മോസ്കോ: പണാപഹരണകേസില്‍ അഞ്ച്‌ വര്‍ഷം തടവുശിക്ഷയ്‌ക്ക്‌ വിധിക്കപ്പെട്ട്‌ മണിക്കൂറുകള്‍ക്കകം പ്രമുഖ സാമൂഹ്യ-രാഷ്‌ട്രീയ പ്രവര്‍ത്തകനും റഷ്യന്‍ സര്‍ക്കാരിന്റെ പ്രധാന വിമര്‍ശകനുമായ അലെക്സി നവാള്‍നിക്ക്‌ മോചനം.
മോസ്കോ മേയര്‍ തെരഞ്ഞെടുപ്പില്‍ സ്ഥാനാര്‍ഥിയായ നവാള്‍നിയെ തടവിലിട്ടാല്‍ അതു അദ്ദേഹത്തിന്‌ മത്സരിക്കാനുള്ള അവകാശം നിഷേധിക്കുന്നതാകുമെന്ന പ്രോസിക്യൂട്ടര്‍മാരുടെ അപേക്ഷ പരിഗണിച്ചാണ്‌ കിറോവ്‌ കോടതിയുടെ നടപടി. മോസ്കോ വിട്ടുപോകരുതെന്ന്‌ നവാള്‍നിയോട്‌ കോടതി നിര്‍ദേശിച്ചിട്ടുണ്ട്‌. ശിക്ഷാവിധിക്കെതിരായ അപ്പീലുകളില്‍ വാദം പൂര്‍ത്തിയാകുന്നതുവരെ നവാള്‍നിക്ക്‌ ജാമ്യത്തില്‍ തുടരാം.
2009ല്‍ കിറോവ്‌ പ്രവിശ്യാ ഗവര്‍ണറുടെ ഉപദേശകനായിരുന്ന കാലത്ത്‌ സര്‍ക്കാര്‍ ഉടമസ്ഥതയിലുള്ള കിറോവ്ലസ്‌ എന്ന മരകമ്പനിയില്‍ നിന്നും 500,000 ഡോളര്‍ വെട്ടിച്ച സംഘത്തിന്‌ നേതൃത്വം നല്‍കിയെന്ന കേസില്‍ കഴിഞ്ഞദിവസമാണ്‌ നവാള്‍നി ശിക്ഷിക്കപ്പെട്ടത്‌. കൂട്ടുപ്രതിയായ പൈറ്റ്‌ ഒഫിറ്റ്സെറോവിനും നാലു വര്‍ഷത്തെ തടവു ശിക്ഷ വിധിച്ചിരുന്നു.
2008ല്‍ സര്‍ക്കാരിന്റെ കീഴിലെ സ്ഥാപനങ്ങളിലെ ക്രമക്കേടുകള്‍ വെളിപ്പെടുത്തുന്ന ബ്ലോഗ്‌ ആരംഭിച്ചതോടെ ജനശ്രദ്ധനേടിയ നവാള്‍നിക്കതിരായ ശിക്ഷാവിധി പ്രസിഡന്റ്‌ വ്ലാഡിമര്‍ പുടിന്റെ പ്രതികാര നടപടിയെന്നു വിശേഷിക്കപ്പെട്ടു.
സോഷ്യല്‍ നെറ്റ്‌വര്‍ക്കിങ്‌ സൈറ്റുകളിലൂടെ അഴിമതിക്കെതിരെ തുടര്‍ച്ചയായി ശബ്ദമുയര്‍ത്തിയതും 2011ലെ തെരഞ്ഞെടുപ്പിനുശേഷം സര്‍ക്കാര്‍ വിരുദ്ധ പ്രകടനം നയിച്ചതുമൊക്കെ നവാള്‍നിയെ ശത്രുവായി പ്രഖ്യാപിക്കുന്നതിന്‌ പുടിനെയും അദ്ദേഹത്തിന്റെ യുണൈറ്റഡ്‌ റഷ്യ പാര്‍ട്ടിയേയും പ്രേരിപ്പിച്ചിരുന്നു.
പ്രതിപക്ഷ നേതാവിനെ കണ്ടെത്താനുള്ള വോട്ടെടുപ്പില്‍ നവാള്‍നി ഏറ്റവുംകൂടുതല്‍പേരുടെ പിന്തുണ ഉറപ്പിച്ചതും പുടിന്റെ അങ്കലാപ്പിനു കാരണമായി.
പ്രതികരിക്കാൻ ഇവിടെ എഴുതുക: