കോട്ടയം: പാലായിലെ റോഡുകളുടെ സംരക്ഷണഭിത്തികള്‍ തകരുന്നതും അറ്റകുറ്റപ്പണികള്‍ നടത്തിയ റോഡുകള്‍ ആഴ്ചകള്‍ക്കകം വീണ്ടും ഗതാഗതയോഗ്യമല്ലാതാകുന്നതിനും പിന്നില്‍ ഉദ്യോഗസ്ഥ രാഷ്ട്രീയ അവിശുദ്ധ കൂട്ടുകെട്ടാണ് എന്ന് യൂത്ത് കോണ്‍ഗ്രസ് നേതാക്കള്‍ പത്രസമ്മേളനത്തില്‍ പറഞ്ഞു.
പാലായില്‍ പുതുതായി നിര്‍മ്മിച്ചുകൊണ്ടിരിക്കുന്ന റിംഗ്‌റോഡിന്റെ ഭാഗമായി കഴിഞ്ഞമാസം നിര്‍മ്മാണം പൂര്‍ത്തീകരിച്ച് ടാര്‍ ചെയ്ത റോഡ് സംരക്ഷണഭിത്തി ഇടിഞ്ഞ് പൂര്‍ണ്ണമായും തകര്‍ന്നു.
പാലാ റിംഗ് റോഡിന്റെ ഭാഗമായി നബാര്‍ഡ് ഫണ്ട് വിനിയോഗിച്ച് ‘ചിറ്റാര്‍പള്ളി-പേണ്ടാനം വയല്‍ ബൈപ്പാസ്’ എന്ന പേരില്‍ പണിത റോഡാണ് തകര്‍ന്നത്. കഴിഞ്ഞമാസമാണ് പ്രസ്തുത സംരക്ഷണഭിത്തി പണിത് റോഡ് ടാര്‍ ചെയ്തത്. എന്നാല്‍ ടാറിംഗ് കഴിഞ്ഞ് രണ്ടാഴ്ചക്കകം ടാര്‍ ഇളകി ഗട്ടറുകള്‍ ഉണ്ടായിത്തുടങ്ങിയത് വന്‍ പ്രതിഷേധത്തിന് കാരണമായിരുന്നു. ഈ റോഡിന്റെ നിര്‍മ്മാണാരംഭത്തില്‍ത്തന്നെ സ്വജനപക്ഷപാതവും അഴിമതിയും രാഷ്‌ട്രീയഇടപെടലും മൂലം റോഡിന്റെ നിര്‍മ്മാണം അശാസ്ത്രീയമാവുകയും രണ്ട് കൊടും വളവുകള്‍ നിവര്‍ത്താന്‍ സാധിക്കാതെ വരികയും ചെയ്തു.
മുന്‍പ് ഉണ്ടായിരുന്ന ബലക്ഷയമുള്ള കെട്ടുകളുടെ മേല്‍ പുതിയ കല്‍ക്കെട്ട് 25 അടിയോളം ഉയരത്തില്‍ വരെ 200 മീറ്ററോളം നിര്‍മ്മിച്ച് പഴയ കെട്ടിന്റെ കൂടി അളവ് കണക്കില്‍ ഉള്‍പ്പെടുത്തി എന്ന ആക്ഷേപവും ഉണ്ട്. കൂടാതെ വഴിയുടെ നിര്‍മ്മാണത്തിന് ഒരു സെന്റ് സ്ഥലം പോലും വിട്ടുകൊടുക്കാത്ത സ്വകാര്യവ്യക്തികളുടെ പുരയിടത്തിന് സര്‍ക്കാര്‍ ചെലവില്‍ സംരക്ഷണഭിത്തി പാലം നിര്‍മ്മിച്ച് നല്‍കിയിട്ടുണ്ട്. എന്നാല്‍ വഴി നിര്‍മ്മാണത്തിനായി വളരെയധികം സ്ഥലം വിട്ടുകൊടുത്ത പലരുടെയും പുരയിടം ജില്ലാ പഞ്ചായത്ത് അംഗത്തിന്റെ നേതൃത്വത്തില്‍ വീണ്ടും ബലമായി കയ്യേറുകയും വൃക്ഷങ്ങള്‍ വെട്ടി നശിപ്പിക്കുകയും ചെയ്തു. ഇതു സംബന്ധിച്ച് കേസും ഉണ്ട്. സ്ഥലം വിട്ടു നല്‍കിയ പലരുടെയും പുരയിടത്തിന് കയ്യാലപോലും വച്ച് നല്‍കാന്‍ അധികൃതര്‍ തയ്യാറായിട്ടില്ല. റോഡിനായി സ്ഥലം നല്‍കിയ ഒരു വ്യക്തി മുന്‍പുണ്ടായിരുന്ന പഞ്ചായത്ത് റോഡില്‍ ഒരു മതില്‍കെട്ടി കയ്യേറിയിരിക്കുന്നതും ഈ റോഡ് നിര്‍മ്മാണത്തിന്റെ മറവില്‍ ഉദ്യോഗസ്ഥ രാഷ്ട്രീയ നേതൃത്വത്തിന്റെ മൗനാനുവാദത്തോടെയാണ് കേരള കോണ്‍ഗ്രസ് പ്രാദേശിക നേതൃത്വമാണ് ഈ ക്രമക്കേടുകള്‍ക്ക് സഹായം ചെയ്യുന്നതെന്നും അവര്‍ പറഞ്ഞു.
പത്രസമ്മേളനത്തില്‍ യൂത്ത്‌കോണ്‍ഗ്രസ് പാലാ നിയോജകമണ്ഡലം കമ്മറ്റി പ്രസിഡന്റ് ബോസ് ടോം, വൈസ്പ്രസിഡന്റ് റോജിന്‍ തോമസ്, ജനറല്‍ സെക്രട്ടറി ആന്റോച്ചന്‍ ജയിംസ് എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: