ന്യൂദല്‍ഹി: സാമ്പത്തിക പ്രതിസന്ധി തുടരുന്ന സാഹചര്യത്തില്‍ എയര്‍ ഇന്ത്യാ എക്സ്‌പ്രസിന്റെയും കിങ് ഫിഷര്‍ എയര്‍ ലൈന്‍സിന്റെയും വിമാനസര്‍വ്വീസുകള്‍ നിര്‍ത്തലാക്കണമെന്ന് ഡി.ജി.സി.എ (ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍) ആവശ്യപ്പെട്ടു. രണ്ട് വിമാനക്കമ്പനികളുടെയും പ്രതിനിധികളെ വിളിച്ചു വരുത്തി ഡി.ജി.സി.എ ഭരത് ഭൂഷണ്‍ ഈ നിര്‍ദ്ദേശം നല്‍കി.
രണ്ട് വിമാനക്കമ്പനികളുടെയും സര്‍വ്വീസുകള്‍ സുരക്ഷാ പ്രശ്നങ്ങള്‍ ഉണ്ടാക്കുന്നുവെന്ന് ഡി.ജി.സി.എ വിലയിരുത്തി. ഇന്ത്യന്‍ വ്യോമയാന മേഖലയിലെ സാമ്പത്തിക സ്ഥിതിയെക്കുറിച്ച് ഡി.ജി.സി.എ നടത്തിയ ഓഡിറ്റിങ്ങിലാണ് കിങ് ഫിഷറിന്റെയും എയര്‍ ഇന്ത്യാ എക്സ്‌പ്രസിന്റെയും സാമ്പത്തിക സ്ഥിതിയെക്കുറിച്ച് വ്യക്തമാക്കിയത്.
സാമ്പത്തിക പ്രതിസന്ധി തുടരുന്ന സാഹചര്യത്തില്‍ കിങ് ഫിഷറിന് സര്‍വ്വീസ് തുടരാനാവില്ലെന്നും കമ്പനിയുടെ അനുമതി പിന്‍‌വലിക്കണമെന്നും ഓഡിറ്റിങ്ങില്‍ ശുപാര്‍ശ ചെയ്യുന്നു. സാമ്പത്തിക പ്രതിസന്ധി സുരക്ഷാ പ്രശ്നങ്ങളുണ്ടാക്കാന്‍ സാധ്യതയുണ്ടെന്നും റിപ്പോര്‍ട്ട് ചൂണ്ടിക്കാണിക്കുന്നു.
സാമ്പത്തിക പ്രതിസന്ധിയില്‍ നിന്നും കരകയറാനുള്ള നടപടികള്‍ വ്യക്തമാക്കണമെന്ന് ഡി.ജി.സി.എ കിങ് ഫിഷര്‍, എയര്‍ ഇന്ത്യാ എക്സ്‌പ്രസ് വിമാനകമ്പനികളോട് ആവശ്യപ്പെട്ടിട്ടുണ്ട്. അല്ലാത്തപക്ഷം ഈ കമ്പനികളുടെ ലൈസന്‍സ് റദ്ദാക്കുകയോ സര്‍വ്വീസുകള്‍ വെട്ടിച്ചുരുക്കുകയോ ചെയ്യാനാണ് ഡി.ജി.സി.എയുടെ തീരുമാനം.
എയര്‍ ഇന്ത്യാ എക്സ്‌പ്രസിന്റെ സര്‍വ്വീസുകള്‍ നിര്‍ത്തിവയ്കുന്നത് ഗള്‍ഫ് മേഖലയിലേയ്‌ക്കുള്ള സര്‍വ്വീസുകളെ ദോഷകരമായി ബാധിക്കും. ജെറ്റ് എയര്‍വേയ്സ്, ജെറ്റ് ലൈറ്റ്, സ്പൈസ് ജെറ്റ്, ഗോ എയര്‍ലൈന്‍സ് എന്നീ വിമാനക്കമ്പനികളും സാമ്പത്തിക പ്രതിസന്ധി തരണം ചെയ്തിട്ടില്ലെന്നും ഡി.ജി.സി.എയുടെ ഓഡിറ്റില്‍ പറയുന്നു.
പ്രതികരിക്കാൻ ഇവിടെ എഴുതുക: