ഡെറാഡൂണ് : ഉത്തരേന്ത്യയില് വെള്ളപൊക്കത്തിലും ഉരുള്പ്പൊട്ടലിലും മരിച്ചവരുടെ എണ്ണം 73 കവിഞ്ഞു. ഉത്തരാഖണ്ഡില് വിവിധ ഇടങ്ങളിലായി 57,000ത്തോളം തീര്ഥാടകരും വിനോദസഞ്ചാരികളും കുടുങ്ങിക്കിടക്കുകയാണ്. ഇതില് ക്രിക്കറ്റ് താരം ഹര്ഭജന് സിംഗും ഉള്പ്പെടുന്നു. വെള്ളപ്പൊക്കത്തെ തുടര്ന്ന് യമുനോത്രി, ഗംഗോത്രി, കേദാര്നാഥ്, ബദരീനാഥ്, മാന്സരോവര് യാത്രകള് സര്ക്കാര് നിരോധിച്ചിട്ടുണ്ട്.
തകര്ത്തുപെയ്യുന്ന മഴ ഉത്തരേന്ത്യയില് കനത്ത നാശമാണ് വിതച്ചത്. ഉത്തരാഖണ്ഡില് മാത്രം മരണം നാല്പ്പത് കവിഞ്ഞു. നാനൂറോളം റോഡുകളും തകര്ന്നിട്ടുണ്ട്. ഹിമാചലിലെ ആദിവാസി മേഖലയായ കിന്നാരില് ഒമ്പത് പേര് മരിച്ചു. ഉത്തര്പ്രദേശില് 15 പേര് വെള്ളപ്പൊക്കത്തില് മരിച്ചു. ഡെറാഡൂണിന് സമീപമുള്ള ജോഷിമതിയിലാണ് ക്രിക്കറ്റ് താരം ഹര്ഭജന് സിംഗ് അകപ്പെട്ടിരിക്കുന്നത്. ഹിമാചലിനെ സംഗ്ലിയില് ഉപതെരഞ്ഞെടുപ്പ് പ്രചരണത്തിന് പോയ ഹിമാചല് മുഖ്യമന്ത്രി വീരഭദ്രസിംഗ് താഴ്വരയില് കുടുങ്ങി. പിന്നീട് ഇദ്ദേഹത്തെ ഹെലികോപ്റ്റര് രക്ഷപ്പെടുത്തുകയായിരുന്നു.
ഉത്തരാഖണ്ഡിലും ഹരിയാനയിലും ഹിമാചലിലും നൂറോളം പേരെ കാണാതായിട്ടുണ്ട്. മഴവെള്ളപ്പാച്ചിലില് ഇരുന്നൂറ്റി അമ്പതോളം ബസുകളടക്കം നിരവധി വാഹനങ്ങള് ഒലിച്ചുപോയി. ഗംഗയിലെയും യമുനയിലെയും പ്രളയത്തില് 180ഓളം വീടുകള് തകര്ന്നു. രക്ഷാ പ്രവര്ത്തനത്തിനായി സൈന്യം ഇറങ്ങിയെങ്കിലും മഴയും മണ്ണിടിച്ചിലും ശക്തമായി തുടരുന്നതിനാല് രക്ഷാപ്രവര്ത്തനം ദുഷ്കരമായി തുടരുകയാണ്.
ദല്ഹിയില് കനത്ത മഴയെത്തുടര്ന്ന് അന്താരാഷ്ട്ര വിമാനത്താവളത്തില് വെള്ളം കയറി. യമുനാ നദിയില് ജലനിരപ്പ് ഉയര്ന്നതോടെ ദല്ഹിയിലെ താഴ്ന്ന പ്രദേശങ്ങളില് നിന്നും ജനങ്ങളെ ഒഴിപ്പിച്ചു. ശക്തമായ മഴ ഇന്നും തുടരുമെന്നാണ് കാലാവസ്ഥാ നിരീക്ഷണകേന്ദ്രം അറിയിച്ചിരിക്കുന്നത്. ജൂണ് 17 മുതല് രാജ്യത്ത് 68 ശതമാനം മഴ കൂടുതല് ലഭിച്ചെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
ജൂണ് ഒന്നു മുതല് 17 വരെ 67.2 മില്ലി മീറ്റര് മഴയാണ് ലഭിക്കേണ്ടിയിരുന്നതെങ്കിലും 112.9 മില്ലി മീറ്റര് മഴ പെയ്തു. ഇതു വരെ രാജ്യത്തിന്റെ 91 ശതമാനം പ്രദേശങ്ങളിലും മഴ ലഭിച്ചിട്ടുണ്ടെന്ന് ഇന്ത്യന് മീറ്ററോളൊജിക്കല് ഡിപ്പാര്ട്ട്മെന്റ് ചീഫ് എല്.എസ്. ലാത്തോര് പറഞ്ഞു. അടുത്ത 48 മണിക്കൂര് കൂടി കനത്ത മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രം അറിയിച്ചിരിക്കുന്നത്.
കാലാവസ്ഥാ നിരീക്ഷണ കേന്ദ്രം പുറത്തിറക്കിയ ബുള്ളറ്റിന് പ്രകാരം ഹിമാചല്പ്രദേശ്, ഡല്ഹി ഹരിയാന, ഉത്തര്പ്രദേശിന്റെ പടിഞ്ഞാറ് ഭാഗങ്ങള്, ഗുജറാത്ത്, കൊങ്കണ്, ഗോവ എന്നിവിടങ്ങളില് ഇന്നും കനത്ത മഴ പെയ്യും. കര്ണാടകയുടെ തീരപ്രദേശങ്ങളിലും കേരളത്തിലും ശക്തമായ മഴയുണ്ടാകും. ജൂണ് 20 വരെ തല്സ്ഥിതി തുടരും.
പ്രതികരിക്കാൻ ഇവിടെ എഴുതുക: