പെരുമ്പാവൂര്: പുതിയ കോടതി സമുച്ചയം നിര്മ്മാണത്തിന്റെ ആദ്യഘട്ടമെന്നോണം പഴയ കുന്നത്തുനാട് താലൂക്ക് ഓഫീസ് കെട്ടിടം പൊളിച്ചുമാറ്റുന്നതിനുള്ള നടപടികള് സ്വീകരിക്കുവാന് കഴിഞ്ഞ ദിവസം ചേര്ന്ന താലൂക്ക് സഭയില് തീരുമാനമായി. ഇതിനായി ജില്ലാകളക്ടറുടെ അനുമതി തേടുന്നതിന് തഹസില്ദാറെ യോഗം ചുമതലപ്പെടുത്തി. നിലവില് കോടതിക്കും പോലീസ് സ്റ്റേഷനും ഇടയിലുള്ള ഓടുമേഞ്ഞ കെട്ടിടമാണ് ആദ്യം പൊളിച്ച് നീക്കുന്നത്. ഇതിലൂടെ ബൈപാസ് റോഡ് നിര്മ്മിക്കുന്നതിനായാണ് കെട്ടിടം നീക്കം ചെയ്യുന്നതെന്നാണ് ഉദ്യോഗസ്ഥര് പറയുന്നത്. സാജുപോള് എംഎല്എയുടെ അദ്ധ്യക്ഷതയില് ചേര്ന്ന യോഗമാണ് തീരുമാനമെടുത്തത്.
എന്നാല് പെരുമ്പാവൂരിലെ കോടതി സമുച്ചയം നിര്മ്മാണത്തിന് ഭരണാനുമതി ലഭിച്ചിട്ട് നാളുകള് ഏറെയായി. പുതിയ മിനിസിവില് സ്റ്റേഷനിലേക്ക് രജിസ്ട്രാര് ഓഫീസും, താലൂക്ക് ഓഫീസും മാറുന്നതനുസരിച്ച് നിര്മ്മാണ നടപടികള് ആരംഭിക്കുമെന്ന് അധികൃതര് പറഞ്ഞിരുന്നെങ്കിലും ഇപ്പോള് മാത്രമാണ് ഇത്തരമൊരു തീരുമാനം ഉണ്ടായത്. നാല് കോടതികളാണ് പെരുമ്പാവൂരില് നിലവില് പ്രവര്ത്തിച്ച് വരുന്നത്. ഇതിനായി 4 നിലകളിലുള്ള അറുപതിനായിരം ചതുരശ്ര അടി വിസ്തീര്ണ്ണത്തിലുള്ള കോടതി സമുച്ചയമാണ് പണിയുന്നത്. കോടതി സമുച്ചയത്തിന്റെ നിര്മ്മാണത്തിനായി 13.75 കോടിയുടെ ചെലവാണ് കണക്കാക്കുന്നതെന്ന് എംഎല്എ നേരത്തെ അറിയിച്ചിരുന്നു.
മജിസ്ട്രേട്ട് കോടതിയോട് തൊട്ടുചേര്ന്നുള്ള താലൂക്ക് ഓഫീസ് പ്രവര്ത്തിച്ചിരുന്ന പഴയകെട്ടിടത്തിലാണ് ഇപ്പോള് അസിസ്റ്റന്റ് പബ്ലിക്ക് പ്രോസിക്ക്യൂട്ടറുടേയും, ഗവണ്മെന്റ് പ്ലീഡറുടേയും ഓഫീസുകള് പ്രവര്ത്തിക്കുന്നത്. ഈ രണ്ട് ഓഫീസുകളും അടുത്തിടെയാണ് ലക്ഷങ്ങള് മുടക്കി മോടിപിടിപ്പിച്ചിരിക്കുന്നത്. ഇതില് ഗവ.പ്ലീഡറുടെ ഓഫീസ് പ്രവര്ത്തിക്കുന്ന കെട്ടിടം പൊളിക്കുന്നതിനാണ് കളക്ടറുടെ അനുമതി തേടുന്നത്. അനുമതി ലഭിച്ചാല് ഉടന്തന്നെ തുടര്നടപടികള് ആരംഭിക്കുമെന്നതിനാല് ഇവിടെ പ്രവര്ത്തിക്കുന്ന ഓഫീസിന് മറ്റൊരു സംവിധാനം കാണണമെന്നു ആവശ്യമുയരുന്നുണ്ട്.
