എല്ലാ ദ്വൈതങ്ങള്ക്കും അപ്പുറത്ത് അകവും അവിച്ഛിന്നവുമായ ആ മഹാസത്യത്തിലേക്ക്, നിത്യനും നിരാമയവുമായ ആ പരമബോധത്തിലേക്ക് വ്യക്തിത്വത്തിന്റെ എല്ലാ പരിമിതികളെയും ഭേദിച്ചുകൊണ്ട് നമുക്ക് എത്തിച്ചേരേണ്ടതുണ്ട്. അതിനുള്ള ഉപായങ്ങളാണ് അഷ്ടാംഗമാര്ഗങ്ങളില് ക്രമാനുഗതമായി വിവരിക്കപ്പെട്ടിരിക്കുന്നത്. ഈ പ്രക്രിയയിലെ വളരെ നിര്ണായകമായ ഒരു ഘട്ടമാണ് സമാരോഹണം.
സമാരോഹണം നമ്മെ വ്യക്തിത്വത്തിന്റെ എല്ലാ പരിമിതികളില് നിന്നും മോചിപ്പിക്കുന്നു. നാം ഇതുവരെ ചെയ്ത എല്ലാ സാധനകളുടെയും പരിശ്രമങ്ങളുടെയും യഥാര്ത്ഥ ഫലം ഇതിലൂടെ നമുക്ക് കൈവരാന് പോവുകയാണ്. ശാസ്ത്രപരിജ്ഞാനം നേടിയതുകൊണ്ടോ, വേദാന്തം പഠിച്ചതുകൊണ്ടോ, ചാതുര്യത്തോടെ കാര്യങ്ങള് അവതരിപ്പിക്കാന് കഴിഞ്ഞതുകൊണ്ടോ ആരും ഈ അവസ്ഥയെ പ്രാപിക്കുന്നില്ല. ഒരുപക്ഷേ, നമ്മുടെ സാമര്ത്ഥ്യങ്ങള്കൊണ്ട് ബാഹ്യപ്രപഞ്ചത്തില് പലതും നേടിയെടുക്കാന് സാധിച്ചെന്ന് വരാം.
പക്ഷേ, ഈശ്വരന്റെ ലോകത്ത് നേടേണ്ടതിനെ നേടിയെടുക്കാന് ഒരു സാമര്ത്ഥ്യംകൊണ്ടും സാധിക്കില്ല. കുറുക്കുവഴികള് അന്വേഷിക്കുന്നവര്ക്ക് നിരാശമാത്രമായിരിക്കും ഫലം. എന്നാല് ആത്മാര്ത്ഥതയും സമര്പ്പണബുദ്ധിയും ഉള്ളവര്ക്ക് ഇതെല്ലാം എളുപ്പത്തില് നേടിയെടുക്കുകയും ചെയ്യാം.
– തഥാതന്
