക്കാന്‍ കോണ്‍ഗ്രസിന്‌ ഇന്ന്‌ നേതാവില്ലെന്നും അദ്ദേഹം പറഞ്ഞു.
ബിജെപി എറണാകുളം നിയോജകം മണ്ഡലം പ്രസിഡന്റ്‌ കെ.എസ് സുരേഷ്കുമാര്‍ അദ്ധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി എ.എന്‍.രാധാകൃഷ്ണന്‍, ജില്ലാ പ്രസിഡന്റ്‌ അഡ്വ.പി.ജെ തോമസ്‌, ജില്ലാ വൈസ്‌ പ്രസിഡന്റുമാരായ എന്‍.എം വിജയന്‍, എന്‍.സജികുമാര്‍, സജിനി രവികുമാര്‍, നിയോജകമണ്ഡലം ജനറല്‍ സെക്രട്ടറിമാരായ പ്രകാശ്‌ അയ്യര്‍, പി.ജി.അനില്‍കുമാര്‍, രാഷ്‌ട്രീയ സ്വയംസേവക സംഘം നഗര്‍ സംഘ ചാലക്‌ കെ.രാജഗോപാല്‍, എം.ജി ശിവശങ്കരന്‍, പുതുക്കവലട്ടം ബാലചന്ദ്രന്‍, കെ.എസ് രാജേഷ്‌, പി.ജി മനോജ്കുമാര്‍ എന്നിവര്‍ പ്രസംഗിച്ചു.
പേരണ്ടൂര്‍ ഭാഗ്യലക്ഷ്മി ബില്‍ഡിംഗ്സിലാണ്‌ ഏരിയാ കമ്മറ്റി ഓഫീസ്‌ പ്രവര്‍ത്തനം ആരംഭിച്ചിരിക്കുന്നത്‌. ആദ്യ കാലപ്രവര്‍ത്തകരായ കെ. ദാസന്‍, ദാമോദരന്‍, പരേതനായ കൃഷ്ണന്‍കുട്ടിയുടെ ഭാര്യ കെ.ഭാസുരാംഗി എന്നിവരെ പി.കെ കൃഷ്ണദാസ്‌ ചടങ്ങില്‍ പൊന്നാട അണിയിച്ച്‌ ആദരിച്ചു. വിദ്യാഭ്യാസ ചിലവിനായി കെ.ജി നായര്‍ സ്പോണ്‍സര്‍ ചെയ്ത ഒരു വര്‍ഷത്തെ വിദ്യാഭ്യാസത്തിനുള്ള സേവാനിധി അര്‍ച്ചനക്ക്‌ വിതരണം ചെയ്തു.
പ്രതികരിക്കാൻ ഇവിടെ എഴുതുക: