തിരുവനന്തപുരം: കാലുമാറ്റ രാഷ്ട്രീയത്തിലൂടെ യു.ഡി.എഫ് സര്ക്കാരിനെ രക്ഷിക്കാന് ശ്രമിക്കുന്ന മുഖ്യമന്ത്രി ഉമ്മന്ചാണ്ടിയും സഹപ്രവര്ത്തകരും പാര്ലമെന്ററി ജനാധിപത്യത്തെ കുരുതി കൊടുത്തിരിക്കുകയാണെന്ന് സി.പി.എം സംസ്ഥാനന സെക്രട്ടറി പിണറായി വിജയന് പറഞ്ഞു.
മുഖ്യമന്ത്രിയുടെ നേതൃത്വത്തില് നടന്ന ഗൂഢാലോചനയുടെ ഭാഗമാണ് ശെല്വരാജിന്റെ രാജി. കൂറുമാറ്റ നിരോധന നിയമം നിലവിലുള്ളതുകൊണ്ട് അതിനെ മറികടക്കാനാണ് എം.എല്.ഐയെ പ്രലോഭിപ്പിച്ച് രാജിവയ്പിച്ചതെന്നും പിണറായി പറഞ്ഞു.
പാര്ലമെന്ററി പ്രവര്ത്തനത്തിലെ ഏറ്റവും കുത്സിതമായ കാലുമാറ്റ രാഷ്ര്ടീയം നടത്തി തന്റെ സര്ക്കാരിനെ രക്ഷിക്കാമെന്ന ഉമ്മന്ചാണ്ടിയുടെ ചിന്ത അപകടകരമാണ്. രാജിയ്ക്കുമുമ്പ് മുഖ്യമന്ത്രി പങ്കാളിയായ രാഷ്ട്രീയ ഗൂഢാലോചനയുമുണ്ടായി. ഇതിലൂടെ 1991 മുതല് 96 വരെ പ്രധാനമന്ത്രിയായിരുന്ന നരസിംഹറാവു അതിവിദഗ്ദ്ധമായി നടത്തിയ കാലുമാറ്റ രാഷ്ട്രീയം കേരള രാഷ്ട്രീയത്തില് ഉമ്മന്ചാണ്ടി പകര്ത്തുകയാണ് ചെയ്തതെന്നും പിണറായി ആരോപിച്ചു.
ഇത്തരത്തിലുള്ള രാഷ്ട്രീയം പ്രബുദ്ധ കേരളം തള്ളിക്കളയും. കാലുമാറ്റ രാഷ്ട്രീയത്തിനെതിരായ കനത്ത പ്രഹരം പിറവത്തെ വോട്ടര്മാര് നല്കണമെന്നും പിണറായി ആവശ്യപ്പെട്ടു.
